(౧౩) ౩. కుసినారవగ్గో

౧-౨. కుసినారసుత్తాదివణ్ణనా

౧౨౪-౧౨౫. తతియస్స పఠమే తణ్హాగేధేన గథితోతి తణ్హాబన్ధనేన బద్ధో. తణ్హాముచ్ఛనాయాతి తణ్హాయ వసేన ముచ్ఛాపత్తియా. ముచ్ఛితోతి ముచ్ఛం మోహం పమాదం ఆపన్నో. అజ్ఝోపన్నోతి అధిఓపన్నో. తణ్హాయ అధిభవిత్వా అజ్ఝోత్థటో గిలిత్వా పరినిట్ఠపేత్వా వియ ఠితో. తేనాహ ‘‘అజ్ఝోపన్నోతి తణ్హాయ గిలిత్వా పరినిట్ఠపేత్వా పవత్తో’’తి. అనాదీనవదస్సావీతి గథితాదిభావేన పరిభోగే ఆదీనవమత్తమ్పి న పస్సతి. నిస్సరణపఞ్ఞోతి అయమత్థో ఆహారపరిభోగేతి తత్థ పయోజనపరిచ్ఛేదికా ‘‘యావదేవ ఇమస్స కాయస్స ఠితియా’’తిఆదినా (మ. ని. ౧.౨౩; ౨.౨౪; ౩.౭౫; సం. ని. ౪.౧౨౦; అ. ని. ౬.౫౮; ౮.౯) పవత్తా ఆహారపటిబద్ధఛన్దరాగనిస్సరణభూతా పఞ్ఞా అస్స అత్థీతి నిస్సరణపఞ్ఞో. సేసమేత్థ ఉత్తానమేవ. దుతియే నత్థి వత్తబ్బం.

కుసినారసుత్తాదివణ్ణనా నిట్ఠితా.

౩. గోతమకచేతియసుత్తవణ్ణనా

౧౨౬. తతియే సమ్బహులాతి పఞ్చసతమత్తా. పఞ్చసతా కిర బ్రాహ్మణా తిణ్ణం వేదానం పారగూ అపరభాగే భగవతో ధమ్మదేసనం సుత్వా కామేసు ఆదీనవం నేక్ఖమ్మే చ ఆనిసంసం పస్సమానా భగవతో సన్తికే పబ్బజిత్వా న చిరస్సేవ సబ్బం బుద్ధవచనం ఉగ్గణ్హిత్వా పరియత్తిం నిస్సాయ మానం ఉప్పాదేసుం – ‘‘యం యం భగవా కథేతి, తం తం మయం ఖిప్పమేవ జానామ. భగవా హి ఇత్థిలిఙ్గాదీని తీణి లిఙ్గాని, నామాదీని చత్తారి పదాని, పఠమాదయో సత్త విభత్తియో ముఞ్చిత్వా న కిఞ్చి కథేతి, ఏవం కథితే చ అమ్హాకం గణ్ఠిపదం నామ నత్థీ’’తి, తే భగవతి అగారవా హుత్వా తతో పట్ఠాయ భగవతో ఉపట్ఠానమ్పి ధమ్మస్సవనమ్పి అభిణ్హం న గచ్ఛన్తి. తే సన్ధాయ వుత్తం ‘‘సమ్బహులా కిర బ్రాహ్మణపబ్బజితా…పే… ధమ్మస్సవనం న గచ్ఛన్తీ’’తి. ముఖపటిఞ్ఞం గహేత్వాతి ‘‘సచ్చం కిర తుమ్హే, భిక్ఖవే’’తిఆదినా తమత్థం పటిపుచ్ఛిత్వా ‘‘సచ్చం భగవా’’తి తేహి భిక్ఖూహి వుత్తం పటివచనం గహేత్వా. తఞ్హి అత్తనో ముఖేనేవ పటిఞ్ఞాతత్తా ‘‘ముఖపటిఞ్ఞా’’తి వుచ్చతి.

