౭. పఠమమహాసముద్దసుత్తం

౧౧౨౭. ‘‘సేయ్యథాపి, భిక్ఖవే, పురిసో మహాసముద్దతో ద్వే వా తీణి వా ఉదకఫుసితాని ఉద్ధరేయ్య. తం కిం మఞ్ఞథ, భిక్ఖవే, కతమం ను ఖో బహుతరం – యాని ద్వే వా తీణి వా ఉదకఫుసితాని ఉబ్భతాని, యం వా మహాసముద్దే ఉదక’’న్తి? ‘‘ఏతదేవ, భన్తే, బహుతరం, యదిదం – మహాసముద్దే ఉదకం; అప్పమత్తకాని ద్వే వా తీణి వా ఉదకఫుసితాని ఉబ్భతాని. సఙ్ఖమ్పి న ఉపేన్తి, ఉపనిధమ్పి న ఉపేన్తి, కలభాగమ్పి న ఉపేన్తి మహాసముద్దే ఉదకం ఉపనిధాయ ద్వే వా తీణి వా ఉదకఫుసితాని ఉబ్భతానీ’’తి. ‘‘ఏవమేవ ఖో, భిక్ఖవే, అరియసావకస్స…పే… యోగో కరణీయో’’తి. సత్తమం.