(౧౩) ౩. భయవగ్గో

౧. అత్తానువాదసుత్తవణ్ణనా

౧౨౧. తతియస్స పఠమే అత్తానం అనువదన్తస్స ఉప్పజ్జనకభయన్తి అత్తానం అనువదన్తస్స పాపకమ్మినో ఉప్పజ్జనకభయం. ద్వత్తింసకమ్మకారణే పటిచ్చ ఉప్పజ్జనకభయన్తి అగారికానం వసేన వుత్తం, అనగారికానం పన వినయదణ్డం పటిచ్చ ఉప్పజ్జనకభయమ్పి దణ్డభయన్తేవ సఙ్ఖం గచ్ఛతి. సేసం సువిఞ్ఞేయ్యమేవ.

అత్తానువాదసుత్తవణ్ణనా నిట్ఠితా.

౨. ఊమిభయసుత్తవణ్ణనా

౧౨౨. దుతియే కోధూపాయాసస్సేతం అధివచనన్తి ఏత్థ కుజ్ఝనట్ఠేన కోధో, స్వేవ చిత్తస్స కాయస్స చ అతిప్పమద్దనమథనుప్పాదనేహి దళ్హఆయాసట్ఠేన ఉపాయాసో. అనేకవారం పవత్తిత్వా అత్తనా సమవేతం సత్తం అజ్ఝోత్థరిత్వా సీసం ఉక్ఖిపితుం అదత్వా ఊమిసదిసతా దట్ఠబ్బా. యథా హి బాహిరం ఉదకం ఓతిణ్ణో ఊమీసు ఓసీదిత్వా మరతి, ఏవం ఇమస్మిం సాసనే కోధూపాయాసే ఓసీదిత్వా విబ్భమతి, తస్మా కోధూపాయాసో ‘‘ఊమిభయ’’న్తి వుత్తో. ఓదరికత్తస్సేతం అధివచనన్తి యథా హి బాహిరం ఉదకం ఓతిణ్ణో కుమ్భీలేన ఖాదితో మరతి, ఏవం ఇమస్మిం సాసనే ఓదరికత్తేన ఓదరికభావేన ఆమిసగేధేన మిచ్ఛాజీవేన జీవికకప్పనేన నాసితసీలాదిగుణతాయ ఖాదితధమ్మసరీరో విబ్భమతి, తస్మా ఓదరికత్తం ‘‘కుమ్భీలభయ’’న్తి వుత్తం.

అనుపట్ఠితాయ సతియాతి కాయగతం సతిం అనుట్ఠాపేత్వా. అసంవుతేహీతి అపిహితేహి. పఞ్చన్నేతం కామగుణానం అధివచనన్తి యథా హి బాహిరం ఉదకం ఓతిణ్ణో ఆవట్టే నిముజ్జిత్వా మరతి, ఏవం ఇమస్మిం సాసనే పబ్బజితో పఞ్చకామగుణావట్టే నిముజ్జిత్వా విబ్భమతి. కామరాగాభిభూతో హి సత్తో ఇతో చ ఏత్తో, ఏత్తో చ ఇతోతి ఏవం మనాపియరూపాదివిసయసఙ్ఖాతే ఆవట్టే అత్తానం సంసారేత్వా యథా తతో బహిభూతే నేక్ఖమ్మే చిత్తమ్పి న ఉప్పాదేతి, ఏవం ఆవట్టేత్వా బ్యసనాపాదనేన కామగుణానం ఆవట్టసదిసతా దట్ఠబ్బా.

అనుద్ధంసేతీతి కిలమేతి విలోలతి. రాగానుద్ధంసితేనాతి రాగేన అనుద్ధంసితేన. మాతుగామస్సేతం అధివచనన్తి. యథా హి బాహిరం ఉదకం ఓతిణ్ణో చణ్డమచ్ఛం ఆగమ్మ లద్ధప్పహారో మరతి, ఏవం ఇమస్మిం సాసనే మాతుగామం ఆరబ్భ ఉప్పన్నకామరాగో విబ్భమతి, తస్మా మాతుగామో ‘‘సుసుకాభయ’’న్తి వుత్తో. మాతుగామో హి యోనిసోమనసికారరహితం అధీరపురిసం ఇత్థికుత్తభూతేహి అత్తనో హాసభావవిలాసేహి అభిభుయ్య గహేత్వా ధీరజాతికమ్పి అత్తనో రూపాదీహి సమ్పలోభనవసేన అనవసేసం అత్తనో ఉపకారధమ్మే సీలాదికే సమ్పాదేతుం అసమత్థం కరోన్తో అనయబ్యసనం పాపేతి.

