౨. గిలానసుత్తవణ్ణనా

౨౨. దుతియే హితానీతి భబ్యాని. వుద్ధికరానీతి ఆరోగ్యాదివుద్ధికరాని. అనుచ్ఛవికన్తి ఉపట్ఠానకిరియాయ అనురూపం. వాతాపమారరోగేనాతి వాతరోగేన చ అపమారరోగేన చ, వాతనిదానేన వా అపమారరోగేన. నిట్ఠప్పత్తగిలానోతి ‘‘ఇమినా రోగేన న చిరస్సేవ మరిస్సతీ’’తి నిట్ఠం పత్తో గిలానో. ఖిపితకం నామ వమథురోగో. కచ్ఛూతి థుల్లకచ్ఛుఆబాధో. తిణపుప్ఫకజరో విసమవాతసమ్ఫస్సజరోగో. యేసన్తి యేసం రోగానం. పటిజగ్గనేనాతి పటికారమత్తేన. ఫాసుకన్తి బ్యాధివూపసమనేన సరీరస్స ఫాసుభావో. బ్యాధినిదానసముట్ఠానజాననేన పణ్డితో, పటికారకిరియాయ యుత్తకారితాయ దక్ఖో, ఉట్ఠానవీరియసమ్పత్తియా అనలసో.

పదపరమో పుగ్గలో కథితో సమ్మత్తనియామోక్కమనస్స అయోగ్గభావతో. అలభన్తోవ తథాగతప్పవేదితం ధమ్మవినయం సవనాయ ఓక్కమతి నియామం కుసలేసు ధమ్మేసు సమ్మత్తం పచ్చేకబోధిం. యన్తి, యతో. ఓవాదం లభిత్వాతి ఆభిసమాచారికవత్తం ఓవాదమత్తం. ఏత్తకోపి హి తస్స హితావహోతి. తన్నిస్సితోవాతి విపఞ్చితఞ్ఞునిస్సితోవ హోతి. పునప్పునం దేసేతబ్బోవ సమ్మత్తనియామోక్కమనస్స యోగ్గభావతో.

గిలానసుత్తవణ్ణనా నిట్ఠితా.