నేవ ఆగతట్ఠానం న గతట్ఠానం అద్దసంసు. కస్మా? అఞ్ఞాణతో. తే కిర తస్స సుత్తస్స అత్థం న జానింసు. తేసఞ్హి తస్మిం సమయే విచిత్రనయం దేసనావిలాసయుత్తమ్పి తం సుత్తం ఘనపుథులేన దుస్సపట్టేన ముఖం బద్ధం కత్వా పురతో ఠపితమనుఞ్ఞభోజనం వియ అహోసి. నను చ భగవా అత్తనా దేసితం ధమ్మం పరే ఞాపేతుం కప్పసతసహస్సాధికాని చత్తారి అసఙ్ఖేయ్యాని పారమియో పూరేత్వా సబ్బఞ్ఞుతం పత్తో, సో కస్మా యథా తే న జానన్తి, తథా దేసేతీతి? తేసం మానభఞ్జనత్థం. భగవా హి ‘‘అభబ్బా ఇమే ఇమం మానఖిలం అనుపహచ్చ మగ్గం వా ఫలం వా సచ్ఛికాతు’’న్తి తేసం సుతపరియత్తిం నిస్సాయ ఉప్పన్నం అట్ఠుప్పత్తిం కత్వా దేసనాకుసలో మానభఞ్జనత్థం ‘‘సబ్బధమ్మమూలపరియాయ’’న్తిఆదినా మూలపరియాయసుత్తం (మ. ని. ౧.౧) అభాసి.

సమ్మాసమ్బుద్ధో ‘‘మయ్హం కథా నియ్యాతీ’’తి ముఖసమ్పత్తమేవ కథేతీతి చిన్తయింసూతి ఇదం అఙ్గుత్తరభాణకానం వళఞ్జనకతన్తినీహారేన వుత్తం. మజ్ఝిమభాణకా పన ఏవం వదన్తి – ఏవం మానభఞ్జనత్థం దేసితఞ్చ పన తం సుత్తం సుత్వా తే భిక్ఖూ ‘‘తంయేవ కిర పథవిం దిట్ఠిగతికో సఞ్జానాతి, సేఖోపి అరహాపి తథాగతోపి అభిజానాతి, కి నామిదం కథం నామిద’’న్తి చిన్తేన్తా ‘‘పుబ్బే మయం భగవతా కథితం యంకిఞ్చి ఖిప్పమేవ జానామ, ఇదాని పనిమస్స మూలపరియాయస్స అన్తం వా కోటిం వా న జానామ న పస్సామ, అహో బుద్ధా నామ అప్పమేయ్యా అతులా’’తి ఉద్ధతదాఠా వియ సప్పా నిమ్మదా హుత్వా బుద్ధూపట్ఠానఞ్చ ధమ్మస్సవనఞ్చ సక్కచ్చం అగమంసు. తేన సమయేన ధమ్మసభాయం సన్నిసిన్నా భిక్ఖూ ‘‘అహో బుద్ధానం ఆనుభావో, తే నామబ్రాహ్మణపబ్బజితా తథా మానమదమత్తా భగవతా మూలపరియాయదేసనాయ నిహతమానా కతా’’తి కథం సముట్ఠాపేసుం. తం సుత్వా భగవా ‘‘న, భిక్ఖవే, ఇదానేవ, పుబ్బేపి అహం ఏవం ఇమే మానపగ్గహితసీసే చరన్తే నిహతమానే అకాసి’’న్తి వత్వా అతీతం ఆహరన్తో ‘‘భూతపుబ్బం, భిక్ఖవే, అఞ్ఞతరో దిసాపామోక్ఖో బ్రాహ్మణో బారాణసియం పటివసతి తిణ్ణం వేదానం పారగూ సనిఘణ్టుకేటుభానం సాక్ఖరప్పభేదానం ఇతిహాసపఞ్చమానం పదకో వేయ్యాకరణో లోకాయతమహాపురిసలక్ఖణేసు అనవయో, సో పఞ్చమత్తాని మాణవకసతాని మన్తే వాచేతి. పణ్డితమాణవకా బహుఞ్చ గణ్హన్తి లహుఞ్చ, సుట్ఠు చ ఉపధారేన్తీ’’తిఆదినా జాతకం కథేసి.

తం సుత్వా తే భిక్ఖూ ‘‘పుబ్బేపి మయం మానేనేవ ఉపహతా’’తి భియ్యోసోమత్తాయ నిహతమానా హుత్వా అత్తనో ఉపకారకమ్మట్ఠానపరాయణా అహేసుం. తతో భగవా ఏకం సమయం జనపదచారికం చరన్తో వేసాలిం పత్వా గోతమకే చేతియే విహరన్తో ఇమేసం పఞ్చసతానం భిక్ఖూనం ఞాణపరిపాకం విదిత్వా ఇదం గోతమకసుత్తం కథేసి. ఇదఞ్చ సుత్తం సుత్వా తే పఞ్చసతా భిక్ఖూ తస్మింయేవ ఆసనే సహ పటిసమ్భిదాహి అరహత్తం పాపుణింసూతి.

