(౭) ౨. సఞ్ఞావగ్గో

౧-౫. సఞ్ఞాసుత్తాదివణ్ణనా

౬౧-౬౫. దుతియస్స పఠమే ‘‘మహప్ఫలా మహానిసంసా’’తి ఉభయమ్పేతం అత్థతో ఏకం, బ్యఞ్జనమేవ నానన్తి ఆహ ‘‘మహప్ఫలా’’తిఆది. ‘‘పఞ్చిమే గహపతయో ఆనిసంసా’’తిఆదీసు (ఉదా. ౭౬) ఆనిసంస-సద్దో ఫలపరియాయోపి హోతి. మహతో లోకుత్తరస్స సుఖస్స పచ్చయా హోన్తీతి మహానిసంసా. అమతోగధాతి అమతబ్భన్తరా అమతం అనుప్పవిట్ఠా నిబ్బానదిట్ఠత్తా, తతో పరం న గచ్ఛన్తి. తేన వుత్తం ‘‘అమతపరియోసానా’’తి. అమతం పరియోసానం అవసానం ఏతాసన్తి అమతపరియోసానా. మరణసఞ్ఞాతి మరణానుపస్సనాఞాణేన సఞ్ఞా. ఆహారే పటికూలసఞ్ఞాతి ఆహారం గమనాదివసేన పటికూలతో పరిగ్గణ్హన్తస్స ఉప్పన్నసఞ్ఞా. ఉక్కణ్ఠితస్సాతి నిబ్బిన్దన్తస్స కత్థచిపి అసజ్జన్తస్స. దుతియాదీని ఉత్తానత్థానేవ.

సఞ్ఞాసుత్తాదివణ్ణనా నిట్ఠితా.

౬-౧౦. సాజీవసుత్తాదివణ్ణనా

౬౬-౭౦. ఛట్ఠే సహ ఆజీవన్తి ఏత్థాతి సాజీవో, పఞ్హస్స పుచ్ఛనం విస్సజ్జనఞ్చ. తేనాహ ‘‘సాజీవోతి పఞ్హపుచ్ఛనఞ్చేవ పఞ్హవిస్సజ్జనఞ్చా’’తిఆది. అభిసఙ్ఖతన్తి చితం. సత్తమాదీని ఉత్తానత్థానేవ.

సాజీవసుత్తాదివణ్ణనా నిట్ఠితా.

సఞ్ఞావగ్గవణ్ణనా నిట్ఠితా.