౮. చవనసుత్తవణ్ణనా

౮. అట్ఠమే సద్ధాయాతి ఇమినా అధిగమసద్ధా దస్సితా. చతుబ్బిధా హి సద్ధా – ఆగమనీయసద్ధా, అధిగమసద్ధా, పసాదసద్ధా, ఓకప్పనసద్ధాతి. తత్థ ఆగమనీయసద్ధా సబ్బఞ్ఞుబోధిసత్తానం పవత్తా హోతి. ఆగమనీయప్పటిపదాయ ఆగతా హి సద్ధా సాతిసయా మహాబోధిసత్తానం పరోపదేసేన వినా సద్ధేయ్యవత్థుం అవిపరీతతో గహేత్వా అధిముచ్చనతో. సచ్చప్పటివేధతో ఆగతసద్ధా అధిగమసద్ధా సుప్పబుద్ధాదీనం వియ. ‘‘సమ్మాసమ్బుద్ధో భగవా’’తిఆదినా బుద్ధాదీసు ఉప్పజ్జనకప్పసాదో పసాదసద్ధా మహాకప్పినరాజాదీనం వియ. ‘‘ఏవమేత’’న్తి ఓక్కన్దిత్వా పక్ఖన్దిత్వా సద్దహనవసేన కప్పనం ఓకప్పనం, తదేవ సద్ధాతి ఓకప్పనసద్ధా. తత్థ పసాదసద్ధా పరనేయ్యరూపా హోతి, సవనమత్తేనపి పసీదనతో. ఓకప్పనసద్ధా సద్ధేయ్యం వత్థుం ఓగాహిత్వా అనుపవిసిత్వా ‘‘ఏవమేత’’న్తి పచ్చక్ఖం కరోన్తీ వియ పవత్తతి.

చవనసుత్తవణ్ణనా నిట్ఠితా.