౪. వస్సికసాటికసిక్ఖాపదవణ్ణనా

చతుత్థే మాసో సేసో గిమ్హానన్తి చతున్నం గిమ్హమాసానం ఏకో పచ్ఛిమమాసో సేసో. పరియేసితబ్బన్తి గిమ్హానం పచ్ఛిమమాసస్స పఠమదివసతో పట్ఠాయ యావ కత్తికమాసస్స పచ్ఛిమదివసో, తావ ‘‘కాలో వస్సికసాటికాయా’’తిఆదినా సతుప్పాదకరణేన, సఙ్ఘస్స పవారితట్ఠానతో, అత్తనో ఞాతకప్పవారితట్ఠానతో పన ‘‘దేథ మే వస్సికసాటికచీవర’’న్తిఆదికాయ విఞ్ఞత్తియాపి పరియేసితబ్బం. అఞ్ఞాతకఅప్పవారితట్ఠానే సతుప్పాదం కరోన్తస్స వత్తభేదే దుక్కటం, యథా వా తథా వా ‘‘దేథ మే’’తిఆదివచనేన విఞ్ఞాపేన్తస్స అఞ్ఞాతకవిఞ్ఞత్తిసిక్ఖాపదేన నిస్సగ్గియం పాచిత్తియం. కత్వా నివాసేతబ్బన్తి గిమ్హానం పచ్ఛిమద్ధమాసస్స పఠమదివసతో పట్ఠాయ యావ కత్తికమాసస్స పచ్ఛిమదివసో, తావ సూచికమ్మనిట్ఠానేన సకిమ్పి వణ్ణభేదమత్తరజనేన కప్పబిన్దుకరణేన చ కత్వా పరిదహితబ్బా. ఏత్తావతా గిమ్హానం పచ్ఛిమో మాసో పరియేసనక్ఖేత్తం, పచ్ఛిమో అద్ధమాసో కరణనివాసనక్ఖేత్తమ్పి, వస్సానస్స చతూసు మాసేసు సబ్బమ్పి తం వట్టతీతి అయమత్థో దస్సితో హోతి. యో చాయం గిమ్హానం పచ్ఛిమో మాసో అనుఞ్ఞాతో, ఏత్థ కతపరియేసితమ్పి వస్సికసాటికం అధిట్ఠాతుం న వట్టతి. సచే తస్మిం మాసే అతిక్కన్తే వస్సం ఉక్కడ్ఢియతి, పున మాసపరిహారం లభతి, ధోవిత్వా పన నిక్ఖిపిత్వా వస్సూపనాయికదివసే అధిట్ఠాతబ్బా. సచే సతిసమ్మోసేన వా అప్పహోనకభావేన వా అకతా హోతి. తే చ ద్వే మాసే వస్సానస్స చతుమాసన్తి ఛ మాసే పరిహారం లభతి. సచే పన కత్తికమాసే కథినం అత్థరియతి, అపరేపి చత్తారో మాసే లభతి, ఏవం దస మాసా హోన్తి. తతో పరమ్పి సతియా పచ్చాసాయ తం మూలచీవరం కత్వా ఠపేన్తస్స ఏకమాసన్తి ఏవం ఏకాదస మాసే పరిహారం లభతి, ఇతో పరం ఏకాహమ్పి న లభతి.

ఓరేన చే మాసో సేసో గిమ్హానన్తి గిమ్హానం పచ్ఛిమమాసస్స ఓరిమభాగే యావ హేమన్తస్స పఠమదివసో, తావాతి అత్థో. పరియేసేయ్యాతి ఏతేసు సత్తసు పిట్ఠిసమయమాసేసు అఞ్ఞాతకఅప్పవారితట్ఠానతో సతుప్పాదకరణేన పరియేసన్తస్స నిస్సగ్గియం పాచిత్తియం, విఞ్ఞాపేన్తస్స అఞ్ఞాతకవిఞ్ఞత్తిసిక్ఖాపదేన నిస్సగ్గియం పాచిత్తియం, ఞాతకప్పవారితే విఞ్ఞాపేన్తస్స తేన సిక్ఖాపదేన అనాపత్తి, సతుప్పాదం కరోన్తస్స ఇమినా సిక్ఖాపదేన ఆపత్తి. ఓరేనద్ధమాసో సేసో గిమ్హానన్తి గిమ్హానస్స పచ్ఛిమద్ధమాసతో ఓరిమభాగే ఏకస్మిం అద్ధమాసే. కత్వా నివాసేయ్యాతి ఏత్థన్తరే ధమ్మేన ఉప్పన్నమ్పి కత్వా నివాసేన్తస్స నిస్సగ్గియం హోతి.

సావత్థియం ఛబ్బగ్గియే భిక్ఖూ ఆరబ్భ వస్సికసాటికపరియేసనవత్థుస్మిం పఞ్ఞత్తం, అసాధారణపఞ్ఞత్తి, అనాణత్తికం, తికపాచిత్తియం, ఊనకమాసద్ధమాసేసు అతిరేకసఞ్ఞినో వేమతికస్స వా దుక్కటం, తథా సతియా వస్సికసాటికాయ నగ్గస్స కాయం ఓవస్సాపయతో. పోక్ఖరణియాదీసు పన న్హాయన్తస్స వా అచ్ఛిన్నచీవరస్స వా నట్ఠచీవరస్స వా ‘‘అనివత్థం చోరా హరన్తీ’’తి ఏవం ఆపదాసు వా నివాసయతో ఉమ్మత్తకాదీనఞ్చ అనాపత్తి. ఏత్థ చ వస్సికసాటికాయ అత్తుద్దేసికతా, అసమయే పరియేసనతా, తాయ చ పటిలాభోతి ఇమాని తావ పరియేసనాపత్తియా తీణి అఙ్గాని. సచీవరతా, ఆపదాభావో, వస్సికసాటికాయ సకభావో, అసమయే నివాసనన్తి ఇమాని నివాసనాపత్తియా చత్తారి అఙ్గాని. సముట్ఠానాదీని ధోవాపనసిక్ఖాపదే వుత్తనయానేవాతి.

వస్సికసాటికసిక్ఖాపదవణ్ణనా నిట్ఠితా.