౭. ఆమకధఞ్ఞసిక్ఖాపదవణ్ణనా

సత్తమే విఞ్ఞత్వాతి అన్తమసో మాతరమ్పి యాచిత్వా. భుఞ్జేయ్యాతి అజ్ఝోహరేయ్య. ఏత్థ చ విఞ్ఞత్తి చేవ భోజనఞ్చ పమాణం, తస్మా సయం విఞ్ఞత్వా అఞ్ఞాయ భజ్జనాదీని కారాపేత్వా వా, అఞ్ఞాయ విఞ్ఞాపేత్వా సయం భజ్జనాదీని కత్వా వా పటిగ్గహణతో పట్ఠాయ యావ దన్తేహి సంఖాదనం, తావ పుబ్బప్పయోగేసు దుక్కటాని, అజ్ఝోహారే అజ్ఝోహారే పాచిత్తియం.

సావత్థియం సమ్బహులా భిక్ఖునియో ఆరబ్భ ఆమకధఞ్ఞం విఞ్ఞాపనవత్థుస్మిం పఞ్ఞత్తం, సయం వా అఞ్ఞాయ వా అవిఞ్ఞత్తియా లద్ధం భజ్జనాదీని కత్వా వా కారేత్వా వా భుఞ్జన్తియా దుక్కటం, అఞ్ఞాయ విఞ్ఞత్తియా లద్ధం పన సయం భజ్జనాదీని కత్వాపి కారేత్వాపి భుఞ్జన్తియా దుక్కటమేవ. ఆబాధే సతి సేదకమ్మాదీనం అత్థాయ విఞ్ఞాపేన్తియా, అవిఞ్ఞత్తియా లబ్భమానం నవకమ్మత్థాయ సమ్పటిచ్ఛన్తియా, ఞాతకప్పవారితట్ఠానే ముగ్గమాసాదిఅపరణ్ణం విఞ్ఞాపేన్తియా, ఉమ్మత్తికాదీనఞ్చ అనాపత్తి. సత్తన్నం ధఞ్ఞానం అఞ్ఞతరస్స విఞ్ఞాపనం వా విఞ్ఞాపాపనం వా, పటిలాభో, భజ్జనాదీని కత్వా వా కారేత్వా వా అజ్ఝోహరణన్తి ఇమానేత్థ తీణి అఙ్గాని. సముట్ఠానాదీని అద్ధానమగ్గసిక్ఖాపదసదిసానీతి.

ఆమకధఞ్ఞసిక్ఖాపదవణ్ణనా నిట్ఠితా.