౪. నిగణ్ఠసుత్తవణ్ణనా

౭౫. చతుత్థే హంసవట్టకచ్ఛన్నేనాతి హంసవట్టకపరిచ్ఛన్నేన, హంసమణ్డలాకారేనాతి అత్థో. నత్థి ఏతస్స పరిసేసన్తి అపరిసేసం. తేనాహ ‘‘అప్పమత్తకమ్పి అసేసేత్వా’’తి. అపరిసేసధమ్మజాననతో వా అపరిసేససఙ్ఖాతం ఞాణదస్సనం పటిజానాతీతి ఏవమ్పేత్థ అత్థో దట్ఠబ్బో. సతతన్తి నిచ్చం. సమితన్తి తస్సేవ వేవచనన్తి ఆహ ‘‘సతతం సమితన్తి సబ్బకాలం నిరన్తర’’న్తి. అథ వా నిచ్చట్ఠేన సతత-సద్దేన అభిణ్హప్పవత్తి జోతితా సియాతి ‘‘సమిత’’న్తి వుత్తం. తేన నిరన్తరప్పవత్తిం దస్సేతీతి ఆహ ‘‘సబ్బకాలం నిరన్తర’’న్తి.

విసుద్ధిసమ్పాపనత్థాయాతి రాగాదీహి మలేహి అభిజ్ఝావిసమలోభాదీహి చ ఉపక్కిలిట్ఠచిత్తానం సత్తానం విసుద్ధిపాపనత్థాయ. సమతిక్కమనత్థాయాతి సోకస్స చ పరిదేవస్స చ పహానత్థాయ. అత్థం గమనత్థాయాతి కాయికదుక్ఖస్స చ చేతసికదోమనస్సస్స చాతి ఇమేసం ద్విన్నం అత్థఙ్గమనాయ, నిరోధాయాతి అత్థో. ఞాయతి నిచ్ఛయేన కమతి నిబ్బానం. తం వా ఞాయతి పటివిజ్ఝతి ఏతేనాతి ఞాయో, అరియమగ్గోతి ఆహ ‘‘మగ్గస్స అధిగమనత్థాయా’’తి. అపచ్చయనిబ్బానస్స సచ్ఛికరణత్థాయాతి పచ్చయరహితత్తా అపచ్చయస్స అసఙ్ఖతస్స తణ్హావానవిరహితత్తా నిబ్బానన్తి లద్ధనామస్స అమతస్స సచ్ఛికిరియాయ, అత్తపచ్చక్ఖతాయాతి వుత్తం హోతి. ఫుసిత్వా ఫుసిత్వాతి పత్వా పత్వా. సేసమేత్థ సువిఞ్ఞేయ్యమేవ.

నిగణ్ఠసుత్తవణ్ణనా నిట్ఠితా.