(౬) ౧. పుగ్గలవగ్గవణ్ణనా

౫౩. దుతియపణ్ణాసకస్స పఠమే హితగ్గహణేన మేత్తా వుత్తా హోతి, న కరుణా, అనుకమ్పాగహణేన పన కరుణాతి చక్కవత్తినా సద్ధిం గహితత్తా ‘‘లోకానుకమ్పాయా’’తి న వుత్తం. నిప్పరియాయతో లోకానుకమ్పా నామ సమ్మాసమ్బుద్ధాధీనాతి. ద్వేతి మనుస్సదేవసమ్పత్తివసేన ద్వే సమ్పత్తియో. తా ద్వే, నిబ్బానసమ్పత్తి చాతి తిస్సో.

౫౪. దుతియే బహుసో లోకే న చిణ్ణా న పవత్తా మనుస్సాతి ఆచిణ్ణమనుస్సా. కదాచిదేవ హి నేసం లోకే నిబ్బత్తి అభూతపుబ్బా భూతాతి అబ్భుతమనుస్సా.

౫౫. తతియే దససు చక్కవాళసహస్సేసు అనుతాపం కరోతి తస్స ఏకబుద్ధఖేత్తభావతో.

౫౬. చతుత్థే థూపస్స యుత్తాతి ధాతుయో పక్ఖిపిత్వా థూపకరణస్స యుత్తా.

౫౭. పఞ్చమే అత్తనో ఆనుభావేనాతి సయమ్భుఞాణేన. బుద్ధాతి బుద్ధవన్తో.

౫౮. ఛట్ఠే పహీనత్తా న భాయతీతి అత్తసినేహాభావతో న భాయతి. సక్కాయదిట్ఠిగ్గహణఞ్చేత్థ నిదస్సనమత్తం, అత్తసినేహస్స పటిఘస్స తదేకట్ఠసమ్మోహస్స చ వసేన భాయనం హోతీతి తేసమ్పి పహీనత్తా న భాయతి, అఞ్ఞథా సోతాపన్నాదీనం అభయేన భవితబ్బం సియా. సక్కాయదిట్ఠియా బలవత్తాతి ఏత్థ అహంకారసమ్మోహనతాదీనమ్పి బలవత్తాతి వత్తబ్బం.

౫౯. సత్తమే అస్సాజానీయోతి లిఖన్తి, ఉసభాజానీయోతి పన పాఠోతి.

౬౧. నవమే తత్థాతి అన్తరాపణే. ఏకోతి ద్వీసు కిన్నరేసు ఏకో. అమ్బిలికాఫలఞ్చ అద్దసాతి ఆనేత్వా సమ్బన్ధో. అమ్బిలికాఫలన్తి తిన్తిణీఫలన్తి వదన్తి, చతురమ్బిలన్తి అపరే. ద్వే అత్థేతి పాళియం వుత్తే ద్వే అత్థే.

౬౨. దసమే యథాఆరద్ధే కిచ్చే వత్తమానే అన్తరా ఏవ పటిగమనం పటివానం, నత్థి ఏతస్స పటివానన్తి అప్పటివానో. తత్థ అసంకోచప్పత్తో. తేనాహ ‘‘అనుక్కణ్ఠితో’’తిఆది.

౬౩. ఏకాదసమే సన్నివాసన్తి సహవాసం. యథా అసప్పురిసా సహ వసన్తా అఞ్ఞమఞ్ఞం అగారవేన అనాదరియం కరోన్తి, తప్పటిక్ఖేపేన సప్పురిసానం సగారవప్పటిపత్తిదస్సనపరమిదం సుత్తం దట్ఠబ్బం.

౬౪. ద్వాదసమే ద్వీసుపి పక్ఖేసూతి వివాదాపన్నానం భిక్ఖూనం ద్వీసుపి పక్ఖేసు. సంసరమానాతి పవత్తమానా. దిట్ఠిపళాసోతి దిట్ఠిసన్నిస్సయో పళాసో యుగగ్గాహో. ఆఘాతేన్తోతి ఆహనన్తో బాధేన్తో. అనభిరాధనవసేనాతి యస్స ఉప్పజ్జతి, తస్స తదఞ్ఞేసఞ్చ అత్థస్స అనభిరాధనవసేన. సబ్బమ్పేతన్తి వచీసంసారోతి సబ్బమ్పేతం. అత్తనో చిత్తే పరిసాయ చ చిత్తేతి ఆనేత్వా సమ్బన్ధో.

పుగ్గలవగ్గవణ్ణనా నిట్ఠితా.