౪. పటిపత్తివగ్గో

౧. పఠమపటిపత్తిసుత్తం

౩౧. సావత్థినిదానం. ‘‘మిచ్ఛాపటిపత్తిఞ్చ వో, భిక్ఖవే, దేసేస్సామి, సమ్మాపటిపత్తిఞ్చ. తం సుణాథ. కతమా చ, భిక్ఖవే, మిచ్ఛాపటిపత్తి? సేయ్యథిదం – మిచ్ఛాదిట్ఠి…పే… మిచ్ఛాసమాధి. అయం వుచ్చతి, భిక్ఖవే, మిచ్ఛాపటిపత్తి. కతమా చ, భిక్ఖవే, సమ్మాపటిపత్తి? సేయ్యథిదం – సమ్మాదిట్ఠి…పే… సమ్మాసమాధి. అయం వుచ్చతి, భిక్ఖవే, సమ్మాపటిపత్తీ’’తి. పఠమం.

౨. దుతియపటిపత్తిసుత్తం

౩౨. సావత్థినిదానం. ‘‘మిచ్ఛాపటిపన్నఞ్చ వో, భిక్ఖవే, దేసేస్సామి, సమ్మాపటిపన్నఞ్చ. తం సుణాథ. కతమో చ, భిక్ఖవే, మిచ్ఛాపటిపన్నో? ఇధ, భిక్ఖవే, ఏకచ్చో మిచ్ఛాదిట్ఠికో హోతి…పే… మిచ్ఛాసమాధి – అయం వుచ్చతి, భిక్ఖవే, మిచ్ఛాపటిపన్నో. కతమో చ, భిక్ఖవే, సమ్మాపటిపన్నో? ఇధ, భిక్ఖవే, ఏకచ్చో సమ్మాదిట్ఠికో హోతి…పే… సమ్మాసమాధి – అయం వుచ్చతి, భిక్ఖవే, సమ్మాపటిపన్నో’’తి. దుతియం.

౩. విరద్ధసుత్తం

౩౩. సావత్థినిదానం. ‘‘యేసం కేసఞ్చి, భిక్ఖవే, అరియో అట్ఠఙ్గికో మగ్గో విరద్ధో, విరద్ధో తేసం అరియో అట్ఠఙ్గికో మగ్గో సమ్మా దుక్ఖక్ఖయగామీ. యేసం కేసఞ్చి, భిక్ఖవే, అరియో అట్ఠఙ్గికో మగ్గో ఆరద్ధో, ఆరద్ధో తేసం అరియో అట్ఠఙ్గికో మగ్గో సమ్మా దుక్ఖక్ఖయగామీ. కతమో చ, భిక్ఖవే, అరియో అట్ఠఙ్గికో మగ్గో? సేయ్యథిదం – సమ్మాదిట్ఠి…పే… సమ్మాసమాధి. యేసం కేసఞ్చి, భిక్ఖవే, అయం అరియో అట్ఠఙ్గికో మగ్గో విరద్ధో, విరద్ధో తేసం అరియో అట్ఠఙ్గికో మగ్గో సమ్మా దుక్ఖక్ఖయగామీ. యేసం కేసఞ్చి, భిక్ఖవే, అయం అరియో అట్ఠఙ్గికో మగ్గో ఆరద్ధో, ఆరద్ధో తేసం అరియో అట్ఠఙ్గికో మగ్గో సమ్మా దుక్ఖక్ఖయగామీ’’తి. తతియం.

౪. పారఙ్గమసుత్తం

౩౪. సావత్థినిదానం. ‘‘అట్ఠిమే, భిక్ఖవే, ధమ్మా భావితా బహులీకతా అపారా పారం గమనాయ సంవత్తన్తి. కతమే అట్ఠ? సేయ్యథిదం – సమ్మాదిట్ఠి…పే… సమ్మాసమాధి. ఇమే ఖో, భిక్ఖవే, అట్ఠ ధమ్మా భావితా బహులీకతా అపారా పారం గమనాయ సంవత్తన్తీ’’తి.

ఇదమవోచ భగవా. ఇదం వత్వాన సుగతో అథాపరం ఏతదవోచ సత్థా –

‘‘అప్పకా తే మనుస్సేసు, యే జనా పారగామినో;

అథాయం ఇతరా పజా, తీరమేవానుధావతి.

‘‘యే చ ఖో సమ్మదక్ఖాతే, ధమ్మే ధమ్మానువత్తినో;

తే జనా పారమేస్సన్తి, మచ్చుధేయ్యం సుదుత్తరం.

‘‘కణ్హం ధమ్మం విప్పహాయ, సుక్కం భావేథ పణ్డితో;

ఓకా అనోకమాగమ్మ, వివేకే యత్థ దూరమం.

‘‘తత్రాభిరతిమిచ్ఛేయ్య, హిత్వా కామే అకిఞ్చనో;

పరియోదపేయ్య అత్తానం, చిత్తక్లేసేహి పణ్డితో.

