౮. ఓఘవగ్గో

౧-౧౦. ఓఘాదిసుత్తదసకం

౮౮౯-౮౯౮. ‘‘పఞ్చిమాని, భిక్ఖవే, ఉద్ధమ్భాగియాని సంయోజనాని. కతమాని పఞ్చ? రూపరాగో, అరూపరాగో, మానో, ఉద్ధచ్చం, అవిజ్జా – ఇమాని ఖో, భిక్ఖవే, పఞ్చుద్ధమ్భాగియాని సంయోజనాని. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ చత్తారో ఇద్ధిపాదా భావేతబ్బా. కతమే చత్తారో? ఇధ, భిక్ఖవే, భిక్ఖు ఛన్దసమాధిప్పధానసఙ్ఖారసమన్నాగతం ఇద్ధిపాదం భావేతి, వీరియసమాధి…పే… చిత్తసమాధి …పే… వీమంసాసమాధిప్పధానసఙ్ఖారసమన్నాగతం ఇద్ధిపాదం భావేతి. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ ఇమే చత్తారో ఇద్ధిపాదా భావేతబ్బా’’తి.

(యథా మగ్గసంయుత్తం తథా విత్థారేతబ్బం).

ఓఘవగ్గో అట్ఠమో.

తస్సుద్దానం –

ఓఘో యోగో ఉపాదానం, గన్థా అనుసయేన చ;

కామగుణా నీవరణా, ఖన్ధా ఓరుద్ధమ్భాగియాతి.

ఇద్ధిపాదసంయుత్తం సత్తమం.