ఛబ్బిసతిమో పరిచ్ఛేదో
౨౬. వుట్ఠానవిసుద్ధికథా
౧౦౧౯. తస్సేవం పటిపన్నస్స, సిఖాపత్తా విపస్సనా;
వుట్ఠానగామినీ నామ, యదా హోతి తదా పన.
౧౦౨౦. పరికమ్మోపచారానులోమగోత్రభుతో పరం;
మగ్గో తతో ఫలం హోతి, భవఙ్గా పచ్చవేక్ఖణా.
౧౦౨౧. పరికమ్మోపచారానులోమసఙ్ఖాతగోచరా;
మగ్గస్సావజ్జనం హుత్వా, నిబ్బానే హోతి గోత్రభు.
౧౦౨౨. చతుత్థం పఞ్చమం వాథ, ఛట్ఠం వాపి యథారహం;
అప్పేతి మగ్గజవనం, నిబ్బానే సకిమేవ తం.
౧౦౨౩. తతో ఫలాని తీణి ద్వే, ఏకం వాథ యథాక్కమం;
మగ్గావసేసనిరోధమగ్గవుట్ఠానవీథియం.
౧౦౨౪. తతో భవఙ్గపాతోవ,
తం ఛేత్వా పచ్చవేక్ఖణా;
తిస్సో పఞ్చవిధా హోన్తి,
యథాయోగం తథా హి చ.
౧౦౨౫. మగ్గం ఫలఞ్చ నిబ్బానం, అవస్సం పచ్చవేక్ఖతి;
హీనే కిలేసే సేసే చ, పచ్చవేక్ఖతి వా న వా.
౧౦౨౬. తతో చ పున సఙ్ఖారే, విపస్సన్తో యథా పురే;
అప్పేతి అనుపుబ్బేన, సేసమగ్గఫలాని చ.
౧౦౨౭. తత్థ వుచ్చన్తి నిబ్బాన-ఫలమగ్గవిపస్సనా;
సుఞ్ఞతా చానిమిత్తా చ, తథాపణిహితాని చ.
౧౦౨౮. సుఞ్ఞతావిపస్సనాదినామేన హి విపస్సతి;
విమోక్ఖముఖభూతాతి, తివిధా భాజితా తథా.
౧౦౨౯. సుఞ్ఞతాదికనామేన, విమోక్ఖా తివిధా మతా;
నిబ్బానఫలమగ్గా చ, సమాపత్తిసమాధయో.
౧౦౩౦. తత్థేవ పఠమభూమిం, పత్తో అరియపుగ్గలో;
సత్తక్ఖత్తుపరమో సో, సోతాపన్నోతి వుచ్చతి.
౧౦౩౧. పత్తో దుతియభూమిఞ్చ, సకదాగామినామకో;
సకిమేవ ఇమం లోకం, ఆగన్త్వా హోతి మానుసం.
౧౦౩౨. పత్తో తతియభూమిఞ్చ, అనాగామీతి వుచ్చతి;
బ్రహ్మలోకా అనాగన్త్వా, ఇధకామోపపత్తియా.
౧౦౩౩. పత్తో చతుత్థభూమిఞ్చ, అరహా అగ్గపుగ్గలో;
దిట్ఠేవ ధమ్మే దుక్ఖగ్గిం, నిబ్బాపేతీతి వుచ్చతి.
౧౦౩౪. ఇతి మగ్గఫలట్ఠానం, వసా అరియపుగ్గలా;
ద్విధాపి చతుధా యుగ్గా, అట్ఠ హోన్తి విభాగతో.
౧౦౩౫. ఉభతోభాగవిముత్త-
విభాగాదివసా పన;
విభత్తా హోన్తి సత్తేతే,
యథాయోగం తథా హి చ.
౧౦౩౬. సద్ధాధురస్సానిచ్చతో, వుట్ఠానం దుక్ఖతోపి చ;
పఞ్ఞాధురస్సానత్తతో, ఇతి దీపేన్తి పణ్డితా.
౧౦౩౭. సద్ధానుసారి ఆదిమ్హి, మజ్ఝే సద్ధావిముత్తకో;
అన్తే పఞ్ఞావిముత్తోవ, తస్మా సద్ధాధురో సియా.
౧౦౩౮. ధమ్మానుసారి ఆదిమ్హి, దిట్ఠిప్పత్తో తతోపరి;
అన్తే పఞ్ఞావిముత్తోవ, హోతి పఞ్ఞాధురోపి చ.
౧౦౩౯. సమథయానికా చేవ, రూపానుత్తరపాదకా;
విపస్సనాయానికా చ, సబ్బే సుక్ఖవిపస్సకా.
