౭. అపవారణాసిక్ఖాపదవణ్ణనా

సత్తమే వస్సంవుట్ఠాతి పురిమం వా పచ్ఛిమం వా తేమాసం వుట్ఠా. ఉభతోసఙ్ఘేతి భిక్ఖునిసఙ్ఘే చేవ భిక్ఖుసఙ్ఘే చ. అయం పనేత్థ వినిచ్ఛయకథా – భిక్ఖునీహి చాతుద్దసేయేవ సన్నిపతిత్వా ‘‘సుణాతు మే, అయ్యే, సఙ్ఘో, అజ్జ పవారణా చాతుద్దసీ, యది సఙ్ఘస్స పత్తకల్లం, సఙ్ఘో పవారేయ్యా’’తి ఏవం సబ్బసఙ్గాహికఞత్తిం వా, ‘‘తేవాచికం పవారేయ్యా’’తి ఏవం తేవాచికఞత్తిం వా, సతి అన్తరాయే ‘‘ద్వేవాచికం, ఏకవాచికం, సమానవస్సికం పవారేయ్యా’’తి ఏవం ద్వేవాచికాదిఞత్తిం వా ఠపేత్వా సబ్బసఙ్గాహికఞత్తి చే ఠపితా, ‘‘సఙ్ఘం, అయ్యే, పవారేమి దిట్ఠేన వా సుతేన వా పరిసఙ్కాయ వా, వదన్తు మం అయ్యాయో అనుకమ్పం ఉపాదాయ, పస్సన్తీ పటికరిస్సామీ’’తి (చూళవ. ౪౨౭) ఏవం సకిం వా, ‘‘దుతియమ్పి, అయ్యే, సఙ్ఘం…పే… తతియమ్పి, అయ్యే, సఙ్ఘం…పే… పటికరిస్సామీ’’తి ఏవం ద్వత్తిక్ఖత్తుం వా వత్వా పటిపాటియా పవారేతబ్బం. తేవాచికాయ ఞత్తియా వచనం న హాపేతబ్బం, ద్వేవాచికాదీసు వడ్ఢేతుం వట్టతి, హాపేతుం న వట్టతి. ఏవం భిక్ఖునిసఙ్ఘే పవారేత్వా తత్థేవ ఏకా భిక్ఖునీ భిక్ఖునిక్ఖన్ధకే (చూళవ. ౪౨౭) వుత్తేన ఞత్తిదుతియకమ్మేన భిక్ఖునిసఙ్ఘస్సత్థాయ భిక్ఖుసఙ్ఘం పవారేతుం సమ్మన్నితబ్బా. తాయ సమ్మతాయ భిక్ఖునియా పన్నరసే భిక్ఖునిసఙ్ఘం ఆదాయ భిక్ఖుసఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా అఞ్జలిం పగ్గహేత్వా ఏవమస్స వచనీయో ‘‘భిక్ఖునిసఙ్ఘో అయ్య భిక్ఖుసఙ్ఘం పవారేతి దిట్ఠేన వా సుతేన వా పరిసఙ్కాయ వా, వదతాయ్య భిక్ఖుసఙ్ఘో భిక్ఖునిసఙ్ఘం అనుకమ్పం ఉపాదాయ, పస్సన్తో పటికరిస్సతి, దుతియమ్పి అయ్య…పే… తతియమ్పి అయ్య…పే… పస్సన్తో పటికరిస్సతీ’’తి ఏవం పవారేతబ్బం.

సచే పఞ్చవగ్గో భిక్ఖునిసఙ్ఘో న పూరతి, చతూహి వా తీహి వా గణఞత్తిం ఠపేత్వా, ద్వీహి వినా ఞత్తియా అఞ్ఞమఞ్ఞం పవారేతబ్బం. ఏకాయ ‘‘అజ్జ మే పవారణా’’తి అధిట్ఠాతబ్బం.