అభిఞ్ఞాయాతి కుసలాదిభేదం ఖన్ధాదిభేదఞ్చ దేసేతబ్బం ధమ్మం, వేనేయ్యానఞ్చ ఆసయానుసయచరియాధిముత్తిఆదిభేదం, తస్స చ నేసం దేసేతబ్బప్పకారం యాథావతో అభిజానిత్వాతి అత్థో. ఇమే పఞ్చక్ఖన్ధా ద్వాదసాయతనానీతిఆది పనేత్థ నిదస్సనమత్తం వుత్తన్తి వేదితబ్బం. సప్పచ్చయన్తి సకారణం, వేనేయ్యానం అజ్ఝాసయేన వా పుచ్ఛాయ వా అట్ఠుప్పత్తియా వా సనిమిత్తం హేతూదాహరణసహితఞ్చాతి అత్థో. రాగాదీనం పటిహరణం పటిహారియం, తదేవ పాటిహారియం, సహ పాటిహారియేనాతి సప్పాటిహారియం. రాగాదిప్పటిసేధనవసేనేవ హి సత్థా ధమ్మం దేసేతి. తేనాహ ‘‘పచ్చనీకపటిహరణేన సప్పాటిహారియమేవ కత్వా’’తి. అపరే పన ‘‘యథారహం ఇద్ధిఆదేసనానుసాసనిపాటిహారియసహిత’’న్తి వదన్తి అనుసాసనిపాటిహారియరహితా దేసనా నత్థీతి కత్వా. సేసమేత్థ ఉత్తానమేవ.

గోతమకచేతియసుత్తవణ్ణనా నిట్ఠితా.

౪. భరణ్డుకాలామసుత్తవణ్ణనా

౧౨౭. చతుత్థే ఆళారకాలామకాలేతి ఆళారకాలామానం ధరమానకాలే. పరిఞ్ఞన్తి పహానపరిఞ్ఞం. సా హి సమతిక్కమో, న ఇతరా. తేనాహ ‘‘పరిఞ్ఞా నామ సమతిక్కమో’’తి. ఏత్థ చ పఠమో సత్థా రూపావచరసమాపత్తిలాభీ దట్ఠబ్బో, దుతియో అరూపావచరసమాపత్తిలాభీ, తతియో సమ్మాసమ్బుద్ధో దట్ఠబ్బో. వుత్తఞ్హేతం పుగ్గలపఞ్ఞత్తియం (పు. ప. ౧౩౦) –

‘‘య్వాయం సత్థా కామానం పరిఞ్ఞం పఞ్ఞాపేతి, న రూపానం పరిఞ్ఞం పఞ్ఞాపేతి, న వేదనానం పరిఞ్ఞం పఞ్ఞాపేతి, రూపావచరసమాపత్తియా లాభీ సత్థా తేన దట్ఠబ్బో. య్వాయం సత్థా కామానఞ్చ పరిఞ్ఞం పఞ్ఞాపేతి, రూపానఞ్చ పరిఞ్ఞం పఞ్ఞాపేతి, న వేదనానం పరిఞ్ఞం పఞ్ఞాపేతి, అరూపావచరసమాపత్తియా లాభీ సత్థా తేన దట్ఠబ్బో. య్వాయం సత్థా కామానఞ్చ పరిఞ్ఞం పఞ్ఞాపేతి, రూపానఞ్చ పరిఞ్ఞం పఞ్ఞాపేతి, వేదనానఞ్చ పరిఞ్ఞం పఞ్ఞాపేతి, సమ్మాసమ్బుద్ధో సత్థా తేన దట్ఠబ్బో’’తి.