౧౦౪౦. ధురవుట్ఠానభేదేన, హోన్తి పఞ్చేవ సబ్బథా;
ఆరుప్పపాదకా చాపి, ఆదిమ్హి దువిధా తథా.
౧౦౪౧. ఛసు ఠానేసు మజ్ఝకే, కాయసక్ఖీతి భాజితా;
ఉభతోభాగవిముత్తో, అరహత్తే పతిట్ఠితో.
౧౦౪౨. ఇత్థం వుత్తయానధుర-వుట్ఠానానం విభాగతో;
మగ్గప్ఫలభూమియో చ, సత్తట్ఠారియపుగ్గలా.
౧౦౪౩. తత్థ చానుత్తరఞాణం, సచ్చానం పటివేధకం;
సముచ్ఛేదప్పహానేన, క్లేసానుసయసోధనం.
౧౦౪౪. చతుమగ్గవిభాగేన, వుట్ఠానన్తి పకిత్తితం;
ఞాణదస్సనవిసుద్ధి, నామ హోతి తథాపి చ.
౧౦౪౫. మగ్గో చ పరిజానాతి, దుక్ఖం తేభూమకం తథా;
యథాయోగం పజహతి, తణ్హాసముదయమ్పి చ.
౧౦౪౬. నిరోధం సచ్ఛికరోతి, మగ్గసచ్చమనుత్తరం;
భావనావీథిమోతిణ్ణో, భావేతీతి పవుచ్చతి.
౧౦౪౭. దిట్ఠిగ్గతవిచికిచ్ఛా-సీలబ్బతమసేసతో;
అపాయగమనీయఞ్చ, రాగదోసాదికత్తయం.
౧౦౪౮. తదేకట్ఠే కిలేసే చ, సహజాతప్పహానతో;
పజహాతి సోతాపత్తి-మగ్గో పఠమభూమికో.
౧౦౪౯. తదేకట్ఠే పజహతి, రాగదోసాదికేపి చ;
థూలే తు సకదాగామి-మగ్గో దుతియభూమికో.
౧౦౫౦. పజహాతి అనాగామి-మగ్గో నిరవసేసతో;
కామరాగబ్యాపాదే చ, తదేకట్ఠే చ సమ్భవా.
౧౦౫౧. రూపారూపరాగమాను-ద్ధచ్చావిజ్జాతి పఞ్చకం;
అగ్గమగ్గో పజహతి, క్లేసే సేసే చ సబ్బథా.
౧౦౫౨. ఇతి సచ్చపటివేధం, క్లేసక్ఖయఫలావహం;
మగ్గఞాణం పకాసేన్తి, విసుద్ధిం సత్తమం బుధా.
౧౦౫౩. ఛబ్బిసుద్ధికమేనేవం, సబ్బథాయ విసుద్ధియా;
సత్తమాయానుపత్తబ్బం, నిబ్బానన్తి పవుచ్చతి.
౧౦౫౪. క్లేసక్ఖయకరం తాణం, సంసారాతిక్కమం పరం;
పారిమం తీరమభయం, సబ్బసఙ్ఖారనిస్సటం.
౧౦౫౫. తేనమ్మదనిమ్మదనం, పిపాసవినయాదినా;
క్లేససంసారసఙ్ఖార-పటిపక్ఖనిదస్సితం.
౧౦౫౬. అజరామరమచ్చన్త-మనుప్పాదమసఙ్ఖతం;
అనుత్తరమసఙ్ఖారం, అనన్తమతులఞ్చ తం.
౧౦౫౭. పరమత్థమనోపమ్మం, సన్తి అప్పటిమం సుఖం;
నిరోధసచ్చ నిబ్బానం, ఏకన్తం అమతం పదం.
౧౦౫౮. సోపాదిసేసనిబ్బాన-ధాతు చేవ తథాపరా;
అనుపాదిసేసా చేతి, దువిధా పరియాయతో.
౧౦౫౯. సుఞ్ఞతం చానిమిత్తఞ్చ, తథాపణిహితన్తి చ;
అత్తాదిగాహాభావేన, తివిధాపి చ భాజితం.
౧౦౬౦. క్లేససంసారసఙ్ఖార-పచ్చనీకవిభాగతో;
భవక్ఖయాదిభేదేహి, బహుధాపి పవుచ్చతి.
౧౦౬౧. తదేవమచ్చుతం ధమ్మం, లోకుత్తరమకాలికం;
వానాభావా వానాతీతో, ‘‘నిబ్బాన’’న్తి పకిత్తితం.
ఇతి నిబ్బానవిభాగే వుట్ఠానవిసుద్ధికథా నిట్ఠితా.
ఛబ్బీసతిమో పరిచ్ఛేదో.
నిట్ఠితో చ సబ్బథాపి నిబ్బానవిభాగో.