విహారం పన గన్త్వా ‘‘భిక్ఖునియో, అయ్య, భిక్ఖుసఙ్ఘం పవారేన్తి దిట్ఠేన వా సుతేన వా పరిసఙ్కాయ వా, వదతాయ్య భిక్ఖుసఙ్ఘో భిక్ఖునియో అనుకమ్పం ఉపాదాయ, పస్సన్తియో పటికరిస్సన్తీ’’తి చ, ‘‘అహం, అయ్య, భిక్ఖుసఙ్ఘం పవారేమి దిట్ఠేన వా సుతేన వా పరిసఙ్కాయ వా, వదతు మం, అయ్య, భిక్ఖుసఙ్ఘో అనుకమ్పం ఉపాదాయ, పస్సన్తీ పటికరిస్సామీ’’తి చ ఏవం తిక్ఖత్తుం వత్తబ్బం.

సచే భిక్ఖుసఙ్ఘో న పూరతి, ‘‘భిక్ఖునిసఙ్ఘో, అయ్య, అయ్యే పవారేతి దిట్ఠేన వా సుతేన వా పరిసఙ్కాయ వా, వదన్తు అయ్యా భిక్ఖునిసఙ్ఘం అనుకమ్పం ఉపాదాయ, పస్సన్తో పటికరిస్సతీ’’తి చ, ‘‘భిక్ఖునిసఙ్ఘో, అయ్య, అయ్యం పవారేతి దిట్ఠేన వా సుతేన వా పరిసఙ్కాయ వా, వదతాయ్యో భిక్ఖునిసఙ్ఘం అనుకమ్పం ఉపాదాయ, పస్సన్తో పటికరిస్సతీ’’తి చ ఏవం తిక్ఖత్తుం వత్తబ్బం.

ఉభిన్నం అపరిపూరియా ‘‘భిక్ఖునియో, అయ్యా, అయ్యే పవారేన్తి దిట్ఠేన వా సుతేన వా పరిసఙ్కాయ వా, వదన్తాయ్యా భిక్ఖునియో అనుకమ్పం ఉపాదాయ, పస్సన్తియో పటికరిస్సన్తీ’’తి చ, ‘‘భిక్ఖునియో, అయ్య, అయ్యం పవారేన్తి దిట్ఠేన వా సుతేన వా పరిసఙ్కాయ వా, వదతాయ్యో భిక్ఖునియో అనుకమ్పం ఉపాదాయ, పస్సన్తియో పటికరిస్సన్తీ’’తి చ, ‘‘అహం, అయ్యా, అయ్యే పవారేమి దిట్ఠేన వా సుతేన వా…పే… వదన్తు మం, అయ్యా, అనుకమ్పం ఉపాదాయ, పస్సన్తీ పటికరిస్సామీ’’తి చ, ‘‘అహం, అయ్య, అయ్యం పవారేమి దిట్ఠేన వా సుతేన వా…పే… వదతు మం, అయ్యో, అనుకమ్పం ఉపాదాయ, పస్సన్తీ పటికరిస్సామీ’’తి చ ఏవం తిక్ఖత్తుం వత్తబ్బం. సబ్బాహేవ హి ఇమినా నయేన ఉభతోసఙ్ఘే పవారితా హోతి, యా పన వస్సంవుట్ఠా ‘‘ఉభతోసఙ్ఘే ఏవం న పవారేస్సామీ’’తి ధురం నిక్ఖిపతి, తస్సా సహ ధురనిక్ఖేపేన పాచిత్తియం.

సావత్థియం సమ్బహులా భిక్ఖునియో ఆరబ్భ వస్సం వసిత్వా న పవారణావత్థుస్మిం పఞ్ఞత్తం. అన్తరాయే పన సతి, పరియేసిత్వా భిక్ఖూ అలభన్తియా, గిలానాయ, ఆపదాసు, ఉమ్మత్తికాదీనఞ్చ అనాపత్తి. వస్సంవుట్ఠతా, న ఉభతోసఙ్ఘే పవారణా, అనుఞ్ఞాతకారణాభావోతి ఇమానేత్థ తీణి అఙ్గాని. సముట్ఠానాదీని సమనుభాసనసదిసానీతి.

అపవారణాసిక్ఖాపదవణ్ణనా నిట్ఠితా.