౪౫. పవారణానిద్దేసో

పవారణాతి –

౪౩౩. ద్విన్నం తిణ్ణం చతున్నఞ్చ, అఞ్ఞమఞ్ఞప్పవారణా;

ఏకస్స చ అధిట్ఠానం, సేసా సఙ్ఘప్పవారణా.

౪౩౪. పుబ్బకిచ్చే చ కరణే, పత్తకల్లే సమానితే;

ఠపేత్వా ఞత్తిం సఙ్ఘేన, కత్తబ్బేవం పవారణా.

‘‘సుణాతు మే భన్తే సఙ్ఘో, అజ్జ పవారణా పన్నరసీ, యది సఙ్ఘస్స పత్తకల్లం, సఙ్ఘో పవారేయ్యా’’తి.

౪౩౫. ఏకంసం చీవరం కత్వా, నిసీదిత్వా ఉక్కుటికం;

థేరేన అఞ్జలిం సఙ్ఘో, పగ్గయ్హ సముదీరియో.

౪౩౬. ‘‘సఙ్ఘం, ఆవుసో, పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తో అనుకమ్పం ఉపాదాయ, పస్సన్తో పటికరిస్సామి. దుతియమ్పి…పే… తతియమ్పి, ఆవుసో, సఙ్ఘం పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తో అనుకమ్పం ఉపాదాయ, పస్సన్తో పటికరిస్సామీ’’తి.

౪౩౭. పవారేన్తేసు థేరేసు, నిసజ్జుక్కుటికం నవో;

పవారేతి సయం యావ, ఉక్కుటికోవ అచ్ఛతు.

౪౩౮. పుబ్బారమ్భం సమాపేత్వా, నవో సఙ్ఘముదీరయే.

౪౩౯. ‘‘సఙ్ఘం, భన్తే, పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తో అనుకమ్పం ఉపాదాయ, పస్సన్తో పటికరిస్సామి. దుతియమ్పి…పే… తతియమ్పి, భన్తే, సఙ్ఘం పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తో అనుకమ్పం ఉపాదాయ, పస్సన్తో పటికరిస్సామీ’’తి.

౪౪౦. దానేన ధమ్మసాకచ్ఛా, కలహేహి చ రత్తియా;

తేవాచికాయ ఓకాసే-సతి ఖేపితభావతో;

అన్తరాయే దసవిధే, ఞత్తిం వత్వానురూపతో.

౪౪౧. ‘‘సుణాతు మే భన్తే సఙ్ఘో, మనుస్సేహి దానం దేన్తేహి, ద్వీహి భిక్ఖూహి ధమ్మం సాకచ్ఛన్తేహి, కలహం కరోన్తేహి యేభుయ్యేన రత్తి ఖేపితా. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం రత్తి విభాయిస్సతి. అయం రాజన్తరాయో, అయం చోరన్తరాయో, అయం అగ్యన్తరాయో, అయం ఉదకన్తరాయో, అయం మనుస్సన్తరాయో, అయం అమనుస్సన్తరాయో, అయం వాళన్తరాయో, అయం సరీసపన్తరాయో, అయం జీవితన్తరాయో, అయం బ్రహ్మచరియన్తరాయో. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం బ్రహ్మచరియన్తరాయో భవిస్సతి. యది సఙ్ఘస్స పత్తకల్లం, సఙ్ఘో ద్వేవాచికం, ఏకవాచికం, సమానవస్సికం పవారేయ్యా’’తి.

౪౪౨. పవారేయ్యానురూపేన, యథాఠపితఞత్తియా;

ఆగచ్ఛేయ్యుం యది సమా, ఆదికా చేత్థ ఆహరే.

౪౪౩. ఏవం తిచతువగ్గో చ, ఞత్తిం వత్వా పవారయే. ‘‘సుణన్తు మే ఆయస్మన్తా, అజ్జ పవారణా పన్నరసీ, యదాయస్మన్తానం పత్తకల్లం, మయం అఞ్ఞమఞ్ఞం పవారేయ్యామా’’తి.

౪౪౪. ఏకంసం చీవరం కత్వా, నిసీదిత్వా ఉక్కుటికం;

థేరేన అఞ్జలిం తేవం, పగ్గయ్హ సముదీరియా.

౪౪౫. ‘‘అహం, ఆవుసో, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తా అనుకమ్పం ఉపాదాయ, పస్సన్తో పటికరిస్సామి. దుతియమ్పి…పే… తతియమ్పి అహం, ఆవుసో, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తా అనుకమ్పం ఉపాదాయ, పస్సన్తో పటికరిస్సామీ’’తి.

నవేనాపి ‘‘అహం, భన్తే, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తా అనుకమ్పం ఉపాదాయ, పస్సన్తో పటికరిస్సామి. దుతియమ్పి…పే… తతియమ్పి అహం, భన్తే, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా, వదన్తు మం ఆయస్మన్తా అనుకమ్పం ఉపాదాయ, పస్సన్తో పటికరిస్సామీ’’తి.

౪౪౬. ద్వీసు థేరేన కత్తబ్బం, నవో కత్వేవమీరియో.

౪౪౭. ‘‘అహం, ఆవుసో, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా, వదతు మం ఆయస్మా అనుకమ్పం ఉపాదాయ, పస్సన్తో పటికరిస్సామి. దుతియమ్పి…పే… తతియమ్పి అహం, ఆవుసో, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా, వదతు మం ఆయస్మా అనుకమ్పం ఉపాదాయ, పస్సన్తో పటికరిస్సామీ’’తి.

నవేనాపి ‘‘అహం, భన్తే, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా, వదతు మం ఆయస్మా అనుకమ్పం ఉపాదాయ, పస్సన్తో పటికరిస్సామి. దుతియమ్పి…పే… తతియమ్పి అహం, భన్తే, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా, వదతు మం ఆయస్మా అనుకమ్పం ఉపాదాయ, పస్సన్తో పటికరిస్సామీ’’తి.

౪౪౮. పుబ్బకిచ్చం సమాపేత్వా, అధిట్ఠేయ్యేవమేకకో. ‘‘అజ్జ మే పవారణా చాతుద్దసీతి వా పన్నరసీతి వా అధిట్ఠామీ’’తి వత్తబ్బం.

౪౪౯. యస్మిం వసన్తి వా పఞ్చ, చత్తారో వా తయో దువే;

పవారణం హరిత్వాన, ఏకేకస్సితరీతరే.

౪౫౦. తం తం పవారణం కయిరుం,

సియా ఆపత్తి దుక్కటం;

సేసా ఉపోసథే వుత్తా,

గాథాయో చేత్థ ఆహరే.

౪౫౧. పవారితేవ సఙ్ఘమ్హి, పారిసుద్ధిఉపోసథం;

కరేయ్య ఛిన్నవస్సో వా, అవుత్థో వానుపగతో.

౪౫౨. చాతుమాసినియా చాపి, కతే సఙ్ఘేనుపోసథే;

వుత్థవస్సా పవారేయ్యుం, సచే అప్పతరా సియున్తి.