ఇమాని పన చత్తారి భయాని భాయిత్వా యథా ఉదకం అనోరోహన్తస్స ఉదకం నిస్సాయ ఉదకపిపాసావినయనం సరీరసుద్ధిపరిళాహూపసమో కాయఉతుగ్గాహాపనన్తి, ఏవమాది ఆనిసంసో నత్థి, ఏవమేవం ఇమాని చత్తారి భయాని భాయిత్వా సాసనే అపబ్బజన్తస్సపి ఇమం సాసనం నిస్సాయ సఙ్ఖేపతో వట్టదుక్ఖూపసమో, విత్థారతో పన సీలానిసంసాదివసేన అనేకవిధో ఆనిసంసో నత్థి. యథా పన ఇమాని చత్తారి భయాని అభాయిత్వా ఉదకం ఓరోహన్తస్స వుత్తప్పకారో ఆనిసంసో హోతి, ఏవం ఇమాని అభాయిత్వా సాసనే పబ్బజన్తస్సపి వుత్తప్పకారో ఆనిసంసో హోతి. మహాధమ్మరక్ఖితత్థేరో పనాహ ‘‘చత్తారి భయాని భాయిత్వా ఉదకం అనోతరన్తో సోతం ఛిన్దిత్వా పరతీరం పాపుణితుం న సక్కోతి, అభాయిత్వా ఓతరన్తో సక్కోతి, ఏవమేవం భాయిత్వా సాసనే అపబ్బజన్తోపి తణ్హాసోతం ఛిన్దిత్వా నిబ్బానపారం దట్ఠుం న సక్కోతి, అభాయిత్వా పబ్బజన్తో సక్కోతీ’’తి.

ఊమిభయసుత్తవణ్ణనా నిట్ఠితా.

౩. పఠమనానాకరణసుత్తవణ్ణనా

౧౨౩. తతియే బ్రహ్మకాయికానం దేవానన్తి ఏత్థ బ్రహ్మానం కాయో సమూహోతి బ్రహ్మకాయో, తప్పరియాపన్నతాయ తత్థ గతాతి బ్రహ్మకాయికా. ఏతాయ చ సబ్బస్సపి బ్రహ్మకాయస్స సమఞ్ఞాయ భవితబ్బం. ఆభస్సరానం దేవానన్తిఆదినా పన దుతియజ్ఝానభూమికాదీనం ఉపరి గహితత్తా గోబలీబద్దఞ్ఞాయేన తదవసిట్ఠానం అయం సమఞ్ఞా, తస్మా ‘‘బ్రహ్మకాయికానం దేవాన’’న్తి పఠమజ్ఝానభూమికానంయేవ గహణం వేదితబ్బం. సహ బ్యయతి గచ్ఛతీతి సహబ్యో, సహవత్తనకో. తస్స భావో సహబ్యతా, సహపవత్తీతి ఆహ ‘‘సహభావం ఉపగచ్ఛతీ’’తి. కప్పో ఆయుప్పమాణన్తి ఏత్థ యదిపి బ్రహ్మపారిసజ్జాదీనం ఆయునో అన్తరం అత్థి, ఉక్కట్ఠపరిచ్ఛేదేన పనేతం వుత్తన్తి దస్సేన్తో ‘‘పఠమజ్ఝానం అత్థి హీన’’న్తిఆదిమాహ.

