౯. ఓవాదూపసఙ్కమనసిక్ఖాపదవణ్ణనా

నవమే అన్వద్ధమాసన్తి అద్ధమాసే అద్ధమాసే. ఉపోసథపుచ్ఛకన్తి ఉపోసథపుచ్ఛనం. ఓవాదూపసఙ్కమనన్తి ఓవాదత్థాయ ఉపసఙ్కమనం. తం అతిక్కామేన్తియాతి ఏత్థ భిక్ఖునీహి తేరసే వా చాతుద్దసే వా ఆరామం గన్త్వా ‘‘అయం ఉపోసథో చాతుద్దసో పన్నరసో’’తి పుచ్ఛితబ్బం, ఉపోసథదివసే నిదానవణ్ణనాయం వుత్తనయేన ఓవాదూపసఙ్కమనం యాచితబ్బం. యా భిక్ఖునీ వుత్తప్పకారే కాలే తదుభయం న కరోతి, సా తం అతిక్కామేతి నామ, తస్సా ‘‘ఉపోసథమ్పి న పుచ్ఛిస్సామి, ఓవాదమ్పి న యాచిస్సామీ’’తి ధురం నిక్ఖిత్తమత్తే పాచిత్తియం.

సావత్థియం సమ్బహులా భిక్ఖునియో ఆరబ్భ ఉపోసథఓవాదానం అపుచ్ఛనఅయాచనవత్థుస్మిం పఞ్ఞత్తం, అనాపత్తి అట్ఠమసదిసాయేవ. ఉపోసథోవాదానం అపుచ్ఛనఅయాచనాయం ధురనిక్ఖేపో, అనుఞ్ఞాతకారణాభావోతి ఇమానేత్థ ద్వే అఙ్గాని. సముట్ఠానాదీని సమనుభాసనసదిసానీతి.

ఓవాదూపసఙ్కమనసిక్ఖాపదవణ్ణనా నిట్ఠితా.