‘‘యేసం సమ్బోధియఙ్గేసు, సమ్మా చిత్తం సుభావితం;

ఆదానపటినిస్సగ్గే, అనుపాదాయ యే రతా;

ఖీణాసవా జుతిమన్తో, తే లోకే పరినిబ్బుతా’’తి. చతుత్థం;

౫. పఠమసామఞ్ఞసుత్తం

౩౫. సావత్థినిదానం. ‘‘సామఞ్ఞఞ్చ వో, భిక్ఖవే, దేసేస్సామి, సామఞ్ఞఫలాని చ. తం సుణాథ. కతమఞ్చ, భిక్ఖవే, సామఞ్ఞం? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. ఇదం వుచ్చతి, భిక్ఖవే, సామఞ్ఞం. కతమాని చ, భిక్ఖవే, సామఞ్ఞఫలాని? సోతాపత్తిఫలం, సకదాగామిఫలం, అనాగామిఫలం, అరహత్తఫలం – ఇమాని వుచ్చన్తి, భిక్ఖవే, సామఞ్ఞఫలానీ’’తి. పఞ్చమం.

౬. దుతియసామఞ్ఞసుత్తం

౩౬. సావత్థినిదానం. ‘‘సామఞ్ఞఞ్చ వో, భిక్ఖవే, దేసేస్సామి, సామఞ్ఞత్థఞ్చ. తం సుణాథ. కతమఞ్చ ఖో, భిక్ఖవే, సామఞ్ఞం? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. ఇదం వుచ్చతి, భిక్ఖవే, సామఞ్ఞం. కతమో చ, భిక్ఖవే, సామఞ్ఞత్థో? యో ఖో, భిక్ఖవే, రాగక్ఖయో దోసక్ఖయో మోహక్ఖయో – అయం వుచ్చతి, భిక్ఖవే, సామఞ్ఞత్థో’’తి. ఛట్ఠం.

౭. పఠమబ్రహ్మఞ్ఞసుత్తం

౩౭. సావత్థినిదానం. ‘‘బ్రహ్మఞ్ఞఞ్చ వో, భిక్ఖవే, దేసేస్సామి, బ్రహ్మఞ్ఞఫలాని చ. తం సుణాథ. కతమఞ్చ ఖో, భిక్ఖవే, బ్రహ్మఞ్ఞం? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. ఇదం వుచ్చతి, భిక్ఖవే, బ్రహ్మఞ్ఞం. కతమాని చ, భిక్ఖవే, బ్రహ్మఞ్ఞఫలాని? సోతాపత్తిఫలం, సకదాగామిఫలం, అనాగామిఫలం, అరహత్తఫలం – ఇమాని వుచ్చన్తి, భిక్ఖవే, బ్రహ్మఞ్ఞఫలానీ’’తి. సత్తమం.

౮. దుతియబ్రహ్మఞ్ఞసుత్తం

౩౮. సావత్థినిదానం. ‘‘బ్రహ్మఞ్ఞఞ్చ వో, భిక్ఖవే, దేసేస్సామి, బ్రహ్మఞ్ఞత్థఞ్చ. తం సుణాథ. కతమఞ్చ, భిక్ఖవే, బ్రహ్మఞ్ఞం? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. ఇదం వుచ్చతి, భిక్ఖవే, బ్రహ్మఞ్ఞం. కతమో చ, భిక్ఖవే, బ్రహ్మఞ్ఞత్థో? యో ఖో, భిక్ఖవే, రాగక్ఖయో దోసక్ఖయో మోహక్ఖయో – అయం వుచ్చతి, భిక్ఖవే, బ్రహ్మఞ్ఞత్థో’’తి. అట్ఠమం.

౯. పఠమబ్రహ్మచరియసుత్తం

౩౯. సావత్థినిదానం. ‘‘బ్రహ్మచరియఞ్చ వో, భిక్ఖవే, దేసేస్సామి, బ్రహ్మచరియఫలాని చ. తం సుణాథ. కతమఞ్చ, భిక్ఖవే, బ్రహ్మచరియం? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. ఇదం వుచ్చతి, భిక్ఖవే, బ్రహ్మచరియం. కతమాని చ, భిక్ఖవే, బ్రహ్మచరియఫలాని? సోతాపత్తిఫలం, సకదాగామిఫలం, అనాగామిఫలం, అరహత్తఫలం – ఇమాని వుచ్చన్తి, భిక్ఖవే, బ్రహ్మచరియఫలానీ’’తి. నవమం.

౧౦. దుతియబ్రహ్మచరియసుత్తం

౪౦. సావత్థినిదానం. ‘‘బ్రహ్మచరియఞ్చ వో, భిక్ఖవే, దేసేస్సామి, బ్రహ్మచరియత్థఞ్చ. తం సుణాథ. కతమఞ్చ, భిక్ఖవే, బ్రహ్మచరియం? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. ఇదం వుచ్చతి, భిక్ఖవే, బ్రహ్మచరియం. కతమో చ, భిక్ఖవే, బ్రహ్మచరియత్థో? యో ఖో, భిక్ఖవే, రాగక్ఖయో దోసక్ఖయో మోహక్ఖయో – అయం వుచ్చతి, భిక్ఖవే, బ్రహ్మచరియత్థో’’తి. దసమం.

పటిపత్తివగ్గో చతుత్థో.

తస్సుద్దానం –

పటిపత్తి పటిపన్నో చ, విరద్ధఞ్చ పారంగమా;

సామఞ్ఞేన చ ద్వే వుత్తా, బ్రహ్మఞ్ఞా అపరే దువే;

బ్రహ్మచరియేన ద్వే వుత్తా, వగ్గో తేన పవుచ్చతీతి.