అట్ఠవీసతిమో పరిచ్ఛేదో

౨౮. అత్థపఞ్ఞత్తికథా

౧౦౮౪. తత్థ చ పుబ్బాపరియ-పవత్తక్ఖన్ధసమ్మతా;

విఞ్ఞత్తిన్ద్రియవిప్ఫార-విసేసోపనిబన్ధనా.

౧౦౮౫. దేవయక్ఖమనుస్సాది-నానాభేదా సలక్ఖికా;

సత్తపఞ్ఞత్తి నామాయం, స్వాయం సత్తోతి సమ్మతో.

౧౦౮౬. వట్టత్తయముపాదాయ,

ఖన్ధాయతనవుత్తియా;

కారకో వేదకో వాయం,

సన్ధావతి భవే భవే.

౧౦౮౭. తస్మా సంసారమాపన్నో, సత్తో నామ స పుగ్గలో;

అహమత్తాపరా ఇత్థీ, పురిసోతి చ కప్పితో.

౧౦౮౮. స్వాయం ఖన్ధాదితో సత్తో, అఞ్ఞోతి చ న వుచ్చతి;

ఖన్ధాదివినిముత్తస్స, సత్తస్సేవ అభావతో.

౧౦౮౯. ఖన్ధా ఖన్ధానమేవాయం, సత్తోతి చ న వుచ్చతి;

ఖన్ధవోహారతో తస్స, అఞ్ఞవోహారసమ్భవా.

౧౦౯౦. ఇచ్చేవం ఖన్ధనానత్తే-కత్తముత్తోపి అత్థతో;

తబ్బిసేసావచరిత-వోహారో చ తు దిస్సతి.

౧౦౯౧. తేనాయం పుగ్గలో సత్తో, జాయతిజ్జియ్యతీతి చ;

మీయతీతి చ తస్సాయం, సంసారోతి పవుచ్చతి.

౧౦౯౨. మతో జాతో చ న స్వేవ, ఖన్ధభేదోపచారతో;

నాపరో స్వేవ సన్తానభేదాభావోపచారతో.

౧౦౯౩. నానత్తేకత్తమిచ్చేవం, పుగ్గలస్సోపచారతో;

ఉచ్ఛేదసస్సతత్తం వా, తస్మా నోపేతి పుగ్గలో.

౧౦౯౪. ఇచ్చాయం పుగ్గలో నామ, సత్తో సంసారకారకో;

ఖన్ధాదికముపాదాయ, పఞ్ఞత్తోతి పవుచ్చతి.

౧౦౯౫. తస్మా పుగ్గలసఙ్ఖాతా, సంసారోపనిబన్ధనా;

సత్తపఞ్ఞత్తి నామాతి, విఞ్ఞాతబ్బా విభావినా.

౧౦౯౬. అజ్ఝత్తికా చ కేసాదికోట్ఠాసా బాహిరేసు చ;

భూమిపబ్బతపాసాణతిణరుక్ఖలతాదికా.

౧౦౯౭. భూతసమ్భారనిబ్బత్తివిభాగపరికప్పితా;

తముపాదాయ సమ్భారపఞ్ఞత్తీతి పవుచ్చతి.

౧౦౯౮. భూతసమ్భారసణ్ఠానవిభాగపరికప్పితా;

సణ్ఠానపఞ్ఞత్తి నామ, థమ్భకుమ్భాదికా మతా.

౧౦౯౯. భూతసమ్భారసఙ్ఘాతవిసేసపరికప్పితా;

సఙ్ఘాతపఞ్ఞత్తి నామ, రథగేహాదికా మతా.

౧౧౦౦. భూతసమ్భారవిసేసపరిణామపకప్పితా;

పరిణామపఞ్ఞత్తీతి, దధిభత్తాదికా మతా.

౧౧౦౧. ఇత్థమజ్ఝత్తబహిద్ధా, ధమ్మా సమ్భారసమ్భూతా;

సన్తానవుత్తి సఙ్కేతసిద్ధా పఞ్ఞత్తి పఞ్చధా.

౧౧౦౨. తథా తథా సముప్పన్నవికప్పాభోగసమ్మతా;

వికప్పపఞ్ఞత్తి నామ, కాలాకాసదిసాదికా.

౧౧౦౩. తం తం నిమిత్తమాగమ్మ, తతోపట్ఠానకప్పితా;

ఉపట్ఠానపఞ్ఞత్తీతి, పటిభాగాదికా మతా.

౧౧౦౪. విసేసాకారమత్తాపి, అత్థన్తరపకప్పితా;

ఆకారపఞ్ఞత్తి నామ, విఞ్ఞత్తిలహుతాదికా.

౧౧౦౫. తం తం కారణమాగమ్మ, తథా వోహారకప్పితా;

వోహారపఞ్ఞత్తి నామ, కథినాపత్తిఆదికా.

౧౧౦౬. బాలో యో సో చ మే అత్తా,

సో భవిస్సామి మం చ తు;

నిచ్చో ధువో సస్సతోతి-

ఆదికా పన సబ్బథా.

౧౧౦౭. తబ్బోహారనిమిత్తానం, అభావేపి పవత్తితో;

అభినివేసపఞ్ఞత్తి, నామ తిత్థియకప్పితా.

౧౧౦౮. ఇచ్చేవం లోకసాసనతిత్థాయతనకప్పితా;

సన్తానముత్తసఙ్కేతసిద్ధా అత్థాపి పఞ్చధా.

౧౧౦౯. సఙ్కానవుత్తిసన్తానముత్తభేదవసా ద్విధా;

అత్థపఞ్ఞత్తి నామాయం, దసధా పరిదీపితా.

౧౧౧౦. ఇతి వుత్తప్పకారేసు, పఞ్ఞత్తత్థేసు పణ్డితా;

పఞ్ఞత్తిమత్తం సన్ధాయ, వోహరన్తి యథాకథం.

౧౧౧౧. తదఞ్ఞే పన బాలా చ, తిత్థియాపి అకోవిదా;

పఞ్ఞత్తిమతిధావిత్వా, గణ్హన్తి పరమత్థతో.

౧౧౧౨. తే తథా గహితాకారా, అఞ్ఞాణగహితా జనా;

మిచ్ఛత్తాభినివిట్ఠా చ, వడ్ఢన్తి భవబన్ధనం.

౧౧౧౩. దువిధేసుపి అత్థేసు, తస్మా పణ్డితజాతికో;

పరమత్థపఞ్ఞత్తీసు, విభాగమితి లక్ఖయేతి.

ఇతి పఞ్ఞత్తివిభాగే అత్థపఞ్ఞత్తికథా నిట్ఠితా.

అట్ఠవీసతిమో పరిచ్ఛేదో.