౧౫. రాసిసఙ్గహకథా

౫౧౩. తేత్తింస చేవ ద్వత్తింస, ఏకతింస చ తింస చ;

ఏకద్వత్తింసహీనా చ, తింస ధమ్మానవజ్జకే.

౫౧౪. దస ధమ్మా తు సావజ్జే, ఛపఞ్చచతురాధికా;

ఏకాదస దస నవ, సత్తధాహేతుకే పన.

౫౧౫. ఇత్థం చుద్దసధా భిన్నా, కోట్ఠాసా తు సరూపతో;

విభత్తా తేహి యుత్తా చ, చిత్తుప్పాదా యథాక్కమం.

౫౧౬. తికట్ఠకా పఞ్చవీస, దస పఞ్చాధికా నవ;

అట్ఠారసేతి సత్తేతే, అనవజ్జా తథేతరే.

౫౧౭. ద్వే చత్తారో ఛళేకం ద్వే,

పఞ్చాథ దసధాపరే;

సావజ్జాహేతుకా చేతి,

కోట్ఠాసా హోన్తి చుద్దస.

౫౧౮. నవ చాపి ఛ చత్తారో, చతుపఞ్చఛసత్తకా;

నవ ద్వే ద్వే తథేకో చ, యేవాపనకసఙ్గహా.

౫౧౯. తేహి యుత్తా పనట్ఠాథ, వీసేకతింస మానసా;

ద్వే ద్వే ద్వే తీణి చేకం ద్వే, అట్ఠ దస యథాక్కమం.

౫౨౦. సత్తతింసకతో యావ, ఏకతింసానవజ్జకే;

తికట్ఠకాదికే సత్త, ఠితా నియతసఙ్గహా.

౫౨౧. పాపేసు వీస చేకూన-వీసట్ఠారస సోళస;

చతుధా ద్వీసు చతూసు, చతూసు ద్వీసు చట్ఠితా.

౫౨౨. ఏకద్విపఞ్చదససు, చ ద్విధాహేతుకేసు చ;

తికద్వేకాధికా ధమ్మా, దసట్ఠ చ యథాక్కమం.

౫౨౩. పఞ్చద్వేకద్విభిపఞ్చ, కోట్ఠాసా నియతా ఠితా;

తేహి యుత్తా పనట్ఠాథ, వీస ద్వే ద్వే తికేకకా.

౫౨౪. పుబ్బాపరద్వయాపుఞ్ఞే, కామపాకే అహేతుకే;

పఞ్చమానుత్తరారుప్పే, నత్థానియతసమ్భవో.

౫౨౫. ఛత్తింసమానసేస్వేవ, లబ్భన్తానియతా న వా;

తేపఞ్ఞాసావసేసా తు, సబ్బే నియతయోగినో.

౫౨౬. నియతానియతే కత్వా, లబ్భన్తోభయథా తథా;

సరూపయేవోభయకా, తివిధేవం తు సఙ్గహా.

౫౨౭. ఞేయ్యా వుత్తానుసారేన, తేహి యుత్తావ మానసా;

తతో పున విభావేయ్య, సబ్బసఙ్గాహికం నయం.

౫౨౮. ఏకూనతాలీసకతో, యావేకత్తింసకా ఠితా;

నవధా అనవజ్జేసు, తేహి యుత్తా చ మానసా.

౫౨౯. ద్వే చత్తారో దసేవాథ, తికపఞ్చాధికా దస;

తేవీస కమతో సత్త, ద్వే చ పఞ్చదసాపరే.

౫౩౦. ద్వే చ ద్వే తికద్వే ద్వేకా, సావజ్జేసు చ సోళస;

ఏకూనవీస వీసాథ, వీసేకద్వితయాధికా.

౫౩౧. అహేతుకే పనట్ఠాథ, దసేకద్వితయాధికా;

దసపఞ్చ ద్వికేకాతి, భవన్తేకూనవీసతి.

౫౩౨. లబ్భమానానుసారేన, ధమ్మానం పన సఙ్గహో;

సక్కా వుత్తనయేనేవ, విఞ్ఞాతుం పన విఞ్ఞునాతి.

ఇతి చేతసికవిభాగే రాసిసఙ్గహకథా నిట్ఠితా.

పన్నరసమో పరిచ్ఛేదో.