ద్వే కప్పా ఆయుప్పమాణన్తి ఏత్థ పన హీనజ్ఝానేన నిబ్బత్తానం వసేన అయం పరిచ్ఛేదో కతోతి దస్సేతుం ‘‘దుతియజ్ఝానం వుత్తనయేనేవ తివిధం హోతీ’’తిఆది ఆరద్ధం. చత్తారో కప్పాతి ఏత్థ పన ఉక్కట్ఠపరిచ్ఛేదేన చతుసట్ఠి కప్పా వత్తబ్బాతి దస్సేన్తో ‘‘యం హేట్ఠా వుత్తం ‘కప్పో ద్వే కప్పా’తి, కమ్పి ఆహరిత్వా అత్థో వేదితబ్బో’’తి ఆహ. కథం పనేత్థ అయమత్థో లబ్భతీతి ఆహ ‘‘కప్పోతి చ గుణస్సపి నామ’’న్తి. తత్థ పఠమం వుత్తో కప్పో, తతో ఏకేన గుణేన, ఏకస్మిం వారే గణనాయాతి అత్థో. ద్వే కప్పా హోన్తీతి ఏకవారగణనాయ కప్పస్స ద్విగుణితత్తా ద్వే మహాకప్పా హోన్తీతి అత్థో. దుతియేనాతి దుతియవారగణనాయ. చత్తారోతి దుతియవారగణనాయ ద్వీసు కప్పేసు ద్విగుణితేసు చత్తారో మహాకప్పా హోన్తీతి అత్థో. పున తే చత్తారో కప్పాతి వుత్తనయేన ద్వే వారే గుణేత్వా యే చత్తారో కప్పా దస్సితా, పున తే చత్తారో కప్పా చతుగ్గుణా హోన్తీతి అత్థో. ఇదం వుత్తం హోతి – ద్వే వారే గుణేత్వా యే చత్తారో కప్పా దస్సితా, తేసు చతుక్ఖత్తుం గుణితేసు చతుసట్ఠి కప్పా సమ్పజ్జన్తీతి. తథా హి చత్తారో ఏకస్మిం వారే గుణితా అట్ఠ హోన్తి, పున తే అట్ఠ దుతియవారే గుణితా సోళస హోన్తి, పున తే సోళస తతియవారే గుణితా ద్వత్తింస హోన్తి, పున తే ద్వత్తింస చతుత్థవారే గుణితా చతుసట్ఠి హోన్తి. తేనేవాహ ‘‘ఇమేహి చతూహి గుణేహి గుణితా ఏకేన గుణేన అట్ఠ హోన్తీ’’తిఆది. ఏత్థ చ హేట్ఠా ఉపోసథసుత్తే (అ. ని. ౩.౭౧) –

‘‘యాని మానుసకాని పఞ్ఞాస వస్సాని, చాతుమహారాజికానం దేవానం ఏసో ఏకో రత్తిన్దివో’’తి –

ఆదినా కామావచరదేవానమేవ ఆయుప్పమాణం దస్సితం. హేట్ఠాయేవ –

‘‘తయోమే, భిక్ఖవే, పుగ్గలా సన్తో సంవిజ్జమానా లోకస్మిం. కతమే తయో? ఇధ, భిక్ఖవే, ఏకచ్చో పుగ్గలో సబ్బసో రూపసఞ్ఞానం సమతిక్కమా…పే… ఆకాసానఞ్చాయతనూపగానం దేవానం సహబ్యతం ఉపపజ్జతి. ఆకాసానఞ్చాయతనూపగానం, భిక్ఖవే, దేవానం వీసతి కప్పసహస్సాని ఆయుప్పమాణ’’న్తి (అ. ని. ౩.౧౧౭) –

ఆదినా అరూపావచరానంయేవ ఆయుప్పమాణం వుత్తం. ఇధ పన రూపావచరానమేవ ఆయుప్పమాణం దస్సితం. విభఙ్గపాళియం (విభ. ౧౦౨౨) పన ‘‘మనుస్సానం కిత్తకం ఆయుప్పమాణం, వస్ససతం అప్పం వా భియ్యో’’తిఆదినా దేవమనుస్సానఞ్చేవ రూపారూపావచరసత్తానఞ్చ ఆయుప్పమాణం దస్సితం.

