౪౧. పకిణ్ణకనిద్దేసో

పకిణ్ణకన్తి –

౩౩౫. సద్వారబన్ధనే ఠానే, సోదుక్ఖలకపాసకే;

సయన్తేన దివా ద్వారం, బన్ధేయ్య పరివట్టకం.

౩౩౬. సన్తే విఞ్ఞుమ్హి పురిసే, ఆభోగో చాపి కప్పతి;

సవసే తం వినాకారం, సయన్తో దుక్కటం ఫుసే.

౩౩౭. రతనానిత్థిరూపాని, ధఞ్ఞమిత్థిపసాధనం;

తూరియావుధభణ్డాని, ఆమసన్తస్స దుక్కటం.

౩౩౮. సిత్థతేలోదతేలేహి, ఫణహత్థఫణేహి వా;

కోచ్ఛేనవాపి యో కేసే, ఓసణ్ఠేయ్యస్స దుక్కటం.

౩౩౯. నేకపావురణా ఏకత్థరణా వా తువట్టయుం;

తథేకమఞ్చే భుఞ్జేయ్యుం, ఏకస్మిం వాపి భాజనే.

౩౪౦. చతురఙ్గులతో ఊనమధికట్ఠఙ్గులం తథా;

దన్తకట్ఠం న ఖాదేయ్య, లసుణం న అకల్లకో.

౩౪౧. హీనుక్కట్ఠేహి ఉక్కట్ఠం, హీనం వా జాతిఆదిహి;

ఉజుం వాఞ్ఞాపదేసేన, వదే దుబ్భాసితం దవా.

౩౪౨. దీఘే నఖే చ కేసే చ, నాసలోమే న ధారయే;

న లబ్భం వీసతిమట్ఠం, సమ్బాధే లోమహారణం.

౩౪౩. యథావుడ్ఢం న బాధేయ్య, సఙ్ఘుద్దిట్ఠంవ సఙ్ఘికం;

అధోతఅల్లపాదేహి, నక్కమే సయనాసనం;

సుధోతపాదకం వాపి, తథేవ సఉపాహనో.

౩౪౪. సఙ్ఘాటియా న పల్లత్థే, భిత్తాదిం న అపస్సయే;

పరికమ్మకతం సన్తే, ఉదకే నో న ఆచమే.

౩౪౫. అకప్పియసమాదానే, దవా సిలాపవిజ్ఝనే;

దేసనాయ సభాగాయ, ఆవికమ్మే చ దుక్కటం.

౩౪౬. పటిస్సవవిసంవాదే, సుద్ధచిత్తస్స దుక్కటం;

పటిస్సవక్ఖణే ఏవ, పాచిత్తి ఇతరస్స తు.

౩౪౭. న రుక్ఖమభిరూహేయ్య, సతి కిచ్చేవ పోరిసం;

ఆపదాసు యథాకామం, కప్పతీ అభిరూహితుం.

౩౪౮. వినాద్ధానం వజన్తస్స, దుక్కటం పరిసావనం;

యాచమానస్స అద్ధానే, అదదన్తస్స దుక్కటం.

౩౪౯. థుల్లచ్చయం ఫుసే అఙ్గజాతచ్ఛేదేన దుక్కటం;

ఆబాధప్పచ్చయాఞ్ఞత్ర, సేసఙ్గే అత్తఘాతనే.

౩౫౦. చిత్తపోత్థకరూపాని, న కరే న చ కారయే;

న వుట్ఠాపేయ్య భుఞ్జన్తం, ఆరామారఞ్ఞగేహసు.

౩౫౧. యానాని పుమయుత్తాని, సివికం హత్థవట్టకం;

పాటఙ్కిఞ్చ గిలానస్స, కప్పతీ అభిరూహితుం.

౩౫౨. బుద్ధం ధమ్మఞ్చ సఙ్ఘఞ్చ, ఆరబ్భ కరణే దవం;

దుక్కటం పరిసం వాపి, అఞ్ఞస్స ఉపలాళనే.

౩౫౩. కాయం ఊరుం నిమిత్తం వా, భిక్ఖునీనం న దస్సయే;

వివరిత్వా న సిఞ్చేయ్య, తా కద్దముదకాదినా.

౩౫౪. న గణ్హతో చ ఓవాదం, న పచ్చాహరతోపి చ;

బాలం గిలానం గమియం, వజ్జయిత్వాన దుక్కటం.

౩౫౫. లోకాయతం న వాచేయ్య, పలితం న చ గాహయే;

పేళాయపి న భుఞ్జేయ్య, న కీళే కిఞ్చి కీళితం.

౩౫౬. పారుపే న నివాసేయ్య, గిహిపారుతనివాసనం;

సంవేల్లియం నివాసేయ్య, దాయం నాలిమ్పయేయ్య వా.

౩౫౭. వడ్ఢిం పయోజయే యాచే, నోఞ్ఞాతకప్పవారితే;

అత్తనో పరిభోగత్థం, దిన్నమఞ్ఞస్స నో దదే;

అగ్గం గహేత్వా భుత్వా వా, కతిపాహం పునో దదే.

౩౫౮. ఉద్దిస్స యాచనే రక్ఖం, ఞత్వాఞత్వా వ దణ్డినం;

గీవాస్స దణ్డితే దణ్డో, సయం దణ్డాపనే పన;

దణ్డస్స అగ్ఘభేదేన, ఞేయ్యా పారాజికాదికా.

౩౫౯. హరన్తేసు పరిక్ఖారం, ‘‘చోరో చోరో’’తి భాసితే;

అనత్థాయేసం గణ్హన్తే, దణ్డం గీవాస్స తత్తకం.

