౫. చీవరసఙ్కమనీయసిక్ఖాపదవణ్ణనా

పఞ్చమే చీవరసఙ్కమనీయన్తి సఙ్కమేతబ్బం చీవరం, అఞ్ఞిస్సా సన్తకం అనాపుచ్ఛా గహితం పున పటిదాతబ్బం పఞ్చన్నం అఞ్ఞతరం చీవరన్తి అత్థో. ధారేయ్యాతి సచే తం నివాసేతి వా పారుపతి వా పాచిత్తియం.

సావత్థియం అఞ్ఞతరం భిక్ఖునిం ఆరబ్భ భిక్ఖునియా చీవరం ఆదాయ అనాపుచ్ఛా పారుపనవత్థుస్మిం పఞ్ఞత్తం, తికపాచిత్తియం, అనుపసమ్పన్నాయ తికదుక్కటం. యా పన తాయ వా దిన్నం, తం వా ఆపుచ్ఛా, అచ్ఛిన్ననట్ఠచీవరికా వా హుత్వా, ‘‘ఇదం మే చీవరం మహగ్ఘం ఈదిసే చోరభయే న సక్కా ధారేతు’’న్తి ఏవరూపాసు ఆపదాసు వా ధారేతి, తస్సా, ఉమ్మత్తికాదీనఞ్చ అనాపత్తి. చీవరసఙ్కమనీయతా, ఉపసమ్పన్నాయ సన్తకతా, అనుఞ్ఞాతకారణాభావో, ధారణన్తి ఇమానేత్థ చత్తారి అఙ్గాని. సముట్ఠానాదీని పఠమకథినసదిసాని, ఇదం పన కిరియాకిరియన్తి.

చీవరసఙ్కమనీయసిక్ఖాపదవణ్ణనా నిట్ఠితా.