౬. నకులపితుసుత్తవణ్ణనా

౧౬. ఛట్ఠే విసభాగవేదనుప్పత్తియా కకచేనేవ చతుఇరియాపథం ఛిన్దన్తో ఆబాధయతీతి ఆబాధో, సో యస్స అత్థీతి ఆబాధికో. తంసముట్ఠానదుక్ఖేన దుక్ఖితో. అధిమత్తగిలానోతి ధాతుసఙ్ఖయేన పరిక్ఖీణసరీరో.

సప్పటిభయకన్తారసదిసా సోళసవత్థుకా అట్ఠవత్థుకా చ విచికిచ్ఛా తిణ్ణా ఇమాయాతి తిణ్ణవిచికిచ్ఛా. విగతా సముచ్ఛిన్నా పవత్తిఆదీసు ‘‘ఏవం ను ఖో న ను ఖో’’తి ఏవం పవత్తికా కథంకథా అస్సాతి విగతకథంకథా. సారజ్జకరానం పాపధమ్మానం పహీనత్తా రాగవిక్ఖేపేసు సీలాదిగుణేసు చ తిట్ఠకత్తా వేసారజ్జం, విసారదభావం వేయ్యత్తియం పత్తాతి వేసారజ్జప్పత్తా. అత్తనా ఏవ పచ్చక్ఖతో దిట్ఠత్తా న పరం పచ్చేతి, నస్స పరో పచ్చేతబ్బో అత్థీతి అపరప్పచ్చయా.

గిలానా వుట్ఠితోతి గిలానభావతో వుట్ఠాయ ఠితో. భావప్పధానో హి అయం నిద్దేసో. గిలానో హుత్వా వుట్ఠితోతి ఇదం పన అత్థమత్తనిదస్సనం.

నకులపితుసుత్తవణ్ణనా నిట్ఠితా.