౪. దుతియకులపుత్తసుత్తం

౧౦౭౪. ‘‘యే హి కేచి, భిక్ఖవే, అతీతమద్ధానం కులపుత్తా సమ్మా అగారస్మా అనగారియం పబ్బజితా యథాభూతం అభిసమేసుం, సబ్బే తే చత్తారి అరియసచ్చాని యథాభూతం అభిసమేసుం. యే హి కేచి, భిక్ఖవే, అనాగతమద్ధానం కులపుత్తా సమ్మా అగారస్మా అనగారియం పబ్బజితా యథాభూతం అభిసమేస్సన్తి, సబ్బే తే చత్తారి అరియసచ్చాని యథాభూతం అభిసమేస్సన్తి. యే హి కేచి, భిక్ఖవే, ఏతరహి కులపుత్తా సమ్మా అగారస్మా అనగారియం పబ్బజితా యథాభూతం అభిసమేన్తి, సబ్బే తే చత్తారి అరియసచ్చాని యథాభూతం అభిసమేన్తి.

‘‘కతమాని చత్తారి? దుక్ఖం అరియసచ్చం, దుక్ఖసముదయం అరియసచ్చం, దుక్ఖనిరోధం అరియసచ్చం, దుక్ఖనిరోధగామినీ పటిపదా అరియసచ్చం. యే హి కేచి, భిక్ఖవే, అతీతమద్ధానం కులపుత్తా సమ్మా అగారస్మా అనగారియం పబ్బజితా యథాభూతం అభిసమేసుం …పే… అభిసమేస్సన్తి…పే… అభిసమేన్తి, సబ్బే తే ఇమాని చత్తారి అరియసచ్చాని యథాభూతం అభిసమేన్తి.

‘‘తస్మాతిహ, భిక్ఖవే, ‘ఇదం దుక్ఖ’న్తి యోగో కరణీయో…పే… ‘అయం దుక్ఖనిరోధగామినీ పటిపదా’తి యోగో కరణీయో’’తి. చతుత్థం.