౯. యథాకమ్మూపగతఞాణకథావణ్ణనా

౩౭౭. దిబ్బేన చక్ఖునా యథాకమ్మూపగే సత్తే పజానాతీతి యథాకమ్మూపగతఞాణస్స ఉపనిస్సయే దిబ్బచక్ఖుమ్హి కరణనిద్దేసో కతో, న యథాకమ్మూపగతజాననకిచ్చకే. తంకిచ్చకేయేవ పన పరో కరణనిద్దేసం మఞ్ఞతీతి ఆహ ‘‘అయోనిసో గహేత్వా’’తి. యథాకమ్మూపగతఞాణమేవ దిబ్బచక్ఖున్తి లద్ధీతి ఇమినా వచనేన దిబ్బచక్ఖుమేవ యథాకమ్మూపగతఞాణన్తి ఏవం భవితబ్బం. ఏవ-సద్దో చ అట్ఠానే ఠితో దిబ్బచక్ఖుసద్దస్స పరతో యోజేతబ్బో. యథాకమ్మూపగతఞాణస్స హి సో దిబ్బచక్ఖుతో అత్థన్తరభావం నివారేతి. న హి దిబ్బచక్ఖుస్స యథాకమ్మూపగతఞాణతోతి.

యథాకమ్మూపగతఞాణకథావణ్ణనా నిట్ఠితా.