౧-౨-౩. పఠమకుమారిభూతాదిసిక్ఖాపదవణ్ణనా

కుమారిభూతవగ్గస్స పఠమదుతియతతియాని తీహి గిహిగతసిక్ఖాపదేహి సదిసానేవ. యా పన తా సబ్బపఠమా ద్వే మహాసిక్ఖమానా, తా అతిక్కన్తవీసతివస్సాతి వేదితబ్బా. తా హి గిహిగతా వా హోన్తు, అగిహిగతా వా, సమ్ముతికమ్మాదీసు ‘‘సిక్ఖమానా’’ఇచ్చేవ వత్తబ్బా, ‘‘గిహిగతా’’తి వా ‘‘కుమారిభూతా’’తి వా న వత్తబ్బా. గిహిగతాయ దసవస్సకాలే సిక్ఖాసమ్ముతిం దత్వా ద్వాదసవస్సకాలే ఉపసమ్పదా కాతబ్బా, ఏకాదసవస్సకాలే దత్వా తేరసవస్సకాలే కాతబ్బా, ద్వాదసతేరసచుద్దసపన్నరససోళససత్తరసఅట్ఠారసవస్సకాలే సిక్ఖాసమ్ముతిం దత్వా వీసతివస్సకాలే ఉపసమ్పదా కాతబ్బా. అట్ఠారసవస్సకాలతో పట్ఠాయ చ పనాయం ‘‘గిహిగతా’’తిపి ‘‘కుమారిభూతా’’తిపి వత్తుం వట్టతి. యా పనాయం ‘‘కుమారిభూతా’’తి వుత్తా సామణేరీ, సా ‘‘గిహిగతా’’తి న వత్తబ్బా, ‘‘కుమారిభూతా’’ఇచ్చేవ వత్తబ్బా. సిక్ఖాసమ్ముతిదానవసేన పన సబ్బాపి ‘‘సిక్ఖమానా’’తి వత్తుం వట్టతీతి.

పఠమకుమారిభూతాదిసిక్ఖాపదవణ్ణనా నిట్ఠితా.