౭. ఛన్దసుత్తం

౪౦౩. ‘‘చత్తారోమే, భిక్ఖవే, సతిపట్ఠానా. కతమే చత్తారో? ఇధ, భిక్ఖవే, భిక్ఖు కాయే కాయానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం. తస్స కాయే కాయానుపస్సినో విహరతో యో కాయస్మిం ఛన్దో సో పహీయతి. ఛన్దస్స పహానా అమతం సచ్ఛికతం హోతి.

‘‘వేదనాసు వేదనానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం. తస్స వేదనాసు వేదనానుపస్సినో విహరతో యో వేదనాసు ఛన్దో సో పహీయతి. ఛన్దస్స పహానా అమతం సచ్ఛికతం హోతి.

‘‘చిత్తే చిత్తానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం. తస్స చిత్తే చిత్తానుపస్సినో విహరతో యో చిత్తమ్హి ఛన్దో సో పహీయతి. ఛన్దస్స పహానా అమతం సచ్ఛికతం హోతి.

‘‘ధమ్మేసు ధమ్మానుపస్సీ విహరతి ఆతాపీ సమ్పజానో సతిమా, వినేయ్య లోకే అభిజ్ఝాదోమనస్సం. తస్స ధమ్మేసు ధమ్మానుపస్సినో విహరతో యో ధమ్మేసు ఛన్దో సో పహీయతి. ఛన్దస్స పహానా అమతం సచ్ఛికతం హోతీ’’తి. సత్తమం.