౩. అత్థవససుత్తవణ్ణనా

౪౩. తతియే అత్థో నామ ఫలం, తం ఏతస్స వసోతి అత్థవసో. హేతు, అత్థో ఏతస్స అత్థీతి అత్థో, సో ఏవాతి ఆహ ‘‘తయో అత్థే తీణి కారణానీ’’తి. ధమ్మదేసనా నామ ఉక్కట్ఠనిద్దేసేన చతున్నం అరియసచ్చానం పకాసనాతి ఆహ ‘‘చతుసచ్చధమ్మం పకాసేతీ’’తి. అట్ఠకథం ఞాణేన పటిసంవేదీతి పాళిపదానం అత్థం వివరణఞాణేన పటి పటి సంవేదనసీలో ‘‘అయం ఇమస్స భాసితస్స అత్థో’’తి. ఏతేన అత్థపటిసమ్భిదాబ్యాపారమాహ. పాళిధమ్మం పటిసంవేదీతి పాళిగతిం పాళిం పదవివరణం పటి పటి సంవేదనసీలో. ఏతేన ధమ్మపటిసమ్భిదాబ్యాపారమాహ.

అత్థవససుత్తవణ్ణనా నిట్ఠితా.