తత్థ తిత్థియా సమయం జానన్తా కామానం పరిఞ్ఞం పఞ్ఞాపేయ్యుం పఠమజ్ఝానం వదమానా. రూపానం పరిఞ్ఞం పఞ్ఞాపేయ్యుం అరూపరాగం వదమానా. వేదనాపరిఞ్ఞం పఞ్ఞాపేయ్యుం అసఞ్ఞారాగం వదమానా. తే పన ‘‘ఇదం నామ పఠమజ్ఝానం, అయం రూపభవో, అయం అసఞ్ఞాభవో’’తిపి న జానన్తి. తే పఞ్ఞాపేతుం అసక్కోన్తాపి కేవలం ‘‘పఞ్ఞాపేమా’’తి వదన్తి. తథాగతో పన కామానం పరిఞ్ఞం అనాగామిమగ్గేన పఞ్ఞాపేతి, రూపవేదనానం అరహత్తమగ్గేన. ఏవమేత్థ ద్వే జనా బాహిరకా, ఏకో సమ్మాసమ్బుద్ధోతి ఇమస్మిం లోకే తయో సత్థారో నామ.

భరణ్డుకాలామసుత్తవణ్ణనా నిట్ఠితా.

౫. హత్థకసుత్తవణ్ణనా

౧౨౮. పఞ్చమే అభిక్కన్తాతి అతిక్కన్తా, విగతాతి అత్థోతి ఆహ ‘‘ఖయే దిస్సతీ’’తి. తేనేవ హి ‘‘నిక్ఖన్తో పఠమో యామో’’తి అనన్తరం వుత్తం. అభిక్కన్తతరోతి అతివియ కన్తతరో. తాదిసో చ సున్దరో భద్దకో నామ హోతీతి ఆహ ‘‘సున్దరే దిస్సతీ’’తి. కోతి దేవనాగయక్ఖగన్ధబ్బాదీసు కో కతమో? మేతి మమ. పాదానీతి పాదే. ఇద్ధియాతి ఇమాయ ఏవరూపాయ దేవిద్ధియా. యససాతి ఇమినా ఏదిసేన పరివారేన పరిచ్ఛేదేన. జలన్తి విజ్జోతమానో. అభిక్కన్తేనాతి అతివియ కన్తేన కమనీయేన అభిరూపేన. వణ్ణేనాతి ఛవివణ్ణేన సరీరవణ్ణనిభాయ. సబ్బా ఓభాసయం దిసాతి దస దిసా పభాసేన్తో, చన్దో వియ సూరియో వియ చ ఏకోభాసం ఏకాలోకం కరోన్తోతి గాథాయ అత్థో. అభిరూపేతి ఉళారరూపే సమ్పన్నరూపే. అబ్భనుమోదనేతి సమ్పహంసనే. ఇధ పనాతి ‘‘అభిక్కన్తాయ రత్తియా’’తి ఏతస్మిం పదే. తేనాతి సున్దరపరియాయత్తా. ఖయే వా ఇధ అభిక్కన్తసద్దో దట్ఠబ్బో, తేన ‘‘అభిక్కన్తాయ పరిక్ఖీణాయ రత్తియా’’తి వుత్తం హోతి.

రూపాయతనాదీసూతి ఆదిసద్దేన అక్ఖరాదీనం సఙ్గహో దట్ఠబ్బో. సువణ్ణవణ్ణోతి సువణ్ణచ్ఛవీతి అయమేత్థ అత్థోతి ఆహ ‘‘ఛవియ’’న్తి. తథా హి వుత్తం ‘‘కఞ్చనసన్నిభత్తచో’’తి (మ. ని. ౨.౩౯౯; సు. ని. ౫౫౬). సఞ్ఞూళ్హాతి సమ్బన్ధితా, గన్థితాతి అత్థో. వణ్ణాతి గుణవణ్ణాతి ఆహ ‘‘థుతియ’’న్తి, థోమనాయన్తి అత్థో. కులవగ్గేతి ఖత్తియాదికులకోట్ఠాసే. తత్థ ‘‘అచ్ఛో విప్పసన్నో’’తిఆదినా వణ్ణితబ్బట్ఠేన వణ్ణో, ఛవి. వణ్ణనట్ఠేన అభిత్థవట్ఠేన వణ్ణో, థుతి. అఞ్ఞమఞ్ఞం అసఙ్కరతో వణ్ణేతబ్బతో ఠపేతబ్బతో వణ్ణో, ఖత్తియాదికులవగ్గో. వణ్ణీయతి ఞాపీయతి ఏతేనాతి వణ్ణో, ఞాపకకారణం. వణ్ణనతో థూలరస్సాదిభావేన ఉపట్ఠానతో వణ్ణో, సణ్ఠానం. మహన్తం ఖుద్దకం మజ్ఝిమన్తి వణ్ణేతబ్బతో పమితబ్బతో వణ్ణో, పమాణం. వణ్ణీయతి చక్ఖునా పస్సీయతీతి వణ్ణో, రూపాయతనన్తి ఏవం తస్మిం తస్మిం అత్థే వణ్ణసద్దస్స పవత్తి వేదితబ్బా. సోతి వణ్ణసద్దో. ఛవియా దట్ఠబ్బో రూపాయతనే గయ్హమానస్సపి ఛవిముఖేనేవ గహేతబ్బతో. ఛవిగతా పన వణ్ణధాతు ఏవ ‘‘సువణ్ణవణ్ణో’’తి ఏత్థ వణ్ణగ్గహణేన గహితాతి అపరే.

