౪౨. దేసనానిద్దేసో
దేసనాతి –
౩౮౨. చాగో యో భిక్ఖుభావస్స, సా పారాజికదేసనా;
యథావుత్తేన వుట్ఠానం, గరుకాపత్తిదేసనా.
౩౮౩. ఉక్కుటికం నిసీదిత్వా, పగ్గణ్హిత్వాన అఞ్జలిం;
థుల్లచ్చయాదిం దేసేయ్య, ఏవమేకస్స సన్తికే.
౩౮౪. ‘‘అహం, భన్తే, ఏకం థుల్లచ్చయాపత్తిం ఆపజ్జిం, తం తుమ్హమూలే పటిదేసేమీ’’తి వత్వా తేన ‘‘పస్ససి, ఆవుసో, తం ఆపత్తి’’న్తి వుత్తే ‘‘ఆమ, భన్తే, పస్సామీ’’తి వత్వా పున తేన ‘‘ఆయతిం, ఆవుసో, సంవరేయ్యాసీ’’తి వుత్తే ‘‘సాధు సుట్ఠు, భన్తే, సంవరిస్సామీ’’తి వత్తబ్బం. ‘‘అహం, భన్తే, ద్వే థుల్లచ్చయాపత్తియో ఆపజ్జిం, అహం భన్తే సమ్బహులా థుల్లచ్చయాపత్తియో ఆపజ్జిం, తా తుమ్హమూలే పటిదేసేమీ’’తి వత్తబ్బం.
నిస్సగ్గియేసు పన ‘‘ఇదం మే, భన్తే, చీవరం దసాహాతిక్కన్తం నిస్సగ్గియం, ఇమాహం ఆయస్మతో నిస్సజ్జామీ’’తి. ‘‘ఇమాని మే, భన్తే, చీవరాని…పే… ఏతం మే, భన్తే, చీవరం…పే… ఏతాని మే, భన్తే, చీవరాని దసాహాతిక్కన్తాని నిస్సగ్గియాని, ఏతానాహం ఆయస్మతో నిస్సజ్జామీ’’తి.
౩౮౫. నిస్సజ్జిత్వాన దేసేయ్య, ఆపత్తిం తేన భిక్ఖునా;
పటిగ్గహేత్వా ఆపత్తిం, దేయ్యం నిస్సట్ఠచీవరం.
‘‘ఇమం, ఇమాని, ఏతం, ఏతాని చీవరాని ఆయస్మతో దమ్మీ’’తి.
౩౮౬. (క) ఇదం మే, భన్తే, చీవరం రత్తివిప్పవుత్థం అఞ్ఞత్ర భిక్ఖుసమ్ముతియా నిస్సగ్గియం.
(ఖ) ఇదం మే, భన్తే, అకాలచీవరం మాసాతిక్కన్తం నిస్సగ్గియం.
(గ) ఇదం మే, భన్తే, పురాణచీవరం అఞ్ఞాతికాయ భిక్ఖునియా ధోవాపితం నిస్సగ్గియం.
(ఘ) ఇదం మే, భన్తే, చీవరం అఞ్ఞాతికాయ భిక్ఖునియా హత్థతో పటిగ్గహితం అఞ్ఞత్ర పారివత్తకా నిస్సగ్గియం.
(ఙ) ఇదం మే, భన్తే, చీవరం అఞ్ఞాతకం గహపతికం అఞ్ఞత్ర సమయా విఞ్ఞాపితం నిస్సగ్గియం.
(చ) ఇదం మే, భన్తే, చీవరం అఞ్ఞాతకం గహపతికం తతుత్తరి విఞ్ఞాపితం నిస్సగ్గియం.
(ఛ) ఇదం మే, భన్తే, చీవరం పుబ్బే అప్పవారితో అఞ్ఞాతకం గహపతికం ఉపసఙ్కమిత్వా వికప్పం ఆపన్నం నిస్సగ్గియం.
(జ) ఇదం మే, భన్తే, చీవరం పుబ్బే అప్పవారితో అఞ్ఞాతకే గహపతికే ఉపసఙ్కమిత్వా వికప్పం ఆపన్నం నిస్సగ్గియం.
