(౧౦) ౫. అసురవగ్గో
౧-౨. అసురసుత్తాదివణ్ణనా
౯౧-౯౨. పఞ్చమస్స పఠమదుతియాని ఉత్తానత్థానేవ.
అసురసుత్తాదివణ్ణనా నిట్ఠితా.
౩. దుతియసమాధిసుత్తవణ్ణనా
౯౩. తతియే అప్పటివానీతి భావప్పధానో నిద్దేసోతి ఆహ ‘‘అనివత్తనతా’’తి. ‘‘అప్పటివానితా’’తి వత్తబ్బే ‘‘అప్పటివానీ’’తి వుత్తం. తథా హి వీరియప్పవాహే వత్తమానే అన్తరా ఏవ పటిగమనం నివత్తనం పటివానం, తం అస్స అత్థీతి పటివానీ, న పటివానీ అప్పటివానీ, తస్స భావో అప్పటివానితా, అనివత్తనాతి అత్థో. అప్పటివానీతి వా ఇత్థిలిఙ్గవసేనేవాయం నిద్దేసో. అన్తరాయేవ పటిగమనం నివత్తనం పటివానీ, న పటివానీ అప్పటివానీ, అనివత్తనాతి అత్థో.
దుతియసమాధిసుత్తవణ్ణనా నిట్ఠితా.
౪. తతియసమాధిసుత్తవణ్ణనా
౯౪. చతుత్థే సణ్ఠపేతబ్బన్తి సమ్మదేవ ఠపేతబ్బం. యథా పన ఠపితం సణ్ఠపితం హోతి, తం దస్సేతుం ‘‘సన్నిసాదేతబ్బ’’న్తిఆది వుత్తం. తత్థ సన్నిసాదేతబ్బన్తి సమాధిప్పటిపక్ఖే కిలేసే సన్నిసీదాపేన్తేన చిత్తం గోచరజ్ఝత్తే సన్నిసీదాపేతబ్బన్తి. ఏకోది కాతబ్బన్తి అబ్యగ్గభావాపాదనేన ఏకగ్గం కాతబ్బం. సమాదహితబ్బన్తి యథా ఆరమ్మణే సుట్ఠు అప్పితం హోతి, ఏవం సమ్మా సమ్మదేవ ఆదహితబ్బం, సుట్ఠు ఆరోపేతబ్బం సమాహితం కాతబ్బన్తి అత్థో.
తతియసమాధిసుత్తవణ్ణనా నిట్ఠితా.
౫-౬. ఛవాలాతసుత్తాదివణ్ణనా
౯౫-౯౬. పఞ్చమే ఛవాలాతన్తి ఛవానం దడ్ఢట్ఠానే అలాతం. తేనేవాహ ‘‘సుసానే అలాత’’న్తి. మజ్ఝట్ఠానే గూథమక్ఖితన్తి పమాణేన అట్ఠఙ్గులమత్తం ద్వీసు ఠానేసు ఆదిత్తం మజ్ఝే గూథమక్ఖితం. కట్ఠత్థన్తి కట్ఠేన కాతబ్బకిచ్చం. సేసమేత్థ ఉత్తానమేవ. ఛట్ఠం ఉత్తానమేవ.
ఛవాలాతసుత్తాదివణ్ణనా నిట్ఠితా.
౭-౧౦. ఖిప్పనిసన్తిసుత్తాదివణ్ణనా
౯౭-౧౦౦. సత్తమే ఖిప్పనిసన్తీతి ఖిప్పపఞ్ఞో. తేనాహ ‘‘ఖిప్పనిసామనో’’తిఆది. అనురూపధమ్మన్తి లోకుత్తరాధిగమస్స అనుచ్ఛవికసభావం. కల్యాణా సున్దరా పరిమణ్డలపదబ్యఞ్జనా వాచా అస్సాతి కల్యాణవాచో. తేనాహ ‘‘సున్దరవచనో’’తి. కల్యాణం మధురం వాక్కరణం ఉదాహారఘోసో అస్సాతి కల్యాణవాక్కరణో. గుణపరిపుణ్ణభావేన పూరే పుణ్ణభావే భవాతి పోరీ, తాయ పోరియా. తేనాహ ‘‘గుణపరిపుణ్ణాయా’’తి. పురే భవత్తా పోరియా నాగరికిత్థియా సుఖుమాలత్తనేన సదిసాతి పోరీ, తాయ పోరియా. ‘‘సుఖుమాలత్తనేనా’’తి ఇమినా తస్సా వాచాయ ముదుసణ్హభావో వుత్తో. అపలిబుద్ధాయాతి పిత్తసేమ్హాదీహి న పలివేఠితాయ. అదోసాయాతి సన్దిద్ధవిలమ్బితాదిదోసరహితాయ అగళితపదబ్యఞ్జనాయాతి అపతితపదబ్యఞ్జనాయ అవిరహితపదబ్యఞ్జనాయ. ఉభయమేతం అనేలగలాయాతి ఇమస్సేవ అత్థవచనం. అనేలగలాయాతి హి అనేలాయ చేవ అగలాయ చాతి అత్థో. అత్థం విఞ్ఞాపేతుం సమత్థాయాతి ఆదిమజ్ఝపరియోసానం పాకటం కత్వా భాసితత్థస్స విఞ్ఞాపనసత్థాయ. అట్ఠమనవమదసమాని ఉత్తానత్థానేవ.
ఖిప్పనిసన్తిసుత్తాదివణ్ణనా నిట్ఠితా.
అసురవగ్గవణ్ణనా నిట్ఠితా.
దుతియపణ్ణాసకం నిట్ఠితం.