(౧౪) ౪. సన్థారవగ్గవణ్ణనా

౧౫౨. చతుత్థస్స పఠమే ఆమిసస్స చ ధమ్మస్స చ అలాభేన అత్తనో పరస్స చ అన్తరే సమ్భవన్తస్స ఛిద్దస్స వివరస్స భేదస్స సన్థరణం పిదహనం సఙ్గణ్హనం సన్థారో. అయఞ్హి లోకసన్నివాసో అలబ్భమానేన ఆమిసేన ధమ్మేన చాతి ద్వీహి ఛిద్దో. తస్స తం ఛిద్దం యథా న పఞ్ఞాయతి, ఏవం పీఠస్స వియ పచ్చత్థరణేన ఆమిసేన ధమ్మేన చ సన్థరణం సఙ్గణ్హనం సన్థారోతి వుచ్చతి. ఏత్థ చ ఆమిసేన సఙ్గహో ఆమిససన్థారో నామ. తం కరోన్తేన మాతాపితూనం భిక్ఖుగతికస్స వేయ్యావచ్చకరస్స రఞ్ఞో చోరానఞ్చ అగ్గం అగ్గహేత్వాపి దాతుం వట్టతి. ఆమసిత్వా దిన్నేహి రాజానో చ చోరా చ అనత్థమ్పి కరోన్తి, జీవితక్ఖయమ్పి పాపేన్తి. అనామసిత్వా దిన్నేన అత్తమనా హోన్తి, చోరనాగవత్థుఆదీని చేత్థ వత్థూని కథేతబ్బాని. తాని సమన్తపాసాదికాయ వినయట్ఠకథాయం (పారా. ౧౮౫) విత్థారితాని. సక్కచ్చం ఉద్దేసదానం పాళివణ్ణనా ధమ్మకథాకథనన్తి ఏవం ధమ్మేన సఙ్గహో ధమ్మసన్థారో నామ.

౧౫౩-౧౬౩. దుతియాదీని ఉత్తానత్థానేవ.

సన్థారవగ్గవణ్ణనా నిట్ఠితా.