(ఝ) ఇదం మే, భన్తే, చీవరం అతిరేకతిక్ఖత్తుం చోదనాయ అతిరేకఛక్ఖత్తుం ఠానేన అభినిప్ఫాదితం నిస్సగ్గియం.
(ఞ) ఇదం మే, భన్తే, కోసియమిస్సకం సన్థతం కారాపితం నిస్సగ్గియం.
(ట) ఇదం మే, భన్తే, సుద్ధకాళకానం ఏళకలోమానం సన్థతం కారాపితం నిస్సగ్గియం.
(ఠ) ఇదం మే, భన్తే, సన్థతం అనాదియిత్వా తులం ఓదాతానం తులం గోచరియానం కారాపితం నిస్సగ్గియం.
(డ) ఇదం మే, భన్తే, సన్థతం ఊనకఛబ్బస్సాని కారాపితం అఞ్ఞత్ర భిక్ఖుసమ్ముతియా నిస్సగ్గియం.
(ఢ) ఇదం మే, భన్తే, నిసీదనసన్థతం అనాదియిత్వా పురాణసన్థతస్స సామన్తా సుగతవిదత్థిం కారాపితం నిస్సగ్గియం.
(ణ) ఇమాని మే, భన్తే, ఏళకలోమాని తియోజనపరమం అతిక్కామితాని నిస్సగ్గియాని.
(త) ఇమాని మే, భన్తే, ఏళకలోమాని అఞ్ఞాతికాయ భిక్ఖునియా ధోవాపితాని నిస్సగ్గియాని.
(థ) అహం, భన్తే, రూపియం పటిగ్గహేసిం, ఇదం మే, భన్తే, నిస్సగ్గియం, ఇమాహం సఙ్ఘస్స నిస్సజ్జామి.
(ద) అహం, భన్తే, నానప్పకారకం రూపియసంవోహారం సమాపజ్జిం, ఇదం మే, భన్తే, నిస్సగ్గియం, ఇమాహం సఙ్ఘస్స నిస్సజ్జామీతి.
౩౮౭. నిస్సజ్జిత్వాన ఆపత్తిం, దేసేయ్యాథ గిహిం వదే;
‘‘జానాహిమ’’న్తి ఇమినా, సో వదేయ్యాహరామి కిం.
౩౮౮. అవత్వామన్తి తేలాదిం, వదే భిక్ఖూన కప్పియం;
యం ఆహరతి సో తేన, పరివత్తేత్వాన కప్పియం.
౩౮౯. లబ్భం ఠపేత్వా ద్వేపేతే, సేసేహి పరిభుఞ్జితుం;
తతో అఞ్ఞేన లద్ధోపి, భాగో తేసం న కప్పతి.
౩౯౦. రుక్ఖచ్ఛాయాప్యన్తమసో, తన్నిబ్బత్తా న కప్పతి;
నిస్సట్ఠం పటిలద్ధమ్పి, ఆదితో సన్థతత్తయం.
౩౯౧. నో చే లభేథ ఏవం సో, ఇమం ఛడ్డేహి సంసియో;
ఏవమ్పి భిక్ఖు ఛడ్డేయ్య, నో చే లభేథ సమ్మతో.
౩౯౨. ఏతాని దుతియో పత్తో, సఙ్ఘే సేసాని లబ్భరే;
సఙ్ఘేకస్మిం గణే వత్తుం, లబ్భం భాసన్తరేనపి.
౩౯౩. (క) అహం, భన్తే, నానప్పకారకం కయవిక్కయం సమాపజ్జిం, ఇదం మే, భన్తే, నిస్సగ్గియం.
(ఖ) అయం మే, భన్తే, పత్తో దసాహాతిక్కన్తో నిస్సగ్గియో.
(గ) అయం మే, భన్తే, పత్తో ఊనపఞ్చబన్ధనేన పత్తేన చేతాపితో నిస్సగ్గియో, ఇమాహం సఙ్ఘస్స నిస్సజ్జామీతి.
