౭. అవిజ్జాసుత్తం

౧౦౮౭. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘‘అవిజ్జా, అవిజ్జా’తి భన్తే, వుచ్చతి. కతమా ను ఖో, భన్తే, అవిజ్జా; కిత్తావతా చ అవిజ్జాగతో హోతీ’’తి? ‘‘యం ఖో, భిక్ఖు, దుక్ఖే అఞ్ఞాణం, దుక్ఖసముదయే అఞ్ఞాణం, దుక్ఖనిరోధే అఞ్ఞాణం, దుక్ఖనిరోధగామినియా పటిపదాయ అఞ్ఞాణం – అయం వుచ్చతి, భిక్ఖు, అవిజ్జా; ఏత్తావతా చ అవిజ్జాగతో హోతీ’’తి.

‘‘తస్మాతిహ, భిక్ఖు, ‘ఇదం దుక్ఖ’న్తి యోగో కరణీయో…పే… ‘అయం దుక్ఖనిరోధగామినీ పటిపదా’తి యోగో కరణీయో’’తి. సత్తమం.