౯. గిహిసుత్తవణ్ణనా

౧౭౯. నవమే ఆభిచేతసికానన్తి అభిచేతోతి అభిక్కన్తం విసుద్ధచిత్తం వుచ్చతి అధిచిత్తం వా, అభిచేతసి జాతాని ఆభిచేతసికాని, అభిచేతో సన్నిస్సితానీతి వా ఆభిచేతసికాని. తేనేవాహ ‘‘ఉత్తమచిత్తనిస్సితాన’’న్తి. దిట్ఠధమ్మసుఖవిహారానన్తి దిట్ఠధమ్మే సుఖవిహారానం. దిట్ఠధమ్మోతి పచ్చక్ఖో అత్తభావో వుచ్చతి, తత్థ సుఖవిహారానన్తి అత్థో. రూపావచరజ్ఝానానమేతం అధివచనం. తాని హి అప్పేత్వా నిసిన్నా ఝాయినో ఇమస్మింయేవ అత్తభావే అసంకిలిట్ఠం నేక్ఖమ్మసుఖం విన్దన్తి, తస్మా ‘‘దిట్ఠధమ్మసుఖవిహారానీ’’తి వుచ్చన్తి.

చతుబ్బిధమేరయన్తి పుప్ఫాసవో, ఫలాసవో, గుళాసవో, మధ్వాసవోతి ఏవం చతుప్పభేదం మేరయం. పఞ్చవిధఞ్చ సురన్తి పూవసురా, పిట్ఠసురా, ఓదనసురా, కిణ్ణపక్ఖిత్తా, సమ్భారసంయుత్తాతి ఏవం పఞ్చప్పభేదం సురం. పుఞ్ఞం అత్థో ఏతస్సాతి పుఞ్ఞత్థో. యస్మా పనేస పుఞ్ఞేన అత్థికో నామ హోతి, తస్మా వుత్తం ‘‘పుఞ్ఞేన అత్థికస్సా’’తి. సేసమేత్థ ఉత్తానమేవ.

గిహిసుత్తవణ్ణనా నిట్ఠితా.