తత్థ సమ్మాసమ్బుద్ధేన మనుస్సానం దేవానఞ్చ ఆయుం పరిచ్ఛిన్దమానేన చతూసు అపాయేసు భుమ్మదేవేసు చ ఆయు న పరిచ్ఛిన్నం. తం కస్మాతి? నిరయే తావ కమ్మమేవ పమాణం. యావ కమ్మం న ఖీయతి, తావ పచ్చన్తి. తథా సేసఅపాయేసు. భుమ్మదేవానమ్పి కమ్మమేవ పమాణం. తత్థ నిబ్బత్తా హి కేచి సత్తాహమత్తం తిట్ఠన్తి, కేచి అడ్ఢమాసం, కప్పం తిట్ఠమానాపి అత్థియేవ. తత్థ మనుస్సేసు గిహిభావే ఠితాయేవ సోతాపన్నాపి హోన్తి, సకదాగామిఫలం అనాగామిఫలం అరహత్తమ్పి పాపుణన్తి, తేసు సోతాపన్నాదయో యావజీవం తిట్ఠన్తి, ఖీణాసవా పన పరినిబ్బాయన్తి వా పబ్బజన్తి వా. కస్మా? అరహత్తం నామ సేట్ఠగుణం, గిహిలిఙ్గం హీనం, తం హీనతాయ ఉత్తమం గుణం ధారేతుం న సక్కోతి, తస్మా తే పరినిబ్బాతుకామా వా హోన్తి పబ్బజితుకామా వా. భుమ్మదేవా పన అరహత్తం పత్తాపి యావజీవం తిట్ఠన్తి, ఛసు కామావచరేసు దేవేసు సోతాపన్నసకదాగామినో యావజీవం తిట్ఠన్తి, అనాగామినా రూపభవం గన్తుం వట్టతి ఖీణాసవేన పరినిబ్బాతుం. కస్మా? నిలీయనోకాసస్స అభావా. రూపావచరారూపావచరేసు సబ్బేపి యావజీవం తిట్ఠన్తి, తత్థ రూపావచరే నిబ్బత్తా సోతాపన్నసకదాగామినో న పున ఇధాగచ్ఛన్తి, తత్థేవ పరినిబ్బాయన్తి. ఏతే హి ఝానఅనాగామినో నామ.

అట్ఠసమాపత్తిలాభీనం పన కిం నియమేతి? పగుణజ్ఝానం. యదేవస్స పగుణం హోతి, తేన ఉపపజ్జతి. సబ్బేసు పగుణేసు కిం నియమేతి? నేవసఞ్ఞానాసఞ్ఞాయతనసమాపత్తి. ఏకంసేనేవ హి సో నేవసఞ్ఞానాసఞ్ఞాయతనే ఉపపజ్జతి. నవసు బ్రహ్మలోకేసు నిబ్బత్తఅరియసావకానం తత్రూపపత్తిపి ఉపరూపపత్తిపి, న హేట్ఠూపపత్తి. పుథుజ్జనానం పన తత్రూపపత్తిపి హోతి, ఉపరూపపత్తిపి, హేట్ఠూపపత్తిపి. పఞ్చసు సుద్ధావాసేసు చతూసు చ అరూపేసు అరియసావకానం తత్రూపపత్తిపి హోతి ఉపరూపపత్తిపి. పఠమజ్ఝానభూమియం నిబ్బత్తో అనాగామీ నవ బ్రహ్మలోకే సోధేత్వా మత్థకే ఠితో పరినిబ్బాతి. వేహప్ఫలం, అకనిట్ఠం, నేవసఞ్ఞానాసఞ్ఞాయతనన్తి ఇమే తయో దేవలోకా సేట్ఠభవా నామ. ఇమేసు తీసు ఠానేసు నిబ్బత్తఅనాగామినో నేవ ఉద్ధం గచ్ఛన్తి, న అధో, తత్థ తత్థేవ పరినిబ్బాయన్తీతి ఇదం పకిణ్ణకం వేదితబ్బం.

పఠమనానాకరణసుత్తవణ్ణనా నిట్ఠితా.

