౪౪. ఉపోసథనిద్దేసో

ఉపోసథోతి –

౪౧౦. దువే ఉపోసథా చాతు-ద్దసో పన్నరసో ఇతి;

సుత్తుద్దేసమధిట్ఠాన-పారిసుద్ధివసా తయో.

౪౧౧. సుత్తుద్దేసోవ సఙ్ఘస్స, అధిట్ఠానఉపోసథో;

పుగ్గలస్సేవ సేసానం, పారిసుద్ధిఉపోసథో.

౪౧౨. పుబ్బకిచ్చే చ కరణే, పత్తకల్లే సమానితే;

సుత్తం ఉద్దిసతి సఙ్ఘో, పఞ్చధా సో విభావితో.

౪౧౩. వినాన్తరాయం సఙ్ఖేపే-నుద్దేసో వినివారితో;

‘‘థేరోవ ఇస్సరో ద్వీసు, ఉద్దేసేస్వేత్థ తీసు వా;

విసదేసూ’’తి వుత్తత్తా, అవత్తన్తేపి వట్టతి.

౪౧౪. ఆగచ్ఛేయ్యుం యది సమా, ఉద్దిసన్తే వ థోకికా;

ఉద్దిట్ఠం యం సుఉద్దిట్ఠం, సోతబ్బమవసేసకం.

౪౧౫. ఉద్దిట్ఠమత్తే సకలా-యేకచ్చాయుట్ఠితాయ వా;

పారిసుద్ధిం కరేయ్యేసం, సన్తికే బహుకాథ చే;

కత్వా సబ్బవికప్పేసు, పుబ్బకిచ్చం పునుద్దిసే.

౪౧౬. పన్నరసోవాసికానం, ఇతరానం సచేతరో;

సమానేతరేనువత్తన్తు, పురిమానం సచేధికా;

పురిమా అనువత్తన్తు, తేసం సేసేప్యయం నయో.

౪౧౭. పాటిపదోవాసికానం, ఇతరానం ఉపోసథో;

సమథోకానం సామగ్గిం, మూలట్ఠా దేన్తు కామతో.

౪౧౮. బహి గన్త్వాన కాతబ్బో, నో చే దేన్తి ఉపోసథో;

దేయ్యానిచ్ఛాయ సామగ్గీ, బహూసు బహి వా వజే.

౪౧౯. పాటిపదేగన్తుకానం, ఏవమేవ అయం నయో;

సావేయ్య సుత్తం సఞ్చిచ్చ, అస్సావేన్తస్స దుక్కటం.

౪౨౦. సమ్మజ్జితుం పదీపేతుం, పఞ్ఞాపేతుం దకాసనం;

న కరేయ్య తథా కల్లో, మహాథేరేన పేసితో.

౪౨౧. సమ్మజ్జిత్వా పదీపేత్వా, పట్ఠపేత్వా దకాసనం. గణఞత్తిం ఠపేత్వేవం, కత్తబ్బో తీహుపోసథో. ‘‘సుణన్తు మే ఆయస్మన్తా, అజ్జుపోసథో పన్నరసో, యదాయస్మన్తానం పత్తకల్లం, మయం అఞ్ఞమఞ్ఞం పారిసుద్ధిఉపోసథం కరేయ్యామా’’తి.

౪౨౨. ఏకంసం చీవరం కత్వా, నిసీదిత్వా ఉక్కుటికం,. థేరేన అఞ్జలిం తేవం, పగ్గయ్హ సముదీరియా. ‘‘పరిసుద్ధో అహం ఆవుసో, పరిసుద్ధోతి మం ధారేథా’’తి, వదే యావతతీయకం.

౪౨౩. సమత్తపుబ్బారమ్భేన, తే నవేనేవమీరియా. ‘‘పరిసుద్ధో అహం భన్తే, పరిసుద్ధోతి మం ధారేథా’’తి, వదే యావతతీయకం.

౪౨౪. ద్వీసు థేరేన కత్తబ్బం, కత్వేవమీరియో నవో. ‘‘పరిసుద్ధో అహం ఆవుసో, పరిసుద్ధోతి మం ధారేహీ’’తి తిక్ఖత్తుం వత్తబ్బో.

౪౨౫. నవేన థేరో తిక్ఖత్తుం, ఏవమస్స ఉదీరియో;

‘‘పరిసుద్ధో అహం భన్తే, పరిసుద్ధోతి మం ధారేథా’’తి.

౪౨౬. పుబ్బకిచ్చం సమాపేత్వా, అధిట్ఠేయ్యేవమేకకో. ‘‘అజ్జ మే ఉపోసథో పన్నరసోతి వా చాతుద్దసోతి వా అధిట్ఠామీ’’తి వత్తబ్బం, నో చేధిట్ఠేయ్య దుక్కటం.

౪౨౭. యత్థ వసన్తి చత్తారో, తయో వా యది వా దువే;

పారిసుద్ధిం హరిత్వాన, ఏకేకస్సితరీతరే;

తం తం ఉపోసథం కయిరుం, సియా ఆపత్తి దుక్కటం.

౪౨౮. వగ్గే సమగ్గే వగ్గోతి, సఞ్ఞినో విమతిస్స వా;

దుక్కటం కరోతో భేదా-ధిప్పాయేన థుల్లచ్చయం;

వగ్గే సమగ్గేనాపత్తి, సమగ్గో ఇతి సఞ్ఞినో.

౪౨౯. ఉక్ఖిత్తస్స గహట్ఠస్స, సేసానం సహధమ్మినం;

పారాజికస్సాభబ్బస్స, సిక్ఖానిక్ఖిత్తకస్స చ.

౪౩౦. నిసిన్నపరిసాయఞ్చ, సభాగాపత్తికో తథా;

ఛన్దేన పరివుత్థేన, పాతిమోక్ఖం న ఉద్దిసే.

౪౩౧. అదేసయిత్వానాపన్నం, నావికత్వాన వేమతిం;

నుపోసథేపి వా కాతుం, పోసథో న చ కప్పతి.

౪౩౨. అట్ఠితోపోసథావాసా, న వజే తదహూ వినా;

అన్తరాయం వ సఙ్ఘం వా-ధిట్ఠాతుం సీమమేవ వాతి.