౭. కణ్హసుత్తవణ్ణనా

౭. సత్తమే యథా ‘‘కణ్హా గావీ’’తిఆదీసు కాళవణ్ణేన సమన్నాగతా ‘‘కణ్హా’’తి వుచ్చతి, న ఏవం కాళవణ్ణతాయ ధమ్మా ‘‘కణ్హా’’తి వుచ్చన్తి, అథ ఖో కణ్హాభిజాతినిబ్బత్తిహేతుతో అప్పభస్సరభావకరణతో వా ‘‘కణ్హా’’తి వుచ్చన్తీతి దస్సేన్తో ‘‘న కాళవణ్ణతాయా’’తిఆదిమాహ. కణ్హతాయాతి కణ్హాభిజాతితాయ. కణ్హాభిజాతీతి చ అపాయా వుచ్చన్తి మనుస్సేసు చ దోభగ్గియం. సరసేనాతి సభావేన. న హిరీయతి న లజ్జతీతి అహిరికో, పుగ్గలో, చిత్తం, తం సమ్పయుత్తధమ్మసముదాయో వా. తస్స భావో అహిరిక్కన్తి వత్తబ్బే ఏకస్స క-కారస్స లోపం కత్వా అహిరికన్తి వుత్తన్తి ఆహ ‘‘అహిరికన్తి అహిరికభావో’’తి. న ఓత్తప్పతీతి అనోత్తాపీ, పుగ్గలో, యథావుత్తధమ్మసముదాయో వా, తస్స భావో అనోత్తప్పన్తి ఆహ ‘‘అనోత్తాపిభావో’’తి.

కణ్హసుత్తవణ్ణనా నిట్ఠితా.