౪-౬. దుతియనానాకరణసుత్తాదివణ్ణనా

౧౨౪-౬. చతుత్థే తే ధమ్మేతి తే ‘‘రూపగత’’న్తిఆదినా నయేన వుత్తే రూపాదయో ధమ్మే. అనిచ్చతోతి ఇమినా నిచ్చప్పటిక్ఖేపతో తేసం అనిచ్చతమాహ, తతో ఏవ చ ఉదయవయవన్తతో విపరిణామతో తావకాలికతో చ తే అనిచ్చాతి జోతితం హోతి. యఞ్హి నిబ్బత్తం హోతి, తం ఉదయవయపరిచ్ఛిన్నం. జరాయ మరణేన చ తదేవ విపరీతం, ఇత్తరక్ఖణమేవ చ హోతీతి. దుక్ఖతోతి ఇమినా సుఖప్పటిక్ఖేపతో తేసం దుక్ఖతమాహ. తతో ఏవ చ అభిణ్హప్పటిపీళనతో దుక్ఖవత్థుతో చ తే దుక్ఖాతి జోతితం హోతి. ఉదయవయవన్తతాయ హి తే అభిణ్హప్పటిపీళనతో నిరన్తరదుక్ఖతాయ దుక్ఖస్సేవ చ అధిట్ఠానభూతా. పచ్చయయాపనీయతాయ రోగమూలతాయ చ రోగతో. దుక్ఖతాసూలయోగతో కిలేసాసుచిపగ్ఘరణతో ఉప్పాదజరాభఙ్గేహి ఉద్ధుమాతపరిపక్కపభిన్నతో చ గణ్డతో. పీళాజననతో, అన్తోతుదనతో, దున్నీహరణతో చ సల్లతో. అవడ్ఢిఆవహనతో అఘవత్థుతో చ అఘతో. అసేరిభావజననతో ఆబాధపదట్ఠానతాయ చ ఆబాధతో. అవసవత్తనతో అవిధేయ్యతాయ చ పరతో. బ్యాధిజరామరణేహి పలుజ్జనీయతాయ పలోకతో. సామినివాసికారకవేదకఅధిట్ఠాయకవిరహతో సుఞ్ఞతో. అత్తప్పటిక్ఖేపట్ఠేన అనత్తతో. రూపాదిధమ్మా హి న ఏత్థ అత్తా అత్థీతి అనత్తా. ఏవం సయమ్పి అత్తా న హోన్తీతి అనత్తా. తేన అబ్యాపారతో నిరీహతో తుచ్ఛతో అనత్తాతి దీపితం హోతి. లక్ఖణత్తయమేవ సుఖావబోధనత్థం ఏకాదసహి పదేహి విభజిత్వా గహితన్తి దస్సేతుం ‘‘తత్థా’’తిఆది వుత్తం. పఞ్చమఛట్ఠాని ఉత్తానత్థానేవ.

దుతియనానాకరణసుత్తాదివణ్ణనా నిట్ఠితా.

౭. పఠమతథాగతఅచ్ఛరియసుత్తవణ్ణనా

౧౨౭. సత్తమే వత్తమానసమీపే వత్తమానే వియ వోహరితబ్బన్తి ‘‘ఓక్కమతీ’’తి ఆహ ‘‘ఓక్కన్తో హోతీతి అత్థో’’తి. దససహస్సచక్కవాళపత్థరణో సముజ్జలభావేన ఉళారో. దేవానుభావన్తి దేవానం పభానుభావం. దేవానఞ్హి పభం సో ఓభాసో అధిభవతి, న దేవే. తేనాహ ‘‘దేవాన’’న్తిఆది. రుక్ఖగచ్ఛాదినా కేనచి న హఞ్ఞతీతి అఘా, అసమ్బాధా. తేనాహ ‘‘నిచ్చవివరా’’తి. అసంవుతాతి హేట్ఠా ఉపరి కేనచి అపిహితా. తేనాహ ‘‘హేట్ఠాపి అప్పతిట్ఠా’’తి. తత్థ పి-సద్దేన యథా హేట్ఠా ఉదకస్స పిధాయికా సన్ధారికా పథవీ నత్థి అసంవుతా లోకన్తరికా, ఏవం ఉపరిపి చక్కవాళేసు దేవవిమానానం అభావతో అసంవుతా అప్పతిట్ఠాతి దస్సేతి. అన్ధకారో ఏత్థ అత్థీతి అన్ధకారా. చక్ఖువిఞ్ఞాణం న జాయతి ఆలోకస్స అభావతో, న చక్ఖునో. తథా హి ‘‘తేనోభాసేన అఞ్ఞమఞ్ఞం సఞ్జానన్తీ’’తి వుత్తం. జమ్బుదీపే ఠితమజ్ఝన్హికవేలాయ పుబ్బవిదేహవాసీనం అత్థఙ్గమవసేన ఉపడ్ఢం సూరియమణ్డలం పఞ్ఞాయతి, అపరగోయానవాసీనం ఉగ్గమనవసేన. ఏవం సేసదీపేసుపీతి ఆహ ‘‘ఏకప్పహారేనేవ తీసు దీపేసు పఞ్ఞాయన్తీ’’తి. ఇతో అఞ్ఞథా ద్వీసు ఏవ దీపేసు పఞ్ఞాయన్తి. ఏకేకాయ దిసాయ నవనవయోజనసతసహస్సాని అన్ధకారవిధమనమ్పి ఇమినావ నయేన దట్ఠబ్బం. పభాయ నప్పహోన్తీతి అత్తనో పభాయ ఓభాసితుం నాభిసమ్భుణన్తి. యుగన్ధరపబ్బతమత్థకసమప్పమాణే ఆకాసే విచరణతో ‘‘చక్కవాళపబ్బతస్స వేమజ్ఝేన చరన్తీ’’తి వుత్తం.