కేవలపరిపుణ్ణన్తి ఏకదేసమ్పి అసేసేత్వా నిరవసేసతోవ పరిపుణ్ణన్తి అయమేత్థ అత్థోతి ఆహ ‘‘అనవసేసతా అత్థో’’తి. కేవలకప్పాతి కప్ప-సద్దో నిపాతో పదపూరణమత్తం, ‘‘కేవలం’’ఇచ్చేవ అత్థో. కేవలసద్దో చ బహులవాచీతి ఆహ ‘‘యేభుయ్యతా అత్థో’’తి. కేచి పన ‘‘ఈసకం అసమత్తం కేవలం కేవలకప్ప’’న్తి వదన్తి. అనవసేసత్థో ఏత్థ కేవలసద్దో సియా, అనత్థన్తరేన పన కప్పసద్దేన పదవడ్ఢనం కతం ‘‘కేవలా ఏవ కేవలకప్పా’’తి. తథా వా కప్పనీయత్తా పఞ్ఞపేతబ్బత్తా కేవలకప్పా. అబ్యామిస్సతా విజాతియేన అసఙ్కరో సుద్ధతా. అనతిరేకతా తంపరమతా విసేసాభావో. కేవలకప్పన్తి కేవలం దళ్హం కత్వాతి అత్థో. కేవలం వుచ్చతి నిబ్బానం సబ్బసఙ్ఖతవివిత్తత్తా, తం ఏతస్స అధిగతం అత్థీతి కేవలీ, సచ్ఛికతనిరోధో ఖీణాసవో.

కప్ప-సద్దో పనాయం సఉపసగ్గో అనుపసగ్గో చాతి అధిప్పాయేన ఓకప్పనియపదే లబ్భమానం ఓకప్పసద్దమత్తం నిదస్సేతి, అఞ్ఞథా కప్పసద్దస్స అత్థుద్ధారే ఓకప్పనియపదం అనిదస్సనమేవ సియా. సమణకప్పేహీతి వినయసిద్ధేహి సమణవోహారేహి. నిచ్చకప్పన్తి నిచ్చకాలం. పఞ్ఞత్తీతి నామం. నామఞ్హేతం తస్స ఆయస్మతో, యదిదం కప్పోతి. కప్పితకేసమస్సూతి కత్తరియా ఛేదితకేసమస్సు. ద్వఙ్గులకప్పోతి మజ్ఝన్హికవేలాయ వీతిక్కన్తాయ ద్వఙ్గులతావికప్పో. లేసోతి అపదేసో. అనవసేసం ఫరితుం సమత్థస్స ఓభాసస్స కేనచి కారణేన ఏకదేసఫరణమ్పి సియా, అయం పన సబ్బస్సేవ ఫరతీతి దస్సేతుం సమన్తత్థో కప్పసద్దో గహితోతి ఆహ ‘‘అనవసేసం సమన్తతో’’తి.

ఆభాయ ఫరిత్వాతి వత్థమాలాలఙ్కారసరీరసముట్ఠితాయ ఆభాయ ఫరిత్వా. దేవతానఞ్హి సరీరోభాసం ద్వాదసయోజనమత్తం ఠానం. తతో భియ్యోపి ఫరిత్వా తిట్ఠతి, తథా వత్థాభరణాదిసముట్ఠితా పభా.

హత్థకసుత్తవణ్ణనా నిట్ఠితా.

