౪. పురాణచీవరసిక్ఖాపదవణ్ణనా

‘‘సాకియానియో వియ సుద్ధభిక్ఖుసఙ్ఘే వా’’తి ఇదం ‘‘భిక్ఖునీ నామ ఉభతోసఙ్ఘే ఉపసమ్పన్నా’’తి (పారా. ౫౦౫) ఇమినా విరుజ్ఝతీతి చే? న, అధిప్పాయాజాననతో. భిక్ఖూనం సన్తికే ఉపసమ్పదాయ పటిక్ఖిత్తత్తా తదనుప్పసఙ్గభయా ఏవం వుత్తన్తి వేదితబ్బం.

ఏకేన వత్థునాతి యేన కేనచి పఠమేన. అవుత్తా వా ధోవతీతి అవుత్తా ధోవతి, రజతి ఆకోటేతీతి అత్థో. ‘‘‘అవుత్తా’తి వచనతో అవాదాపేత్వా ధోవనాదీసు అనాపత్తీ’’తి లిఖితం. ఇధ చీవరం నామ నివాసనపారుపనూపగమేవ. యది ఏవం ‘‘నివాసనపారుపనూపగమేవ వత్తబ్బ’’న్తి చే? తం న వత్తబ్బం ‘‘పురాణచీవర’’న్తి ఇమినావ సిద్ధత్తా. వుత్తఞ్హేతం ‘‘పురాణచీవరం నామ సకిం నివత్థమ్పి సకిం పారుతమ్పీ’’తి (పారా. ౫౦౫).

పురాణచీవరసిక్ఖాపదవణ్ణనా నిట్ఠితా.