సత్తవీసతిమో పరిచ్ఛేదో
౫. పఞ్ఞత్తివిభాగో
౨౭. పభేదకథా
౧౦౬౨. చిత్తం చేతసికం రూపం, నిబ్బానమ్పి చ భాజితం;
తస్మా దాని యథాయోగం, పఞ్ఞత్తిపి పవుచ్చతి.
౧౦౬౩. సా చాయం అత్థపఞ్ఞత్తి-నామపఞ్ఞత్తిభేదతో;
దువిధా హోతి పఞ్ఞత్తి, అత్థపఞ్ఞత్తి తత్థ చ.
౧౦౬౪. సత్తసమ్భారసణ్ఠాన-సఙ్ఘాటపరిణామతో;
వికప్పుపట్ఠానాకారవోహారాభినివేసతో.
౧౦౬౫. తథా పవత్తసఙ్కేతసిద్ధా అత్థా పకప్పితా;
పఞ్ఞాపీయన్తి నామాతి, పఞ్ఞత్తీతి పకిత్తితా.
౧౦౬౬. అత్థా హి పరమత్థత్థా, పఞ్ఞత్తత్థాతి చ ద్విధా;
తత్థ చ పరమత్థత్థా, సచ్చికట్ఠా సలక్ఖణా.
౧౦౬౭. పఞ్ఞత్తత్థా సచ్చికట్ఠసలక్ఖణసభావతో;
అఞ్ఞథా గహితా తంతముపాదాయ పకప్పితా.
౧౦౬౮. తస్మా ఉపాదాపఞ్ఞత్తి, అత్థపఞ్ఞత్తినామకా;
పఞ్ఞపేతబ్బనామావ, పఞ్ఞత్తత్థావ సబ్బథా.
౧౦౬౯. పరమత్థా యథావుత్తా, చిత్తచేతసికాదయో;
పఞ్ఞత్తా ఇత్థిపురిసమఞ్చపీఠపటాదయో.
౧౦౭౦. యేన వుచ్చతి తం నామం, పఞ్ఞపేతీతి వుచ్చతి;
పఞ్ఞత్తీతి చ సా నామపఞ్ఞత్తీతి తతో మతా.
౧౦౭౧. సఙ్ఖా సమఞ్ఞా పఞ్ఞత్తి, వోహారోతి చ భాజితా;
చతుధా పఞ్ఞపేతబ్బపఞ్ఞత్తీతి హి వణ్ణితా.
౧౦౭౨. తతో నామం నామకమ్మం, నామధేయ్యం అథాపరం;
నిరుత్తి బ్యఞ్జనమభిలాపోతి పన భాజితా.
౧౦౭౩. నామపఞ్ఞత్తి నామాతి, పఞ్ఞత్తి దువిధా కతా;
సబ్బేవ ధమ్మా పఞ్ఞత్తిపథాతి పన భాజితా.
౧౦౭౪. పరమత్థపఞ్ఞత్తత్థా, దువిధా హోన్తి తత్థ చ;
పఞ్ఞత్తిపథావ హోన్తి, పరమత్థా సలక్ఖణా.
౧౦౭౫. పఞ్ఞత్తత్థా పఞ్ఞత్తి చ, పఞ్ఞపేతబ్బమత్తతో;
పఞ్ఞత్తిపథా చ నామపఞ్ఞత్తిపథభావతో.
౧౦౭౬. నామమ్పి పఞ్ఞాపేతబ్బమేవ కిఞ్చాపి కేనచి;
నామమేవమ్పేతం తత్థ, పఞ్ఞత్తిచ్చేవ వణ్ణితం.
౧౦౭౭. పఞ్ఞపేతబ్బధమ్మా చ, తేసం పఞ్ఞాపితాపి చ;
ఇచ్ఛితబ్బాపి పఞ్ఞత్తిపథా పఞ్ఞత్తినానతా.
౧౦౭౮. ఇతి వుత్తానుసారేన, వుత్తం అట్ఠకథానయే;
నయం గహేత్వా ఏత్థాపి, పఞ్ఞత్తి దువిధా కతా.
౧౦౭౯. తస్మిమ్పి పరమత్థా చ, సచ్చికట్ఠసలక్ఖణా;
అత్థా పఞ్ఞత్తిమత్తా చ, అత్థపఞ్ఞత్తినామకా.
౧౦౮౦. తేసం పఞ్ఞాపికా చేవ, నామపఞ్ఞత్తినామికా;
ఇచ్చేవం వణ్ణనామగ్గే, ఞేయ్యత్తా తివిధా కతా.
౧౦౮౧. పరమత్థసచ్చం నామ, పరమత్థావ తత్థ చ;
సచ్చికట్ఠసభావత్తా, అవిసంవాదకా హి తే.
౧౦౮౨. సమ్ముతిసచ్చం పఞ్ఞత్తిద్వయం వోహారవుత్తియా;
లోకసమఞ్ఞాధిప్పాయావిసంవాదకభావతో.
౧౦౮౩. ఇతి సచ్చద్వయమ్పేతం, అక్ఖాసి పురిసుత్తమో;
తేనాపి నామసంవిఞ్ఞూ, వోహరేయ్యుభయమ్పి వా.
ఇతి పఞ్ఞత్తివిభాగే పభేదకథా నిట్ఠితా.
సత్తవీసతిమో పరిచ్ఛేదో.