౭. విహారకారసిక్ఖాపదవణ్ణనా

సత్తమే మహల్లకన్తి ససామికభావేన సఞ్ఞాచితకుటితో మహన్తభావో ఏతస్స అత్థీతి మహల్లకో, యస్మా వా వత్థుం దేసాపేత్వా పమాణాతిక్కమేనాపి కాతుం వట్టతి, తస్మా పమాణమహన్తతాయపి మహల్లకో, తం మహల్లకం. యస్మా పనస్స తం పమాణమహన్తత్తం ససామికత్తావ లబ్భతి, తస్మా తదత్థదస్సనత్థం ‘‘మహల్లకో నామ విహారో ససామికో వుచ్చతీ’’తి ఏవమస్స పదభాజనే (పారా. ౩౬౭) వుత్తం. సేసం సబ్బం కుటికారసిక్ఖాపదే వుత్తసదిసం, ససామికభావమత్తమేవ హి విసేసో.

కోసమ్బియం ఛన్నత్థేరం ఆరబ్భ చేతియరుక్ఖం ఛేదాపనవత్థుస్మిం పఞ్ఞత్తభావో, అకిరియమత్తతో సముట్ఠానభావో, ఏకసఙ్ఘాదిసేసతా చ ఏత్థ విసేసో.

విహారకారసిక్ఖాపదవణ్ణనా నిట్ఠితా.