౩. సఙ్గారవసుత్తవణ్ణనా

౧౯౩. తతియే (సం. ని. టీ. ౨.౫.౨౩౬) పఠమఞ్ఞేవాతి పురేతరంయేవ, అసజ్ఝాయకతానం మన్తానం అప్పటిభానం పగేవ పఠమంయేవ సిద్ధం, తత్థ వత్తబ్బమేవ నత్థీతి అధిప్పాయో. పరియుట్ఠానం నామ అభిభవో గహణన్తి ఆహ ‘‘కామరాగపరియుట్ఠితేనాతి కామరాగగ్గహితేనా’’తి. విక్ఖమ్భేతి అపనేతీతి విక్ఖమ్భనం, పటిపక్ఖతో నిస్సరతి ఏతేనాతి నిస్సరణం. విక్ఖమ్భనఞ్చ తం నిస్సరణఞ్చాతి విక్ఖమ్భననిస్సరణం. తేనాహ ‘‘తత్థా’’తిఆది. సేసపదద్వయేపి ఏసేవ నయో. అత్తనా అరణీయో పత్తబ్బో అత్థో అత్తత్థో. తథా పరత్థో వేదితబ్బో.

‘‘అనిచ్చతో అనుపస్సన్తో నిచ్చసఞ్ఞం పజహతీ’’తిఆదీసు (పటి. మ. ౧.౫౨) బ్యాపాదాదీనం అనాగతత్తా బ్యాపాదవారే తదఙ్గనిస్సరణం న గహితం. కిఞ్చాపి న గహితం, పటిసఙ్ఖానవసేన తస్స వినోదేతబ్బతాయ తదఙ్గనిస్సరణమ్పి లబ్భతేవాతి సక్కా విఞ్ఞాతుం. ఆలోకసఞ్ఞా ఉపచారప్పత్తా వా అప్పనాప్పత్తా వా. యో కోచి కసిణజ్ఝానాదిభేదో సమథో. ధమ్మవవత్థానం ఉపచారప్పనాప్పత్తవసేన గహేతబ్బం.

కుధితోతి తత్తో. ఉస్సూరకజాతోతి తస్సేవ కుధితభావస్స ఉస్సూరకం అచ్చుణ్హతం పత్తో. తేనాహ ‘‘ఉసుమకజాతో’’తి. తిలబీజకాదిభేదేనాతి తిలబీజకణ్ణికకేసరాదిభేదేన సేవాలేన. పణకేనాతి ఉదకపిచ్ఛిల్లేన. అప్పసన్నో ఆకులతాయ. అసన్నిసిన్నో కలలుప్పత్తియా. అనాలోకట్ఠానేతి ఆలోకరహితే ఠానే.

సఙ్గారవసుత్తవణ్ణనా నిట్ఠితా.