౫. అఞ్ఞతిత్థియపేయ్యాలవగ్గో

౧. రాగవిరాగసుత్తం

౪౧. సావత్థినిదానం. ‘‘సచే వో, భిక్ఖవే, అఞ్ఞతిత్థియా పరిబ్బాజకా ఏవం పుచ్ఛేయ్యుం – ‘కిమత్థియం, ఆవుసో, సమణే గోతమే బ్రహ్మచరియం వుస్సతీ’తి, ఏవం పుట్ఠా తుమ్హే, భిక్ఖవే, తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథ – ‘రాగవిరాగత్థం ఖో, ఆవుసో, భగవతి బ్రహ్మచరియం వుస్సతీ’తి. సచే పన వో, భిక్ఖవే, అఞ్ఞతిత్థియా పరిబ్బాజకా ఏవం పుచ్ఛేయ్యుం – ‘అత్థి పనావుసో, మగ్గో, అత్థి పటిపదా రాగవిరాగాయా’తి, ఏవం పుట్ఠా తుమ్హే, భిక్ఖవే, తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథ – ‘అత్థి ఖో, ఆవుసో, మగ్గో, అత్థి పటిపదా రాగవిరాగాయా’తి. కతమో చ, భిక్ఖవే, మగ్గో, కతమా చ పటిపదా రాగవిరాగాయ? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. అయం, భిక్ఖవే, మగ్గో, అయం పటిపదా రాగవిరాగాయాతి. ఏవం పుట్ఠా తుమ్హే, భిక్ఖవే, తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథా’’తి. పఠమం.

౨-౭. సంయోజనప్పహానాదిసుత్తఛక్కం

౪౨-౪౭. ‘‘సచే వో, భిక్ఖవే, అఞ్ఞతిత్థియా పరిబ్బాజకా ఏవం పుచ్ఛేయ్యుం – ‘కిమత్థియం, ఆవుసో, సమణే గోతమే బ్రహ్మచరియం వుస్సతీ’తి, ఏవం పుట్ఠా తుమ్హే, భిక్ఖవే, తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథ – ‘సంయోజనప్పహానత్థం ఖో, ఆవుసో, భగవతి బ్రహ్మచరియం వుస్సతీ’తి…పే… ‘అనుసయసముగ్ఘాతనత్థం ఖో, ఆవుసో, భగవతి బ్రహ్మచరియం వుస్సతీ’తి…పే… ‘అద్ధానపరిఞ్ఞత్థం ఖో, ఆవుసో, భగవతి బ్రహ్మచరియం వుస్సతీ’తి…పే… ‘ఆసవానం ఖయత్థం ఖో, ఆవుసో, భగవతి బ్రహ్మచరియం వుస్సతీ’తి…పే… ‘విజ్జావిముత్తిఫలసచ్ఛికిరియత్థం ఖో, ఆవుసో, భగవతి బ్రహ్మచరియం వుస్సతీ’తి…పే… ‘ఞాణదస్సనత్థం ఖో, ఆవుసో, భగవతి బ్రహ్మచరియం వుస్సతీ’తి…పే…. సత్తమం.

౮. అనుపాదాపరినిబ్బానసుత్తం

౪౮. సావత్థినిదానం. ‘‘సచే వో, భిక్ఖవే, అఞ్ఞతిత్థియా పరిబ్బాజకా ఏవం పుచ్ఛేయ్యుం – ‘కిమత్థియం, ఆవుసో, సమణే గోతమే బ్రహ్మచరియం వుస్సతీ’తి, ఏవం పుట్ఠా తుమ్హే, భిక్ఖవే, తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథ – ‘అనుపాదాపరినిబ్బానత్థం ఖో, ఆవుసో, భగవతి బ్రహ్మచరియం వుస్సతీ’తి. సచే పన వో, భిక్ఖవే, అఞ్ఞతిత్థియా పరిబ్బాజకా ఏవం పుచ్ఛేయ్యుం – ‘అత్థి పనావుసో, మగ్గో, అత్థి పటిపదా అనుపాదాపరినిబ్బానాయా’తి, ఏవం పుట్ఠా తుమ్హే, భిక్ఖవే, తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథ – ‘అత్థి ఖో, ఆవుసో, మగ్గో, అత్థి పటిపదా అనుపాదాపరినిబ్బానాయా’తి. కతమో చ, భిక్ఖవే, మగ్గో, కతమా చ పటిపదా అనుపాదాపరినిబ్బానాయ? అయమేవ అరియో అట్ఠఙ్గికో మగ్గో, సేయ్యథిదం – సమ్మాదిట్ఠి…పే… సమ్మాసమాధి. అయం, భిక్ఖవే, మగ్గో, అయం పటిపదా అనుపాదాపరినిబ్బానాయాతి. ఏవం పుట్ఠా తుమ్హే, భిక్ఖవే, తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథా’’తి. అట్ఠమం.

అఞ్ఞతిత్థియపేయ్యాలవగ్గో పఞ్చమో.

తస్సుద్దానం –

విరాగసంయోజనం అనుసయం, అద్ధానం ఆసవా ఖయా;

విజ్జావిముత్తిఞాణఞ్చ, అనుపాదాయ అట్ఠమీ.