౫. కుసలరాసిసుత్తం

౪౧౧. ‘‘‘కుసలరాసీ’తి, భిక్ఖవే, వదమానో చత్తారో సతిపట్ఠానే సమ్మా వదమానో వదేయ్య. కేవలో హాయం, భిక్ఖవే, కుసలరాసి, యదిదం – చత్తారో సతిపట్ఠానా.

‘‘కతమే చత్తారో? ఇధ, భిక్ఖవే, భిక్ఖు కాయే కాయానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం; వేదనాసు…పే… చిత్తే…పే… చిత్తానుపస్సీ…పే… ధమ్మేసు ధమ్మానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం. ‘కుసలరాసీ’తి, భిక్ఖవే, వదమానో ఇమే చత్తారో సతిపట్ఠానే సమ్మా వదమానో వదేయ్య. కేవలో హాయం, భిక్ఖవే, కుసలరాసి, యదిదం – చత్తారో సతిపట్ఠానా’’తి. పఞ్చమం.