౪. పఠమదేవపదసుత్తం

౧౦౩౦. సావత్థినిదానం. చత్తారిమాని, భిక్ఖవే, దేవానం దేవపదాని అవిసుద్ధానం సత్తానం విసుద్ధియా అపరియోదాతానం సత్తానం పరియోదపనాయ.

కతమాని చత్తారి? ఇధ, భిక్ఖవే, అరియసావకో బుద్ధే అవేచ్చప్పసాదేన సమన్నాగతో హోతి – ఇతిపి సో భగవా…పే… సత్థా దేవమనుస్సానం బుద్ధో భగవాతి. ఇదం పఠమం దేవానం దేవపదం అవిసుద్ధానం సత్తానం విసుద్ధియా అపరియోదాతానం సత్తానం పరియోదపనాయ.

‘‘పున చపరం, భిక్ఖవే, అరియసావకో ధమ్మే…పే… సఙ్ఘే…పే….

‘‘పున చపరం, భిక్ఖవే, అరియసావకో అరియకన్తేహి సీలేహి సమన్నాగతో హోతి అఖణ్డేహి…పే… సమాధిసంవత్తనికేహి. ఇదం చతుత్థం దేవానం దేవపదం అవిసుద్ధానం సత్తానం విసుద్ధియా అపరియోదాతానం సత్తానం పరియోదపనాయ. ఇమాని ఖో, భిక్ఖవే, చత్తారి దేవానం దేవపదాని అవిసుద్ధానం సత్తానం విసుద్ధియా అపరియోదాతానం సత్తానం పరియోదపనాయా’’తి. చతుత్థం.