౩-౪. పఠమఖతసుత్తాదివణ్ణనా

౩-౪. తతియే కలిన్తి అపరాధం. విచినాతీతి ఆచినోతి పసవతి. తేన చ కలినా సుఖం న పటిలభతీతి తేన అపరాధేన సుఖం న విన్దతి. నిన్దియప్పసంసాయ హి పసంసియనిన్దాయ చ సమకోవ విపాకో. పసంసియనిన్దాతి చ సమ్పన్నగుణపరిధంసనవసేన పవత్తియా మహాసావజ్జతాయ కటుకతరవిపాకా. నిన్దియప్పసంసా పన కథం తాయ సమవిపాకాతి చే? తస్మిం అవిజ్జమానగుణసమారోపనేన అత్తనో పరేసఞ్చ మిచ్ఛాపటిపత్తిహేతుభావతో పసంసియేన తస్స సబ్భావకరణతో చ. లోకేపి హి అసూరం సూరేన సమం కరోన్తో గారయ్హో హోతి, పగేవ దుప్పటిపన్నం సుప్పటిపన్నేన సమం కరోన్తోతి. సకేన ధనేనాతి అత్తనో సాపతేయ్యేన. అప్పమత్తకోవ కలీతి దిట్ఠధమ్మికత్తా సప్పటికారత్తా చ అప్పమత్తకో అపరాధో. అయం…పే… మహన్తతరో కలి కతూపచితత్తా సమ్పరాయికత్తా అప్పటికారత్తా చ.

నిరబ్బుదోతి గణనావిసేసో ఏసోతి ఆహ ‘‘నిరబ్బుదగణనాయా’’తి, సతసహస్సం నిరబ్బుదాతి అత్థో. నిరబ్బుదపరిమాణం పన వస్సగణనాయ ఏవం వేదితబ్బం. యథేవ హి సతం సతసహస్సానం కోటి హోతి, ఏవం సతం సతసహస్సానం కోటియో పకోటి నామ హోతి, సతం సతసహస్సానం పకోటియో కోటిపకోటి, సతం సతసహస్సకోటిపకోటియో నహుతం, సతం సతసహస్సనహుతాని నిన్నహుతం, సతం సతసహస్సనిన్నహుతాని ఏకం అబ్బుదం, తతో వీసతిగుణితం నిరబ్బుదం. యం అరియే గరహన్తో నిరయం ఉపపజ్జతీతి అరియే గరహన్తో యం నిరబ్బుదసఙ్ఖాతం నిరయం ఉపపజ్జతి, నిరబ్బుదోతి చ పాటియేక్కో నిరయో నత్థి, అవీచిమ్హియేవ పన నిరబ్బుదగణనాయ పచ్చితబ్బట్ఠానస్సేతం నామం. చతుత్థం ఉత్తానమేవ.

పఠమఖతసుత్తాదివణ్ణనా నిట్ఠితా.