౧. బలకథావణ్ణనా

౩౫౪. ఇన్ద్రియపరోపరియత్తం అసాధారణన్తి యథా నిద్దేసతో విత్థారతో సబ్బం సబ్బాకారం ఠానాట్ఠానాదిం అజానన్తాపి ‘‘అట్ఠానమేతం అనవకాసో, యం దిట్ఠిసమ్పన్నో పుగ్గలో కఞ్చి సఙ్ఖారం నిచ్చతో ఉపగచ్ఛేయ్యా’’తిఆదినా (అ. ని. ౧.౨౬౮) ఠానాట్ఠానాని ఉద్దేసతో సఙ్ఖేపతో సావకా జానన్తి, న ఏవం ‘‘ఆసయం జానాతి అనుసయం జానాతీ’’తిఆదినా (పటి. మ. ౧.౧౧౩) ఉద్దేసమత్తేనపి ఇన్ద్రియపరోపరియత్తం జానన్తీతి ‘‘అసాధారణ’’న్తి ఆహ. థేరేన పన సద్ధాదీనం ఇన్ద్రియానం తిక్ఖముదుభావజాననమత్తం సన్ధాయ ‘‘సత్తానం ఇన్ద్రియపరోపరియత్తం యథాభూతం పజానామీ’’తి (పటి. మ. ౨.౪౪) వుత్తం, న యథావుత్తం ఇన్ద్రియపరోపరియత్తఞాణం తథాగతబలన్తి అయమేత్థ అధిప్పాయో దట్ఠబ్బో. ‘‘ఉద్దేసతో ఠానాట్ఠానాదిమత్తజాననవసేన పటిజానాతీ’’తి వుత్తం, ఏవం పన పటిజానన్తేన ‘‘తథాగతబలం సావకసాధారణ’’న్తి ఇదమ్పి ఏవమేవ పటిఞ్ఞాతం సియాతి కథమయం చోదేతబ్బో సియా.

౩౫౬. సేసేసు పటిక్ఖేపో సకవాదిస్స ఠానాట్ఠానఞాణాదీనం సాధారణాసాధారణత్తా తత్థ సాధారణపక్ఖం సన్ధాయాతి అధిప్పాయో.

బలకథావణ్ణనా నిట్ఠితా.