౩౬౦. విఘాసుచ్చారసఙ్కార-ముత్తం ఛడ్డేయ్య దుక్కటం;

బహి పాకారకుట్టానం, వళఞ్జే నావలోకియ;

హరితే వాపి వీహాది-నాళికేరాదిరోపిమే.

౩౬౧. యోజాపేతుం పయోజేతుం, పయుత్తాని చ పస్సితుం;

న లబ్భం ధమ్మయుత్తమ్పి, నచ్చం గీతఞ్చ వాదితం;

‘‘ఉపహారం కరోమా’’తి, వుత్తే వా సమ్పటిచ్ఛితుం.

౩౬౨. రాజాగారం పోక్ఖరణిం, ఉయ్యానం చిత్తగారకం;

కీళత్థం గచ్ఛతో దట్ఠుం, ఆరామం దుక్కటం కతం.

౩౬౩. నవే న పటిబాహేయ్యా-సనేనుణ్హే న చీవరం;

నిదహేయ్య ఖమాపేయ్య, గరునా చ పణామితో.

౩౬౪. అక్కోసనే పరమ్ముఖా, ఆపత్తీహి చ సత్తహి;

భిక్ఖుం ఉపాసకం వాపి, అఞ్ఞేనేవ చ దుక్కటం.

౩౬౫. న లబ్భం వినిపాతేతుం, సద్ధాదేయ్యఞ్చ చీవరం;

లబ్భం పితూనం సేసానం, ఞాతీనమ్పి న లబ్భతి.

౩౬౬. వస్సంవుత్థోఞ్ఞతోఞ్ఞత్ర, భాగం గణ్హేయ్య దుక్కటం;

పటిదేయ్య నట్ఠే జిణ్ణే, గీవా నో దేయ్య చోదితో;

ధురనిక్ఖేపతో తేసం, హోతి భణ్డగ్ఘకారియో.

౩౬౭. న సన్తరుత్తరో గామం, కల్లో వా సఉపాహనో;

పవిసేయ్య న ధారేయ్య, చామరీమకసబీజనిం.

౩౬౮. అగిలానో న ఛిన్దేయ్య, కేసే కత్తరియా బహి;

ఆరామతో న ధారేయ్య, ఛత్తం లబ్భతి గుత్తియా.

౩౬౯. గాహేయ్య నుభతోకాజం, ఏకన్తరికకాజకం;

సీసక్ఖన్ధకటిభారా, హత్థోలమ్బో చ లబ్భతి.

౩౭౦. ఆపత్తియా అనోకాస-కతం చోదేయ్య దుక్కటం;

సుద్ధస్స చ అవత్థుస్మిం, తథా ఓకాసకారణే.

౩౭౧. అట్ఠఙ్గులాధికం మఞ్చపటిపాదం న ధారయే;

పకతఙ్గులేన సత్తానం, మఞ్చం వా ఉచ్చపాదకం.

౩౭౨. మూగబ్బతాదిం గణ్హేయ్య, దుక్కటం తిత్థియబ్బతం;

ఖురభణ్డం పరిహరే, తథా న్హాపితపుబ్బకో.

౩౭౩. యం కిఞ్చి యాచితుం హత్థకమ్మం తదనుసారతో;

లద్ధం గహేతుం నిక్కమ్మమయాచిత్వాపి కప్పతి;

కారేతుమాహరాపేతుం, యం కిఞ్చిపరసన్తకం.

౩౭౪. గిహీనం గోపకే దేన్తే, గహేతుం దేతి యత్తకం;

లబ్భం యథాపరిచ్ఛేదం, సఙ్ఘచేతియసన్తకే.

౩౭౫. ద్వీహాపజ్జేయ్య ఆపత్తిం, కాయవాచాహి వా ఛహి;

అలజ్జిఞ్ఞాణకుక్కుచ్చపకతత్తా సతిప్లవా;

అకప్పియే వా కప్పియే, కప్పాకప్పియసఞ్ఞితా.

౩౭౬. అలజ్జిఞ్ఞాణతాపత్తిం, కాయవాచాహి ఛాదయే;

లిఙ్గే సఙ్ఘే గణేకస్మిం, చతుధాపత్తివుట్ఠితి.

౩౭౭. పరికథోభాసవిఞ్ఞత్తి, న లబ్భా పచ్చయద్వయే;

విఞ్ఞత్తియేవ తతియే, సేసే సబ్బమ్పి లబ్భతి.

౩౭౮. న రూహతచ్చయే దానం, పఞ్చన్నం సహధమ్మినం;

సఙ్ఘస్సేవ చ తం హోతి, గిహీనం పన రూహతి.

౩౭౯. భిక్ఖు వా సామణేరో వా, కాలం కయిరాథూపస్సయే;

భిక్ఖుసఙ్ఘోవ దాయజ్జో, తత్థ సేసేప్యయంనయో.

౩౮౦. పురిమస్సేవిమం దిన్నం, దేహి నేత్వాసుకస్సతి;

పచ్ఛిమస్సేవ దమ్మీతి, దిన్నం ఞత్వా ఇమం విధిం;

గణ్హే విస్సాసగాహం వాధిట్ఠే మతకచీవరం.

౩౮౧. లోహభణ్డే పహరణిం, దారుభణ్డే చ దారుజం;

పత్తం పాదుకపల్లఙ్కం, ఆసన్దిం మత్తికామయే;

ఠపేత్వా కప్పతి సబ్బం, కతకం కుమ్భకారికన్తి.