౭. గబ్భినీవగ్గో

౧. గబ్భినీసిక్ఖాపదవణ్ణనా

గబ్భినివగ్గస్స పఠమే ‘‘గబ్భినీ’’తి జానిత్వా ఉపజ్ఝాయాయ వుట్ఠాపేన్తియా గణపరియేసనాదీసు చ ఞత్తికమ్మవాచాద్వయే చ దుక్కటం, కమ్మవాచాపరియోసానే పాచిత్తియం.

సావత్థియం సమ్బహులా భిక్ఖునియో ఆరబ్భ గబ్భినిం వుట్ఠాపనవత్థుస్మిం పఞ్ఞత్తం, గబ్భినియా వేమతికాయ అగబ్భినియా గబ్భినిసఞ్ఞాయ చేవ వేమతికాయ చ దుక్కటం. ఉభోసు అగబ్భినిసఞ్ఞాయ, ఉమ్మత్తికాదీనఞ్చ అనాపత్తి. గబ్భినితా, ‘గబ్భినీ’తి జాననం, వుట్ఠాపనన్తి ఇమానేత్థ తీణి అఙ్గాని. సముట్ఠానాదీని అదిన్నాదానసదిసాని, ఇదం పన పణ్ణత్తివజ్జం, తిచిత్తం, తివేదనన్తి.

గబ్భినీసిక్ఖాపదవణ్ణనా నిట్ఠితా.

౨. పాయన్తీసిక్ఖాపదవణ్ణనా

దుతియే పాయన్తిన్తి థఞ్ఞం పాయమానం, యం పాయేతి, తస్స మాతా వా, ధాతి వా. ఇదం వత్థుమత్తమేవేత్థ విసేసో, సేసం పఠమసిక్ఖాపదసదిసమేవాతి.

పాయన్తీసిక్ఖాపదవణ్ణనా నిట్ఠితా.

౩. పఠమసిక్ఖమానసిక్ఖాపదవణ్ణనా

తతియే ద్వే వస్సానీతి పవారణావసేన ద్వే సంవచ్ఛరాని. ఛసు ధమ్మేసూతి పాణాతిపాతావేరమణిఆదీసు వికాలభోజనావేరమణిపరియోసానేసు ఛసు సిక్ఖాపదేసు. అసిక్ఖితసిక్ఖన్తి పదభాజనే (పాచి. ౧౦౭౭) వుత్తనయేనేవ అదిన్నసిక్ఖం వా కుపితసిక్ఖం వా. సిక్ఖమానం వుట్ఠాపేయ్యాతి తేసు ఛసు ధమ్మేసు సిక్ఖనతో, తే వా సిక్ఖాసఙ్ఖాతే ధమ్మే మాననతో ఏవంలద్ధనామం అనుపసమ్పన్నం ఉపసమ్పాదేయ్య. పాచిత్తియన్తి పఠమసిక్ఖాపదే వుత్తనయేనేవ కమ్మవాచాపరియోసానే పాచిత్తియం.

సావత్థియం సమ్బహులా భిక్ఖునియో ఆరబ్భ ఏవరూపం సిక్ఖమానం వుట్ఠాపనవత్థుస్మిం పఞ్ఞత్తం, ధమ్మకమ్మే తికపాచిత్తియం, అధమ్మకమ్మే తికదుక్కటం. ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం వుట్ఠాపేన్తియా, ఉమ్మత్తికాదీనఞ్చ అనాపత్తి. వుత్తనయేన అసిక్ఖితసిక్ఖతా, ధమ్మకమ్మతా, కమ్మవాచాపరియోసానన్తి ఇమానేత్థ తీణి అఙ్గాని. సముట్ఠానాదీని పఠమే వుత్తనయానేవాతి.

పఠమసిక్ఖమానసిక్ఖాపదవణ్ణనా నిట్ఠితా.

౪. దుతియసిక్ఖమానసిక్ఖాపదవణ్ణనా

చతుత్థే సఙ్ఘేన అసమ్మతన్తి యస్సా సఙ్ఘేన అన్తమసో ఉపసమ్పదామాళకేపి పదభాజనే (పాచి. ౧౦౮౬) వుత్తా ఉపసమ్పదాసమ్ముతి న దిన్నా హోతి, తం ఇమా ద్వేపి మహాసిక్ఖమానా నామ. ఇధ సఙ్ఘేన సమ్మతం వుట్ఠాపేన్తియా, ఉమ్మత్తికాదీనఞ్చ అనాపత్తి. సేసం తతియే వుత్తసదిసమేవ, ఇదం పన కిరియాకిరియం హోతీతి.

దుతియసిక్ఖమానసిక్ఖాపదవణ్ణనా నిట్ఠితా.