౩౯౪. నిస్సజ్జిత్వాన దేసేయ్య, ఆపత్తిం పత్తగాహకం;
సమ్మన్నిత్వాన సఙ్ఘస్స, పత్తన్తం తస్స దాపయే.
౩౯౫. (క) ఇదం మే, భన్తే, భేసజ్జం సత్తాహాతిక్కన్తం నిస్సగ్గియం.
(ఖ) ఇదం మే, భన్తే, వస్సికసాటికచీవరం అతిరేకమాసే సేసే గిమ్హానే పరియిట్ఠం, అతిరేకడ్ఢమాసే సేసే గిమ్హానే కత్వా పరిదహితం నిస్సగ్గియం.
(గ) ఇదం మే, భన్తే, చీవరం భిక్ఖుస్స సామం దత్వా అచ్ఛిన్నం నిస్సగ్గియం.
(ఘ) ఇదం మే, భన్తే, చీవరం సామం సుత్తం విఞ్ఞాపేత్వా తన్తవాయేహి వాయాపితం నిస్సగ్గియం.
(ఙ) ఇదం మే, భన్తే, చీవరం పుబ్బే అప్పవారితో అఞ్ఞాతకస్స గహపతికస్స తన్తవాయే ఉపసఙ్కమిత్వా వికప్పం ఆపన్నం నిస్సగ్గియం.
(చ) ఇదం మే, భన్తే, అచ్చేకచీవరం చీవరకాలసమయం అతిక్కామితం నిస్సగ్గియం.
(ఛ) ఇదం మే, భన్తే, చీవరం అతిరేకఛారత్తం విప్పవుత్థం అఞ్ఞత్ర భిక్ఖుసమ్ముతియా నిస్సగ్గియం.
(జ) ఇదం మే, భన్తే, జానం సఙ్ఘికం లాభం పరిణతం అత్తనో పరిణామితం నిస్సగ్గియం, ఇమాహం ఆయస్మతో నిస్సజ్జామీతి.
౩౯౬. సేసం సబ్బం యథాయోగం, ఆదిమ్హి వియ యోజయే.
౩౯౭. (క) అహం, భన్తే, ఏకం పాచిత్తియాపత్తిం ఆపజ్జిం. ద్వే సమ్బహులా పాచిత్తియాపత్తియో ఆపజ్జిం.
(ఖ) గారయ్హం, భన్తే, ధమ్మం ఆపజ్జిం అసప్పాయం పాటిదేసనీయం, తం పటిదేసేమీతి. తేన ‘‘పస్ససి, ఆవుసో, తం ధమ్మ’’న్తి వత్తబ్బం.
(గ) అహం, భన్తే, ఏకం దుక్కటాపత్తిం ఆపజ్జిం. ద్వే సమ్బహులా దుక్కటాపత్తియో ఆపజ్జిం.
(ఘ) అహం, భన్తే, ఏకం దుబ్భాసితాపత్తిం ఆపజ్జిం. ద్వే సమ్బహులా దుబ్భాసితాపత్తియో ఆపజ్జిం. తా తుమ్హమూలే పటిదేసేమీతి.
(ఙ) ‘‘అహం, భన్తే, ద్వే నానావత్థుకా థుల్లచ్చయాపత్తియో ఆపజ్జిం. సమ్బహులా నానావత్థుకా థుల్లచ్చయాపత్తియో ఆపజ్జిం, తా తుమ్హమూలే పటిదేసేమీ’’తి వత్వా తేన ‘‘పస్ససి, ఆవుసో, తా ఆపత్తియో’’తి వుత్తే ‘‘ఆమ, భన్తే, పస్సామీ’’తి వత్వా పున తేన ‘‘ఆయతిం, ఆవుసో, సంవరేయ్యాసీ’’తి వుత్తే ‘‘సాధు సుట్ఠు, భన్తే, సంవరిస్సామీ’’తి వత్తబ్బం.
౩౯౮. అదేసనాగామినియం, అనాపత్తిఞ్చ దేసితం;
నానా సంవాసనిస్సీమట్ఠితానం చతుపఞ్చహి;
మనసా పకతత్తానం, నానేకాతి న దేసయేతి.