౧. విధాసుత్తం

౨౨౨. సావత్థినిదానం. ‘‘యే హి కేచి, భిక్ఖవే, అతీతమద్ధానం సమణా వా బ్రాహ్మణా వా తిస్సో విధా పజహింసు, సబ్బే తే సత్తన్నం బోజ్ఝఙ్గానం భావితత్తా బహులీకతత్తా. యే హి కేచి, భిక్ఖవే, అనాగతమద్ధానం సమణా వా బ్రాహ్మణా వా తిస్సో విధా పజహిస్సన్తి, సబ్బే తే సత్తన్నం బోజ్ఝఙ్గానం భావితత్తా బహులీకతత్తా. యే హి కేచి, భిక్ఖవే, ఏతరహి సమణా వా బ్రాహ్మణా వా తిస్సో విధా పజహన్తి, సబ్బే తే సత్తన్నం బోజ్ఝఙ్గానం భావితత్తా బహులీకతత్తా. కతమేసం సత్తన్నం బోజ్ఝఙ్గానం? సతిసమ్బోజ్ఝఙ్గస్స…పే… ఉపేక్ఖాసమ్బోజ్ఝఙ్గస్స. యే హి కేచి, భిక్ఖవే, అతీతమద్ధానం సమణా వా బ్రాహ్మణా వా తిస్సో విధా పజహింసు…పే… పజహిస్సన్తి…పే… పజహన్తి, సబ్బే తే ఇమేసంయేవ సత్తన్నం బోజ్ఝఙ్గానం భావితత్తా బహులీకతత్తా’’తి. పఠమం.