బ్యావటాతి ఖాదనత్థం గణ్హితుం ఉపక్కమన్తా. విపరివత్తిత్వాతి వివట్టిత్వా. ఛిజ్జిత్వాతి ముచ్ఛాపవత్తియా ఠితట్ఠానతో ముచ్చిత్వా, అఙ్గపచ్చఙ్గఛేదనవసేన వా ఛిజ్జిత్వా. అచ్చన్తఖారేతి ఆతపసన్తపాభావేన అతిసీతభావం సన్ధాయ అచ్చన్తఖారతా వుత్తా సియా. న హి తం కప్పసణ్ఠానఉదకం సమ్పత్తికరమహామేఘవుట్ఠం పథవిసన్ధారకం కప్పవినాసకఉదకం వియ ఖారం భవితుమరహతి, తథా సతి పథవీపి విలీయేయ్య, తేసం వా పాపకమ్మఫలేన పేతానం పకతిఉదకస్స పుబ్బఖేళభావాపత్తి వియ తస్స ఉదకస్స ఖారభావాపత్తి హోతీతి వుత్తం ‘‘అచ్చన్తఖారే ఉదకే’’తి.

పఠమతథాగతఅచ్ఛరియసుత్తవణ్ణనా నిట్ఠితా.

౮. దుతియతథాగతఅచ్ఛరియసుత్తవణ్ణనా

౧౨౮. అట్ఠమే ఆలీయన్తి ఆరమితబ్బట్ఠేన సేవీయన్తీతి ఆలయా, పఞ్చ కామగుణా. ఆరమన్తీతి రతిం విన్దన్తి కీళన్తి లళన్తి. ఆలీయన్తి వా అల్లీయన్తా అభిరమణవసేన సేవన్తీతి ఆలయా, తణ్హావిచరితాని. తేహి ఆలయేహి రమన్తీతి ఆలయారామా. యథేవ హి సుసజ్జితం పుప్ఫఫలభరితరుక్ఖాదిసమ్పన్నఉయ్యానం పవిట్ఠో రాజా తాయ సమ్పత్తియా రమతి, సమ్ముదితో ఆమోదితప్పమోదితో హోతి, న ఉక్కణ్ఠేతి, సాయమ్పి నిక్ఖమితుం న ఇచ్ఛతి, ఏవమిమేహి కామాలయతణ్హాలయేహి సత్తా రమన్తి, సంసారవట్టే పముదితా అనుక్కణ్ఠితా వసన్తి. తేన తేసం భగవా దువిధమ్పి ఆలయం ఉయ్యానభూమిం వియ దస్సేన్తో ‘‘ఆలయారామా’’తిఆదిమాహ. సేసమేత్థ ఉత్తానమేవ.

దుతియతథాగతఅచ్ఛరియసుత్తవణ్ణనా నిట్ఠితా.

౯-౧౦. ఆనన్దఅచ్ఛరియసుత్తాదివణ్ణనా

౧౨౯-౧౩౦. నవమే పటిసన్థారధమ్మన్తి పకతిచారిత్తవసేన వుత్తం, ఉపగతానం పన భిక్ఖూనం భిక్ఖునీనఞ్చ పుచ్ఛావిస్సజ్జనవసేన చేవ చిత్తరుచివసేన చ యథాకాలం ధమ్మం దేసేతియేవ, ఉపాసకఉపాసికానం పన ఉపనిసిన్నకకథావసేన. దసమం ఉత్తానమేవ.

ఆనన్దఅచ్ఛరియసుత్తాదివణ్ణనా నిట్ఠితా.

భయవగ్గవణ్ణనా నిట్ఠితా.