౪. ఉదకరహదసుత్తవణ్ణనా

౧౦౪. చతుత్థే ఉదకరహదో జణ్ణుకమత్తేపి ఉదకే సతి పణ్ణరససమ్భిన్నవణ్ణత్తా వా బహలత్తా వా ఉదకస్స అపఞ్ఞాయమానతలో ఉత్తానో గమ్భీరోభాసో నామ హోతీతి ఆహ ‘‘పురాణపణ్ణరస…పే… గమ్భీరోభాసో నామా’’తి. తిపోరిసచతుపోరిసే పన ఉదకే సతి అచ్ఛత్తా ఉదకస్స పఞ్ఞాయమానతలో గమ్భీరో ఉత్తానోభాసో నామ హోతీతి ఆహ ‘‘అచ్ఛవిప్పసన్నమణివణ్ణఉదకో ఉత్తానోభాసో నామా’’తి. ఉభయకారణసమ్భవతో పన ఇతరే ద్వే వేదితబ్బా. పుగ్గలేపి కిలేసుస్సదభావతో గుణగమ్భీరతాయ చ అభావతో గుణగమ్భీరానం సదిసేహి అభిక్కమనాదీహి యుత్తో ఉత్తానో గమ్భీరోభాసో నామ. ఇమినా నయేన సేసా వేదితబ్బా.

ఉదకరహదసుత్తవణ్ణనా నిట్ఠితా.