౫. పఠమగిహిగతసిక్ఖాపదవణ్ణనా

పఞ్చమే గిహిగతన్తి పురిసన్తరగతం, ఇధాపి ఇదం వత్థుమత్తమేవ విసేసో. ఊనద్వాదసవస్సఞ్చ పరిపుణ్ణసఞ్ఞాయ వుట్ఠాపేన్తియా కిఞ్చాపి అనాపత్తి, సా పన అనుపసమ్పన్నావ హోతి. సేసం పఠమసిక్ఖాపదసదిసమేవాతి.

పఠమగిహిగతసిక్ఖాపదవణ్ణనా నిట్ఠితా.

౬-౭. దుతియతతియగిహిగతసిక్ఖాపదవణ్ణనా

ఛట్ఠే సబ్బం తతియే వుత్తనయేన. సత్తమేపి సబ్బం చతుత్థే వుత్తనయేనేవ వేదితబ్బన్తి.

దుతియతతియగిహిగతసిక్ఖాపదవణ్ణనా నిట్ఠితా.

౮. పఠమసహజీవినిసిక్ఖాపదవణ్ణనా

అట్ఠమే సహజీవినిన్తి సద్ధివిహారినిం. నేవ అనుగ్గణ్హేయ్యాతి సయం ఉద్దేసాదీహి నానుగ్గణ్హేయ్య. న అనుగ్గణ్హాపేయ్యాతి ‘‘ఇమిస్సా, అయ్యే, ఉద్దేసాదీని దేహీ’’తి ఏవం న అఞ్ఞాయ అనుగ్గణ్హాపేయ్య. పాచిత్తియన్తి ధురే నిక్ఖిత్తమత్తే పాచిత్తియం.

సావత్థియం థుల్లనన్దం ఆరబ్భ ఏవరూపే వత్థుస్మిం పఞ్ఞత్తం, సేసమేత్థ తువట్టవగ్గే దుక్ఖితసహజీవినిసిక్ఖాపదే వుత్తసదిసమేవాతి.

పఠమసహజీవినిసిక్ఖాపదవణ్ణనా నిట్ఠితా.

౯. నానుబన్ధనసిక్ఖాపదవణ్ణనా

నవమే వుట్ఠాపితం పవత్తినిన్తి వుట్ఠాపితం పవత్తినిం యాయ ఉపసమ్పాదితా, తం ఉపజ్ఝాయినిన్తి అత్థో. నానుబన్ధేయ్యాతి చుణ్ణేన మత్తికాయ దన్తకట్ఠేన ముఖోదకేనాతి ఏవం తేన తేన కరణీయేన న ఉపట్ఠహేయ్య. పాచిత్తియన్తి నానుబన్ధిస్సన్తి ధురే నిక్ఖిత్తమత్తే పాచిత్తియం.

సావత్థియం సమ్బహులా భిక్ఖునియో ఆరబ్భ నానుబన్ధనవత్థుస్మిం పఞ్ఞత్తం. బాలం పన అలజ్జినిం వా అననుబన్ధన్తియా, గిలానాయ, ఆపదాసు, ఉమ్మత్తికాదీనఞ్చ అనాపత్తి. వుట్ఠాపితప్పవత్తినితా, ద్వే వస్సాని అననుబన్ధనే ధురనిక్ఖేపో, అనుఞ్ఞాతకారణాభావోతి ఇమానేత్థ తీణి అఙ్గాని. సముట్ఠానాదీని పఠమపారాజికసదిసాని, ఇదం పన అకిరియం, దుక్ఖవేదనన్తి.

నానుబన్ధనసిక్ఖాపదవణ్ణనా నిట్ఠితా.

౧౦. దుతియసహజీవినిసిక్ఖాపదవణ్ణనా

దసమే నేవ వూపకాసేయ్యాతి న గహేత్వా గచ్ఛేయ్య. న వూపకాసాపేయ్యాతి ‘‘ఇమం, అయ్యే, గహేత్వా గచ్ఛాహీ’’తి అఞ్ఞం న ఆణాపేయ్య. పాచిత్తియన్తి ధురే నిక్ఖిత్తమత్తే పాచిత్తియం.

సావత్థియం థుల్లనన్దం ఆరబ్భ సహజీవినియా అవూపకాసనవత్థుస్మిం పఞ్ఞత్తం. సతి పన అన్తరాయే, పరియేసిత్వా దుతియికం అలభన్తియా, గిలానాయ, ఆపదాసు, ఉమ్మత్తికాదీనఞ్చ అనాపత్తి. సహజీవినితా, వూపకాసవూపకాసాపనే ధురనిక్ఖేపో, అనుఞ్ఞాతకారణాభావోతి ఇమానేత్థ తీణి అఙ్గాని. సముట్ఠానాదీని సమనుభాసనసదిసానీతి.

దుతియసహజీవినిసిక్ఖాపదవణ్ణనా నిట్ఠితా.

గబ్భినీవగ్గో సత్తమో.