౬. కటువియసుత్తవణ్ణనా

౧౨౯. ఛట్ఠే గావీనం కయవిక్కయవసేన యోగో ఏత్థాతి గోయోగో, కయవిక్కయం కరోన్తో గావీహి యుజ్జన్తి ఏత్థాతి వా గోయోగో, గావీనం విక్కయట్ఠానం. తత్థ జాతో పిలక్ఖరుక్ఖో గోయోగపిలక్ఖో, తస్మిం. సమీపత్థే చేతం భుమ్మవచనం. తేనాహ ‘‘గావీనం విక్కయట్ఠానే ఉట్ఠితపిలక్ఖస్స సన్తికే’’తి. రిత్తో అస్సాదో ఏతస్సాతి రిత్తస్సాదో. తేనాహ ‘‘ఝానసుఖాభావేన రిత్తస్సాద’’న్తి. సేసమేత్థ ఉత్తానమేవ.

కటువియసుత్తవణ్ణనా నిట్ఠితా.

౮. దుతియఅనురుద్ధసుత్తవణ్ణనా

౧౩౧. అట్ఠమే ఇదం తే మానస్మిన్తి ఏత్థ మానస్మిన్తి పచ్చత్తే భుమ్మవచనం. ఇదన్తి చ లిఙ్గవిపల్లాసేన నపుంసకనిద్దేసో కతోతి ఆహ ‘‘అయం తే నవవిధేన వడ్ఢితమానో’’తి. సేసేసుపి ఏసేవ నయో.

దుతియఅనురుద్ధసుత్తవణ్ణనా నిట్ఠితా.

౯. పటిచ్ఛన్నసుత్తవణ్ణనా

౧౩౨. నవమే అసాధారణసిక్ఖాపదన్తి భిక్ఖునీనం అసాధారణం భిక్ఖూనంయేవ పఞ్ఞత్తసిక్ఖాపదం సాధారణసిక్ఖాపదన్తి భిక్ఖూనం భిక్ఖునీనఞ్చ సాధారణం ఉభతోపఞ్ఞత్తిసిక్ఖాపదం.

పటిచ్ఛన్నసుత్తవణ్ణనా నిట్ఠితా.

౧౦. లేఖసుత్తవణ్ణనా

౧౩౩. దసమే థిరట్ఠానతోతి థిరట్ఠానతోవ. పాసాణే లేఖసదిసా పరాపరాధనిబ్బత్తా కోధలేఖా యస్స సో పాసాణలేఖూపమసమన్నాగతో పాసాణలేఖూపమోతి వుత్తో. ఏవం ఇతరేపి. అనుసేతీతి అప్పహీనతాయ అనుసేతి. న ఖిప్పం లుజ్జతీతి న అన్తరా నస్సతి కమ్మట్ఠానేనేవ నస్సనతో. ఏవమేవన్తి ఏవం తస్సపి పుగ్గలస్స కోధో న అన్తరా పునదివసే వా అపరదివసే వా నిట్ఠాతి, అద్ధనియో పన హోతి, మరణేనేవ నిట్ఠాతీతి అత్థో. కక్ఖళేనాతి అతికక్ఖళేన ధమ్మచ్ఛేదకేన థద్ధవచనేన. సంసన్దతీతి ఏకీభవతి. సమ్మోదతీతి నిరన్తరో హోతీతి ఏవమేత్థ అత్థో దట్ఠబ్బో.

అథ వా సన్ధియతీతి ఠానగమనాదీసు కాయకిరియాసు కాయేన సమోధానం గచ్ఛతి, తిలతణ్డులా వియ మిస్సీభావం ఉపేతీతి అత్థో. సంసన్దతీతి చిత్తకిరియాసు చిత్తేన సమోధానం గచ్ఛతి, ఖీరోదకం వియ ఏకీభావం ఉపేతీతి అత్థో. సమ్మోదతీతి ఉద్దేసపరిపుచ్ఛాదీసు వచీకిరియాసు వాచాయ సమోధానం గచ్ఛతి, విప్పవాసాగతోపి పియసహాయకో వియ పియతరభావం ఉపేతీతి అత్థో. అపిచ కిచ్చకరణీయేసు తేహి సద్ధిం ఆదీతోవ ఏకకిరియాభావం ఉపగచ్ఛన్తో సన్ధియతి, యావ మజ్ఝా పవత్తన్తో సంసన్దతి, యావ పరియోసానా అనివత్తన్తో సమ్మోదతీతి వేదితబ్బో.

లేఖసుత్తవణ్ణనా నిట్ఠితా.

కుసినారవగ్గవణ్ణనా నిట్ఠితా.