౩. దుట్ఠుల్లవాచాసిక్ఖాపదవణ్ణనా

తతియే ఓతిణ్ణతా చ విపరిణతచిత్తతా చ దుట్ఠుల్లవాచస్సాదరాగవసేన వేదితబ్బా. మాతుగామన్తి దుట్ఠుల్లాదుట్ఠుల్లసంలక్ఖణసమత్థం మనుస్సిత్థిం. దుట్ఠుల్లాహివాచాహీతి వచ్చమగ్గపస్సావమగ్గేమేథునధమ్మప్పటిసంయుత్తాహి వాచాహి. ఓభాసేయ్యాతి అవభాసేయ్య, వణ్ణావణ్ణయాచనఆయాచనపుచ్ఛనపటిపుచ్ఛనఆచిక్ఖణానుసాసనఅక్కోసనవసేన నానప్పకారం అసద్ధమ్మవచనం వదేయ్య. యథా తన్తి ఏత్థ న్తి నిపాతమత్తం, యథా యువా యువతిన్తి అత్థో. ఏతేన ఓభాసనే నిరాసఙ్కభావం దస్సేతి. మేథునుపసంహితాహీతిఇదం దుట్ఠుల్లవాచాయ సిఖాపత్తలక్ఖణదస్సనం. సఙ్ఘాదిసేసోతి ద్విన్నం మగ్గానం వసేన వణ్ణావణ్ణేహి వా మేథునయాచనాదీహి వా ‘‘సిఖరణీసి, సంభిన్నాసి, ఉభతోబ్యఞ్జనకాసీ’’తి ఇమేసు తీసు అఞ్ఞతరేన అక్కోసవచనేన వా మాతుగామం ఓభాసన్తస్స సఙ్ఘాదిసేసో నామ ఆపత్తినికాయో హోతీతి.

సావత్థియం ఉదాయిత్థేరం ఆరబ్భ దుట్ఠుల్లవాచాహి ఓభాసనవత్థుస్మిం పఞ్ఞత్తం, అసాధారణపఞ్ఞత్తి, అనాణత్తికం, ఇత్థియా ఇత్థిసఞ్ఞినో అన్తమసో హత్థముద్దాయపి వుత్తనయేన ఓభాసన్తస్స సచే సా తమత్థం తస్మింయేవ ఖణే జానాతి, సఙ్ఘాదిసేసో. పణ్డకే థుల్లచ్చయం. తస్మింయేవ ఇత్థిసఞ్ఞినో దుక్కటం. పునప్పునం ఓభాసన్తస్స, సమ్బహులా చ ఇత్థియో ఏకవాచాయ ఓభాసన్తస్స వాచాగణనాయ చేవ ఇత్థిగణనాయ చ ఆపత్తియో. సచే యం ఇత్థిం ఓభాసతి, సా న జానాతి, థుల్లచ్చయం. అధక్ఖకం ఉబ్భజాణుమణ్డలం ఆదిస్స వణ్ణాదిభణనేపి థుల్లచ్చయం. పణ్డకే దుక్కటం, ఉబ్భక్ఖకం అధోజాణుమణ్డలం కాయప్పటిబద్ధఞ్చ ఆదిస్స వణ్ణాదిభణనే సబ్బత్థ దుక్కటం. అత్థధమ్మఅనుసాసనిపురేక్ఖారానం ఉమ్మత్తకాదీనఞ్చ అనాపత్తి. సీలవిపత్తి, మనుస్సిత్థీ, ఇత్థిసఞ్ఞితా, దుట్ఠుల్లవాచస్సాదరాగో, తేన రాగేన ఓభాసనం, తఙ్ఖణవిజాననన్తి ఇమానేత్థ పఞ్చ అఙ్గాని. అదిన్నాదానసముట్ఠానం, కిరియం, సఞ్ఞావిమోక్ఖం, సచిత్తకం, లోకవజ్జం, కాయకమ్మం, వచీకమ్మం, అకుసలచిత్తం, ద్వివేదనన్తి.

దుట్ఠుల్లవాచాసిక్ఖాపదవణ్ణనా నిట్ఠితా.