౯. సోకావాససిక్ఖాపదవణ్ణనా

నవమే సోకావాసన్తి సఙ్కేతం కత్వా ఆగచ్ఛమానా పురిసానం అన్తోసోకం పవేసేతీతి సోకావాసా, తం సోకావాసం. అథ వా ఘరం వియ ఘరసామికా అయమ్పి పురిససమాగమం అలభమానా సోకం ఆవిసతి, ఇతి యం ఆవిసతి, స్వాస్సా ఆవాసో హోతీతి సోకావాసా. తేనేవస్స పదభాజనే (పాచి. ౧౧౬౦) ‘‘సోకావాసా నామ పరేసం దుక్ఖం ఉప్పాదేతి, సోకం ఆవిసతీ’’తి ద్విధా అత్థో వుత్తో. పాచిత్తియన్తి ఏవరూపం వుట్ఠాపేన్తియా వుత్తనయేనేవ కమ్మవాచాపరియోసానే ఉపజ్ఝాయాయ పాచిత్తియం.

సావత్థియం థుల్లనన్దం ఆరబ్భ ఏవరూపం సిక్ఖమానం వుట్ఠాపనవత్థుస్మిం పఞ్ఞత్తం. అజానన్తియా, ఉమ్మత్తికాదీనఞ్చ అనాపత్తి. సోకావాసతా, జాననం, వుట్ఠాపనన్తి ఇమానేత్థ తీణి అఙ్గాని. సముట్ఠానాదీని గబ్భినివుట్ఠాపనసదిసానేవాతి.

సోకావాససిక్ఖాపదవణ్ణనా నిట్ఠితా.