౬. దుతియసమణబ్రాహ్మణసుత్తం

౧౦౭౬. ‘‘యే హి కేచి, భిక్ఖవే, అతీతమద్ధానం సమణా వా బ్రాహ్మణా వా యథాభూతం అభిసమ్బుద్ధం పకాసేసుం, సబ్బే తే చత్తారి అరియసచ్చాని యథాభూతం అభిసమ్బుద్ధం పకాసేసుం. యే హి కేచి, భిక్ఖవే, అనాగతమద్ధానం సమణా వా బ్రాహ్మణా వా యథాభూతం అభిసమ్బుద్ధం పకాసేస్సన్తి, సబ్బే తే చత్తారి అరియసచ్చాని యథాభూతం అభిసమ్బుద్ధం పకాసేస్సన్తి. యే హి కేచి, భిక్ఖవే, ఏతరహి సమణా వా బ్రాహ్మణా వా యథాభూతం అభిసమ్బుద్ధం పకాసేన్తి, సబ్బే తే చత్తారి అరియసచ్చాని యథాభూతం అభిసమ్బుద్ధం పకాసేన్తి.

‘‘కతమాని చత్తారి? దుక్ఖం అరియసచ్చం…పే… దుక్ఖనిరోధగామినీ పటిపదా అరియసచ్చం. యే హి కేచి, భిక్ఖవే, అతీతమద్ధానం సమణా వా బ్రాహ్మణా వా యథాభూతం అభిసమ్బుద్ధం పకాసేసుం…పే… పకాసేస్సన్తి…పే… పకాసేన్తి, సబ్బే తే ఇమాని చత్తారి అరియసచ్చాని యథాభూతం అభిసమ్బుద్ధం పకాసేన్తి.

‘‘తస్మాతిహ, భిక్ఖవే, ‘ఇదం దుక్ఖ’న్తి యోగో కరణీయో…పే… ‘అయం దుక్ఖనిరోధగామినీ పటిపదా’తి యోగో కరణీయో’’తి. ఛట్ఠం.