౫-౬. అప్పమాదసుత్తాదివణ్ణనా

౧౫-౧౬. పఞ్చమే కారాపకఅప్పమాదో నామ ‘‘ఇమే అకుసలా ధమ్మా పహాతబ్బా, ఇమే కుసలా ధమ్మా ఉపసమ్పాదేతబ్బా’’తి తంతంపరివజ్జేతబ్బవజ్జనసమ్పాదేతబ్బసమ్పాదనవసేన పవత్తో అప్పమాదో. ఏసాతి అప్పమాదో. లోకియోవ న లోకుత్తరో. అయఞ్చాతి చ ఏసాతి చ అప్పమాదమేవ వదతి. తేసన్తి చాతుభూమకధమ్మానం. పటిలాభకత్తేనాతి పటిలాభాపనకత్తేన.

జఙ్గలానన్తి జఙ్గలచారీనం. జఙ్గల-సద్దో చేత్థ ఖరభావసామఞ్ఞేన పథవీపరియాయో, న అనుపట్ఠానవిదూరదేసవాచీ. తేనాహ ‘‘పథవీతలచారీన’’న్తి. పదానం వుచ్చమానత్తా ‘‘సపాదకపాణాన’’న్తి విసేసేత్వా వుత్తం. సమోధానన్తి అన్తోగధభావం. తేనాహ ‘‘ఓధానం పక్ఖేప’’న్తి. ‘‘ఉపక్ఖేప’’న్తిపి పఠన్తి, ఉపనేత్వా పక్ఖిపితబ్బన్తి అత్థో. వస్సికాయ పుప్ఫం వస్సికం యథా ‘‘ఆమలకియా ఫలం ఆమలక’’న్తి. మహాతలస్మిన్తి ఉపరిపాసాదే. ఛట్ఠం ఉత్తానమేవ.

అప్పమాదసుత్తాదివణ్ణనా నిట్ఠితా.