౪. అఞ్ఞవిఞ్ఞాపనసిక్ఖాపదవణ్ణనా

చతుత్థే విఞ్ఞాపేత్వాతి జానాపేత్వా, ‘‘ఇదం నామ ఆహరా’’తి యాచిత్వా వా. అఞ్ఞం విఞ్ఞాపేయ్యాతి యం పుబ్బే ‘‘కిన్తే, అయ్యే, అఫాసు, కిం ఆహరియతూ’’తి వుత్తాయ విఞ్ఞాపితం, తం పటిక్ఖిపిత్వా తఞ్చేవ అఞ్ఞఞ్చ గహేతుకామా తతో అఞ్ఞం విఞ్ఞాపేయ్య, తస్సా విఞ్ఞత్తియా దుక్కటం, పటిలాభేన నిస్సగ్గియం హోతి.

సావత్థియం థుల్లనన్దం ఆరబ్భ అఞ్ఞం విఞ్ఞాపేత్వా అఞ్ఞం విఞ్ఞాపనవత్థుస్మిం పఞ్ఞత్తం, తికపాచిత్తియం, అనఞ్ఞే ద్వికదుక్కటం. అనఞ్ఞే అనఞ్ఞసఞ్ఞాయ పన, తస్మిం అప్పహోన్తే పున తఞ్ఞేవ, అఞ్ఞేనపి అత్థే సతి తేన సద్ధిం అఞ్ఞఞ్చ, యఞ్చ విఞ్ఞత్తం, తతో చే అఞ్ఞం సమగ్ఘతరం హోతి, ఇమం ఆనిసంసం దస్సేత్వా సుద్ధం అఞ్ఞమేవ చ విఞ్ఞాపేన్తియా, ఉమ్మత్తికాదీనఞ్చ అనాపత్తి. లేసేన గహేతుకామతా, అఞ్ఞస్స విఞ్ఞాపనం, పటిలాభోతి ఇమానేత్థ తీణి అఙ్గాని. సముట్ఠానాదీని సఞ్చరిత్తసదిసానీతి.

అఞ్ఞవిఞ్ఞాపనసిక్ఖాపదవణ్ణనా నిట్ఠితా.